മിന്നും ഷോട്ടുകളുതിർത്ത് വമ്പൻ സ്കോർ ചേസ് ചെയ്താണ് ഗുവാഹത്തിയിൽ വിൻഡീസിനെ ഇന്ത്യ തകർത്തത്. 406 റൺസിന്റെ വിജയലക്ഷ്യം 43.3 ഓവറിൽ ഇന്ത്യ മറികടന്നു. പക്ഷേ ഈ പ്രകടനവും ഇന്ത്യൻ കോച്ച് ഗൗതം ഗംഭീറിനെ സന്തോഷിപ്പിക്കുന്നില്ല. മത്സരശേഷം തന്റെ അനിഷ്ടം ഗംഭീർ തുറന്നുപറയുകയും ചെയ്തു.
മത്സരത്തിൽ 811 റൺസാണ് ഇരുടീമുകളും ചേർന്ന് നേടിയത്. ഒരു ഇരട്ട സെഞ്ചുറിയടക്കം അഞ്ച് താരങ്ങൾ സെഞ്ചുറിയും നേടി. ഇതുതന്നെയാണ് ഗംഭീർ ചൂണ്ടിക്കാട്ടിയ പ്രശ്നം. ബാറ്റും ബോളും തമ്മിൽ ബാലൻസില്ലാത്ത പിച്ചാണ് ഗുവാഹത്തിയിലേതെന്നും ഇവിടെ നടന്നത് ക്രിക്കറ്റല്ല, മറിച്ച് ബാറ്റിങ് മാത്രമാണെന്നും ഗംഭീർ തുറന്നടിച്ചു.
“സത്യസന്ധമായി പറയുകയാണെങ്കിൽ, ബാറ്റും ബോളും തമ്മിൽ കൂടുതൽ മത്സരം ഉണ്ടാകേണ്ടതുണ്ടെന്നാണ് ഞാൻ കരുതുന്നത്. ക്രിക്കറ്റിനെപ്പറ്റിയാണ് നാം സംസാരിക്കുന്നത്. ഇത് ക്രിക്കറ്റല്ല, ബാറ്റിങ് മാത്രമാണ്,” എന്നാണ് ഗംഭീറിന്റെ വാക്കുകൾ.
“ഈ പിച്ചിൽ പന്തെറിയുന്നൊരു യുവബൗളറാണെന്ന് ചിന്തിച്ചുനോക്കുക. എതിർ ടീം 400 റൺസെടുക്കുകയും നമ്മളത് ചേസ് ചെയ്യുകയും ചെയ്തു. റെക്കോർഡ് മികച്ചതാണ്. കാണികൾക്കും ബ്രോഡ്കാസ്റ്റേഴ്സിനും ഇത് നല്ലതാണ്. പക്ഷേ ഒരു യഥാർഥ ക്രിക്കറ്റ് ആരാധകൻ എന്ന നിലയിൽ, കോച്ചായ എന്നോട് ചോദിക്കുമ്പോൾ ബൗളർമാരുടെ കാര്യത്തിൽ എനിക്ക് സഹതാപം തോന്നും,” എന്നാണ് ഗംഭീർ പറഞ്ഞത്.
ബുധനാഴ്ച നടന്ന മത്സരത്തിന്റെ ഇരു പകുതികളിലും ബൗളർമാർ വലിയ തിരിച്ചടിയാണ് നേരിട്ടത്. ടോസ് നേടി ബൗളിങ് തിരഞ്ഞെടുത്ത ഇന്ത്യയ്ക്ക് പവർപ്ലേയിൽ ആധിപത്യം സ്ഥാപിക്കാനായില്ല. അമിൽ ജാങ്കോ, ജോൺ കാംപ്ബെൽ, ഷായ് ഹോപ്പ് എന്നിവരുടെ സെഞ്ചുറികളാണ് വിൻഡീസിനെ 405 റൺസിലെത്തിച്ചത്.
എന്നാൽ ബാറ്റിങ്ങിന്റെ ശക്തിയിൽ റൺമല അതിവേഗം താണ്ടാൻ ഇന്ത്യയ്ക്കായി. ഓപ്പണിങ്ങിൽ 255 റൺസിന്റെ കൂട്ടുകെട്ടാണ് രോഹിത്തും ഗില്ലും ചേർന്നുണ്ടാക്കിയത്. രോഹിത് 101 റൺസും ഗിൽ 223 റൺസും നേടി.