കൊടുങ്കാറ്റായി മാറ്റ് ഹെന്‍​റി; തോറ്റ് തുന്നംപാടി ടീം ഇന്ത്യ!

ജയത്തോടെ പരമ്പര സ്വന്തമാക്കാന്‍ ലക്ഷ്യമിട്ട് നാലാം ഏകദിനത്തിന് ബേ ഓവലില്‍ ഇറങ്ങിയ ഇന്ത്യയ്ക്ക് കിവീസിനെതിരെ നാണംകെട്ട തോല്‍വി. 244റണ്‍സിനാണ് ന്യൂസീലന്‍ഡിന്‍റെ ജയം. സ്കോര്‍ ന്യൂസീലന്‍ഡ് :333/10.ഇന്ത്യ 26.4 ഓവറില്‍ 89/10.  ഇന്ത്യന്‍ നിരയില്‍ ആകെ മൂന്നു പേരാണ് രണ്ടക്കം കടന്നത്.

അക്കൗണ്ട് തുറക്കും മുന്‍പെ രോഹിതും കോലിയും ശ്രേയസും മടങ്ങി. ഗില്ലിന് പകരക്കാരനായി എത്തിയ ഋതുരാജ് ഗെയ്ക്ക്​വാദ് അഞ്ച് റണ്‍സെടുത്ത് മടങ്ങി. ഇഷാന്‍ കിഷനും അക്സര്‍ പട്ടേലും ചേര്‍ന്നാണ് സ്കോര്‍ 50 കടത്തിയത്. ക്ഷമയോടെ  പിടിച്ച് നില്‍ക്കാന്‍ ഇഷാന്‍ കിഷന്‍ ശ്രമിച്ചെങ്കിലും മാറ്റ് ഹെന്‍​റിക്ക് മുന്നില്‍ വീണു. 52 പന്തുകളില്‍ നിന്ന് 27 റണ്‍സുമായി  മടങ്ങി. ആറ് വിക്കറ്റുകളാണ് ഹെന്‍​റി സ്വന്തമാക്കിയത്. 

ടോസ് നേടിയ ഇന്ത്യ ഫീല്‍ഡിങ് തിരഞ്ഞെടുക്കുകയായിരുന്നു. അടിച്ചു കസറിയ ഓപ്പണര്‍ വില്‍ യങിന്റെ തകര്‍പ്പന്‍ ബാറ്റിങ് മികവില്‍ കിവീസ് ഇന്ത്യയ്ക്ക് മുന്നില്‍ 334 റണ്‍സെന്ന വിജയലക്ഷ്യം കുറിച്ചു. മറുപടി ബാറ്റിങിനിറങ്ങിയ ഇന്ത്യ തകര്‍ന്നടി‍ഞ്ഞു. അഞ്ച് ഡെലിവറിയില്‍ മൂന്ന് വിക്കറ്റുമായി മാറ്റ് ഹെന്‍​റി കൊടുങ്കാറ്റായതോടെ പിന്നാലെ എത്തിയ ബാറ്റര്‍മാരും ഓരോത്തരായി മടങ്ങി.