സീസണില്‍ ജയിക്കാനായത് എട്ടു മത്സരങ്ങളില്‍; മാഞ്ചസ്റ്റര്‍ യുണൈറ്റഡ് പരിശീലകന്‍ പുറത്ത്

ഇംഗ്ലീഷ് പ്രീമിയർ ലീഗ് ക്ലബ് മാഞ്ചസ്റ്റർ യുണൈറ്റഡ് മുഖ്യ പരിശീലകൻ റൂബൻ അമോറിമിനെ പുറത്താക്കി. തരംതാഴ്ത്തൽ ഭീഷണി നേരിടുന്ന ലീഡ്സ് യുണൈറ്റഡുമായി കഴിഞ്ഞ ദിവസം സമനില വഴങ്ങിയതിനു പിന്നാലെയാണ് നടപടി.

പ്രീമിയർ ലീഗിൽ മാഞ്ചസ്റ്റർ യുണൈറ്റഡ് ആറാം സ്ഥാനത്താണ്. ഈ സാഹചര്യത്തിൽ ഒരു മാറ്റം വരുത്താൻ ഏറ്റവും അനുയോജ്യമായ സമയം ഇതാണെന്ന് ക്ലബ് നേതൃത്വം മനസ്സില്ലാമനസ്സോടെ തീരുമാനിച്ചിരിക്കുന്നു. പ്രീമിയർ ലീഗിൽ സാധ്യമായ ഏറ്റവും മികച്ച സ്ഥാനത്ത് സീസൺ അവസാനിപ്പിക്കാൻ ടീമിന് ഇത് അവസരം നൽകും– ക്ലബ് പ്രസ്താവനയിൽ അറിയിച്ചു.

ലീഗിൽ ഒന്നാം സ്ഥാനത്തുള്ള ആർസനലിനെക്കാൾ 17 പോയിന്റ് പിന്നിലാണ് യുണൈറ്റഡ്. കളിച്ച അവസാന അഞ്ച് മത്സരങ്ങളിൽ ഒന്നിൽ മാത്രമാണ് ടീമിന് ജയിക്കാനായത്. തന്റെ ജോലി സുരക്ഷിതമാണോ എന്ന ചോദ്യങ്ങളിൽ അസ്വസ്ഥനായി, താൻ ഉത്തരവുകൾ പാലിക്കുന്ന ഒരു കോച്ച് മാത്രമല്ല, പൂർണ അധികാരങ്ങളുള്ള മാനേജരായാണ് യുണൈറ്റഡിൽ എത്തിയതെന്ന് വെല്ലുവിളിയോടെ അമോറിം പറഞ്ഞതിന് തൊട്ടുപിന്നാലെയാണ് പുറത്താക്കൽ തീരുമാനം. വെള്ളിയാഴ്ച പുതിയ കളിക്കാരുടെ കൈമാറ്റത്തെക്കുറിച്ച് സംസാരിക്കുമ്പോൾ അമോറിം നിരാശനായിരുന്നു. 

ലീഡ്സിനെതിരായ സമനിലയ്ക്ക് ശേഷം, ബോർഡിന്റെ വിശ്വാസം ഇപ്പോഴുമുണ്ടോ എന്ന ചോദ്യം ആവർത്തിച്ചപ്പോൾ പോർച്ചുഗീസ് പരിശീലകൻ പ്രകടമായി അസ്വസ്ഥനായി. തിരഞ്ഞെടുത്ത വിവരങ്ങൾ മാത്രം നൽകുന്നുവെന്ന് മാധ്യമപ്രവർത്തകരെ രൂക്ഷമായി ശാസിച്ച ശേഷമാണ് 40-കാരനായ അമോറിം തന്റെ സ്ഥാനത്തെ ശക്തമായി ന്യായീകരിക്കാൻ തുനിഞ്ഞത്.

ഓൾഡ് ട്രാഫോഡിൽ നിന്ന് സ്വയം പടിയിറങ്ങാൻ ഉദ്ദേശിക്കുന്നില്ലെന്ന് അമോറിം വ്യക്തമാക്കിയിരുന്നു. പരിശീലക ചുമതലകൾക്കപ്പുറമുള്ള തന്റെ മാനേജീരിയൽ അധികാരത്തെക്കുറിച്ച് അദ്ദേഹം ആവർത്തിച്ച് ഊന്നിപ്പറയുകയും ചെയ്തു.