വരണ്ട് കിടന്നോട്ടെ,പക്ഷേ പൊന്ന് വിളയിക്കും; കാട് കൃഷിയിടമാക്കി അനിൽകുമാർ

കാടുപിടിച്ച് ഉപയോഗശൂന്യമായ സ്ഥലങ്ങൾ ഏറ്റെടുത്ത് കൃഷിയോഗ്യ ഭൂമിയാക്കി മാറ്റുകയാണ് പന്തളം കുരമ്പാല സ്വദേശി അനിൽകുമാർ. രണ്ട് ഹൃദയശസ്ത്രക്രിയകൾക്ക് ശേഷവും കൃഷിയെ ജീവിത ദൗത്യമായി ഏറ്റെടുത്ത അനിൽകുമാർ, പരമാവധി കൃഷിഭൂമികൾ ഒരുക്കുക എന്നതാണ് തന്റെ ലക്ഷ്യമെന്നാണ് പറയുന്നത്.

പാരമ്പര്യമായി ലഭിച്ച കൃഷിവിജ്ഞാനം ഉപയോഗിച്ചാണ് അനിൽകുമാർ ഈ പ്രവർത്തനം മുന്നോട്ടുകൊണ്ടുപോകുന്നത്. കാടുപിടിച്ച് കിടക്കുന്ന സ്ഥലങ്ങളുടെ ഉടമകൾ ഇപ്പോൾ അനിൽകുമാറിനെ സമീപിക്കുന്നത് ഭൂമി വൃത്തിയാക്കി കൃഷിയിറക്കണമെന്ന ഒരേയൊരു ആവശ്യവുമായാണ്.

കൃഷിയിൽ താൽപര്യമുള്ള യുവാക്കൾക്ക് ഇത്തരം സ്ഥലങ്ങൾ ലഭ്യമാക്കി കൂടുതൽ പേരെ കാർഷിക മേഖലയിലേയ്ക്ക് എത്തിക്കണമെന്നാണ് അദ്ദേഹത്തിന്റെ അഭിപ്രായം. കൃഷിയിൽ കൂടുതൽ ശ്രദ്ധ കേന്ദ്രീകരിക്കാനായി പന്തളം എൻ.എസ്.എസ്. കോളേജിൽ നിന്നാണ് അനിൽകുമാർ വി.ആർ.എസ്. സ്വീകരിച്ചത്.

കൃഷിക്കൊപ്പം പടയണി വിനോദനാടകത്തിലെ പ്രമുഖ കലാകാരനെന്ന നിലയിലും അനിൽകുമാർ ശ്രദ്ധേയനാണ്.