ദേശീയ സീനിയര്‍ വനിതാ ഹോക്കി ചാംപ്യന്‍ഷിപ്പില്‍ ഹരിയാനയ്ക്ക് കിരീടം. മറുപടിയില്ലാത്ത ആറ് ഗോളുകള്‍ക്ക് സ്‌പോര്‍ട്‌സ് അതോറിറ്റി ഓഫ് ഇന്ത്യയെ തകര്‍ത്താണ് ഹരിയാന ജേതാക്കളായത്.
ആദ്യപാദം ഗോൾരഹിതമായിരുന്നു. എന്നാൽ രണ്ടാം പാദത്തിന്റെ തുടക്കം മുതൽ ഹരിയാന ഗോൾവേട്ട തുടങ്ങി 19,22, 47, 50 മിനിറ്റുകളിൽ ഹരിയാന ഗോൾവല ചലിപ്പിച്ചു. മത്സരം അവസാനിക്കുന്നതിന് തൊട്ട് മുൻപ് രണ്ട് ഗോളുകൾ കൂടി നേടി.
പൂൾ ബിയിൽ 3-3 എന്ന നിലയിൽ ഇരുടീമുകളും സമനില പാലിച്ചിരുന്നു. എന്നാൽ ഫൈനലിൽ സായിക്ക് പിഴച്ചു. കഴിഞ്ഞ തവണ മൂന്നാം സ്ഥാനത്തായിരുന്ന ഹരിയാന 7 വർഷത്തെ ഇടവേളക്ക് ശേഷമാണ് ജേതാക്കളാകുന്നത്. ലൂസേഴ്‌സ് ഫൈനലിൽ മഹാരാഷ്ട്രയെ ഒന്നിനെതിരെ രണ്ടുഗോളുകള്‍ക്ക് തോല്‍പിച്ച് മധ്യപ്രദേശ് ഹോക്കി അക്കാദമി മൂന്നാം സ്ഥാനം നേടി.ചാംപ്യൻഷിപ്പില്‍ എ ഡിവിഷനിലിറങ്ങിയ കേരളം മൂന്നു മൽസരത്തിലും ദയനീയമായി പരാജയപ്പെട്ടിരുന്നു.