മുറ്റത്ത് കളിച്ചുകൊണ്ടിരിക്കുന്നതിനിടയിൽ കിണറ്റിൽ വീണ കുട്ടിയെ ചെറിയമ്മ കിണറ്റിലേക്കെടുത്തുചാടി രക്ഷിച്ചു. ബുധനാഴ്ച രാവിലെ 11 മണിയോടെയാണ് സംഭവം. തിരുമിറ്റക്കോട് പഞ്ചായത്തിലെ ഒഴുവത്ര കാഞ്ഞുള്ളി കൃഷ്ണരാജിന്റെ മകൻ അഭിമന്യു (രണ്ട്) ആണ് വീട്ടുമുറ്റത്ത് കളിക്കുന്നതിനിടെ കിണറ്റിൽ വീണത്.
സംഭവമറിഞ്ഞ് ഓടിയെത്തിയ പിത‍ൃസഹോദരന്റെ ഭാര്യ ശ്രീക്കുട്ടി (24) കിണറ്റിലേക്ക് എടുത്തുചാടി കുട്ടിയെ ആഴത്തിൽ നിന്നു പൊക്കിയെടുക്കുകയായിരുന്നു. ഓടിക്കൂടിയ നാട്ടുകാർ ഇരുവരേയും കരക്കെത്തിച്ചു. കിണറ്റിലേക്ക് എടുത്തുചാടിയത് അൽപം അവിവേകമെങ്കിലും യുവതിയുടെ സമയോചിത ഇടപെടലും മനോധൈര്യവുമാണ് കുട്ടിക്ക് തുണയായത്.