മലയാള മനോരമ ഓട്ടോ എക്സ്പോയ്ക്ക് തുടക്കം; സംസ്ഥാനത്തെ വലിയ വാഹന പ്രദര്‍ശനം

വാഹനപ്രേമികള്‍ക്ക് ആവേശമായി മലയാള മനോരമ ഓട്ടോ എക്സ്പോയ്ക്ക് തുടക്കമായി. ദേശീയ കാര്‍ റേസിംഗ് താരമായ അര്‍ജുന്‍ ബാലു ഉദ്ഘാടനം നിര്‍വഹിച്ചു. അന്‍പതിലധികം ഓട്ടോമൊബെല്‍ ബ്രാന്‍ഡുകള്‍ പങ്കെടുക്കുന്ന പ്രദര്‍ശനം സംസ്ഥാനത്തെ ഏറ്റവും വലിയ വാഹന പ്രദര്‍ശനമാണ്. ആഡംബരക്കാറുകള്‍, ബൈക്കുകള്‍ , ഇലക്ട്രിക്ക് വാഹനങ്ങള്‍ , വിന്റേജ് കാറുകള്‍ തുടങ്ങിയവയാണ് പ്രദര്‍ശനത്തില്‍ ഒരുക്കിയിരിക്കുന്നത്. നെടുമ്പാശേരി സിയാല്‍ കണ്‍വന്‍ഷന്‍സെന്‍ററില്‍ ഞായറാഴ്ച വരെയാണ് എക്സ്പോ നടക്കുക . മലയാള മനോരമ ചീഫ് അസോസിയേറ്റ് എഡിറ്റര്‍ ആന്‍ഡ് ഡയറക്ടര്‍ റിയാദ് മാത്യു , ഫെഡറല്‍ ബാങ്ക് വൈസ് പ്രസിഡന്‍റ് ആന്‍ഡ് റീജണല്‍ ഹെഡ് എല്‍ദോസ് കുട്ടി കെ.എം തുടങ്ങിയവര്‍ പങ്കെടുത്തു. കോവിഡിന് ശേഷമെത്തുന്ന ഓട്ടോ എക്സ്പോ വലിയ ആവേശത്തോടെയാണ് സ്വീകരിക്കുന്നതെന്ന് കാര്‍ റേസിംഗ് താരം അര്‍ജുന്‍ ബാലു പറഞ്ഞു