അവിശ്വസനീയമായ ഇന്ത്യ എന്ന പ്രമേയത്തിൽ അബുദാബിയിൽ ഇന്ത്യ ഫെസ്റ്റ് സംഘടിപ്പിച്ചു. അബുദാബി ഇന്ത്യൻ ഇസ്ലാമിക് സെൻററിൽ സംഘടിപ്പിച്ച മേളയിൽ കലാസാംസ്കാരികപരിപാടികൾ അരങ്ങേറി. പ്രവാസിമലയാളികളുടെ സജീവപങ്കാളിത്തത്തോടെയാണ് മേള ഒരുക്കിയത്.
നാടിന്റെ വൈവിധ്യങ്ങൾ പ്രദർശിപ്പിക്കുന്ന കലാപരിപാടികൾ, നാട്ടുതനിമയുള്ള ഭക്ഷണ ശാലകൾ, വസ്ത്രങ്ങൾ, കരകൗശല വസ്തുക്കൾ തുടങ്ങി ഇന്ത്യ അറബ് സാംസ്കാരിക പരിപാടികൾ അരങ്ങേറുന്ന പൈതൃകക്കാഴ്ച വരെ ഒരുക്കിയാണ് ഇന്ത്യ ഫെസ്റ്റ് സംഘടിപ്പിച്ചത്.
ഇരുന്നൂറിലേറെ കലാകാരന്മാർ അണിനിരന്ന ഘോഷയാത്രയോടെ തുടങ്ങിയ മേള ഇന്ത്യൻ എംബസി കൗൺസിലർ രാജ മുരുഗൻ ഉദ്ഘാടനം ചെയ്തു. ഇന്ത്യയുടെ വൈവിധ്യങ്ങൾ നിറഞ്ഞ കലാരൂപങ്ങളും കടൽ കടന്നെത്തിയ കലാകാരൻമാരുടെ പ്രകടനങ്ങളും മേളയെ ആവേശം കൊള്ളിച്ചു. ഇന്ത്യയും യുഎഇയും തമ്മിലുള്ള ബന്ധം പ്രതിപാദിക്കുന്ന കലാസാംസ്കാരിക പരിപാടികൾ കാണാൻ മലയാളികളടക്കം ആയിരക്കണക്കിനു സന്ദർശകരാണെത്തിയത്.