എമിലിയാനോ മാർട്ടിനസിനെ വേണ്ടെന്ന് യുവന്റസ്; പെഡ്രോ നെറ്റോയ്ക്കായി സിറ്റിയും അൽ ഹിലാലും

യൂറോപ്യൻ ഫുട്ബോൾ ട്രാൻസ്ഫർ വിപണി അവസാന ഘട്ടത്തിലേക്ക് കടക്കവേ അപ്രതീക്ഷിത ട്വിസ്റ്റുകള്‍ തുടരുന്നു. അർജന്റീനയുടെ ലോകകപ്പ് ഹീറോ എമിലിയാനോ മാർട്ടിനസിനെ ടീമിലെത്തിക്കാനുള്ള നീക്കത്തിൽനിന്ന് ഇറ്റാലിയൻ വമ്പന്മാരായ യുവന്റസ് പിന്മാറിയതാണ് ഏറ്റവും പുതിയ വഴിത്തിരിവ്. യുവന്റസും ആസ്റ്റൺ വില്ലയും തമ്മിൽ നടന്ന ചർച്ചകൾ വഴിമുട്ടിയതോടെ മുപ്പത്തിമൂന്നുകാരനായ മാര്‍ട്ടിനസ് വില്ലയിൽ തന്നെ തുടരുമെന്നാണ് സൂചന.

മാഞ്ചസ്റ്റർ സിറ്റിയോട് വിടപറഞ്ഞ് റോഡ്രി; ബാഴ്‌സലോണയുമായി 700 കോടിയുടെ വമ്പൻ കരാർ

ആസ്റ്റൺ വില്ല ആവശ്യപ്പെട്ട ഭീമമായ ട്രാൻസ്ഫർ തുക അംഗീകരിക്കാൻ യുവന്‍റസ് തയാറാകാതിരുന്നതോടെയാണ് ചർച്ചകൾ വഴിമുട്ടിയതെന്ന് പ്രമുഖ ട്രാൻസ്ഫർ വിദഗ്ധൻ ഫാബ്രിസിയോ റൊമാനോ പറഞ്ഞു. മാർട്ടിനസിനായി ആഡ്-ഓണുകൾ ഇല്ലാതെ 8.5 ദശലക്ഷം പൗണ്ടാണ് (110.18 കോടി രൂപ) ആസ്റ്റൺ വില്ല ആവശ്യപ്പെട്ടത്. എന്നാൽ ഈ തുക നൽകാൻ കഴിയില്ലെന്ന നിലപാടിലാണ് യുവന്റസ് ചർച്ചകളിൽനിന്ന് പിന്മാറിയത്.

വില്ലയിലും മാർട്ടിനസിന് ഭീഷണി

യുവന്റസിലേക്കുള്ള കൂടുമാറ്റം പരാജയപ്പെട്ടതോടെ എമിലിയാനോ മാർട്ടിനസ് വില്ലയിൽ തന്നെ തുടരുമെങ്കിലും ടീമിന്‍റെ ഫസ്റ്റ് ചോയ്സ് ഗോൾകീപ്പറായുള്ള റോളിന് ഇളക്കം തട്ടിയേക്കും. പാർമയിൽനിന്ന് ജാപ്പനീസ് താരം ഗോള്‍ കീപ്പര്‍ സിയോൺ സുസുക്കിയെ ടീമിലെത്തിക്കാൻ വില്ല ധാരണയിലെത്തിക്കഴിഞ്ഞു. പിഎസ്ജിയിലേക്ക് പോകാനിരുന്ന ഇരുപത്തിമൂന്നുകാരനായ താരത്തെ അവസാന നിമിഷമാണ് വില്ല സ്വന്തമാക്കിയത്.

ഫുട്ബോളിലെ അവസാന വര്‍ഷം ഇതായേക്കാം; വിരമിക്കല്‍ സൂചനയുമായി റൊണാള്‍ഡോ

ആഡ്-ഓണുകൾ ഉൾപ്പെടെ 35 ദശലക്ഷം യൂറോ (ഏകദേശം 320 കോടി രൂപ) നൽകിയാണ് ജാപ്പനീസ് താരത്തെ വില്ല തട്ടകത്തിലെത്തിക്കുന്നത്. ലോകകപ്പിൽ മികച്ച പ്രകടനം പുറത്തെടുത്ത സുസുക്കി എത്തുന്നതോടെ ഒന്നാം നമ്പർ ഗോൾകീപ്പറാകാൻ മാർട്ടിനസിന് കടുത്ത മത്സരത്തെ നേരിടേണ്ടിവരും.

യുവന്റസ് റഡാറിൽ വികാരിയോ

മാർട്ടിനസ് ഡീൽ ഉപേക്ഷിച്ചതോടെ ടോട്ടനം ഹോട്സ്പറിന്റെ ഇറ്റാലിയൻ ഗോൾകീപ്പർ ഗുഗ്ലിയൽമോ വികാരിയോയെ ലക്ഷ്യമിട്ട് യുവന്റസ് ചർച്ചകൾ വേഗത്തിലാക്കി. ടോട്ടനത്തിൽ ആന്റോണിൻ കിൻസ്കി ഒന്നാം നമ്പർ കീപ്പറായതോടെ അവസരം കുറഞ്ഞ വികാരിയോ സെരി എയിലേക്ക് മടങ്ങാൻ താൽപര്യം പ്രകടിപ്പിച്ചിട്ടുണ്ട്. ബൈ ഓപ്ഷനോടെയുള്ള ലോൺ വ്യവസ്ഥയിലാണ് താരത്തെ യുവന്റസ് ടീമിലെത്തിക്കാൻ ഒരുങ്ങുന്നത്.

മികച്ച ടോട്ടല്‍; ഫലമുണ്ടാവില്ലേ? ഇന്ത്യയ്ക്ക് വില്ലന്‍ ബംഗ്ലദേശും മഴയും

ഇതോടെ വരുന്ന സീസണിൽ ആസ്റ്റൺ വില്ലയിൽ തന്റെ സ്ഥാനം നിലനിർത്താനുള്ള പോരാട്ടത്തിലാകും മാർട്ടിനസിന്‍റെ ശ്രദ്ധ. ഞായറാഴ്ച ബ്രൈറ്റനെതിരെയാണ് വില്ലയുടെ അടുത്ത മത്സരം.

യൂറോപ്യൻ ഫുട്ബോൾ വിപണിയിലെ മറ്റ് പ്രധാന ട്രാൻസ്ഫർ അപ്‌ഡേറ്റുകൾ:

പെഡ്രോ നെറ്റോയ്ക്കായി മാഞ്ചസ്റ്റർ സിറ്റിയും അൽ ഹിലാലും: ചെൽസിയുടെ പോർച്ചുഗീസ് വിങ്ങർ പെഡ്രോ നെറ്റോയെ (26) സ്വന്തമാക്കാൻ എൻസോ മരെസ്കയുടെ മാഞ്ചസ്റ്റർ സിറ്റി രംഗത്ത്. വൻ തുക വാഗ്ദാനം ചെയ്ത് സൗദി ക്ലബ്ബ് അൽ ഹിലാലും താരത്തിനായി രംഗത്തുണ്ട്.

സുബിമെൻഡിക്കായി മൊറീഞ്ഞോ: റയൽ മഡ്രിഡിന്റെ പുതിയ പരിശീലകനായി ചുമതലയേറ്റ ഹോസെ മൊറീഞ്ഞോ ആഴ്‌സനലിന്റെ സ്പാനിഷ് മിഡ്ഫീൽഡർ മാർട്ടിൻ സുബിമെൻഡിയെ (27) സാന്റിയാഗോ ബെർണബ്യൂവിലെത്തിക്കാൻ താൽപര്യം പ്രകടിപ്പിച്ചു.

ഒസിംഹെൻ ആഴ്‌സനലിലേക്ക്?: ഗലാറ്റസറേയിൽ കളിക്കുന്ന നൈജീരിയൻ സ്ട്രൈക്കർ വിക്ടർ ഒസിംഹെൻ (27) ക്ലബ്ബ് വിടാന്‍ സാധ്യത. പ്രീമിയർ ലീഗ് വമ്പൻമാരായ ആഴ്‌സനൽ, താരത്തിനായി ചർച്ചകൾ സജീവമാക്കിയിട്ടുണ്ട്.

മിക്കൗതാദ്‌സെക്കായി ന്യൂകാസിൽ: വിയ്യാറയലിന്റെ ജോർജിയൻ ഫോര്‍വേഡ് ജോർജസ് മിക്കൗതാദ്‌സെക്കായി 55 ദശലക്ഷം യൂറോയുടെ (ഏകദേശം 500 കോടി രൂപ) വമ്പൻ ഓഫറുമായി ന്യൂകാസിൽ യുണൈറ്റഡ്. ബാഴ്‌സലോണയും താരത്തിൽ കണ്ണുവെച്ചിട്ടുണ്ട്.

ലിയാം ഡെലാപ്പിനായി പോരാട്ടം: ചെൽസി വിൽക്കാൻ തീരുമാനിച്ച ഇംഗ്ലീഷ് സ്ട്രൈക്കർ ലിയാം ഡെലാപ്പിനായി എവർട്ടനും നോട്ടിങ്ഹാം ഫോറസ്റ്റും തമ്മിൽ കടുത്ത മത്സരമാണ് നടക്കുന്നത്.

മറ്റ് പ്രധാന നീക്കങ്ങൾ:

ജിറോണയുടെ മൊറോക്കൻ താരം അസെദ്ദീൻ ഔനാഹിക്കായി ബാഴ്‌സലോണയ്ക്കൊപ്പം അത്‌ലറ്റിക്കോ മഡ്രിഡും രംഗത്ത്. എസി മിലാൻ പരിശീലകൻ റൂബൻ അമോറിമിന്റെ പ്ലാനില്‍ നിന്ന് പുറത്തായ ഫ്രഞ്ച് മിഡ്ഫീൽഡർ യൂസഫ് ഫൊഫാനയെ സ്വന്തമാക്കാൻ നോട്ടിങാം ഫോറസ്റ്റും ക്രിസ്റ്റൽ പാലസും ശ്രമം തുടങ്ങി. മാഞ്ചസ്റ്റർ യുണൈറ്റഡിന്റെ ലെഫ്റ്റ് ബാക്ക് ഹാരി അമാസിനെ വിൽക്കാനും ക്ലബ്ബ് ഒരുങ്ങുന്നതായാണ് റിപ്പോര്‍ട്ട്.