ഹൃദയാരോഗ്യ സന്ദേശമുയർത്തി കോട്ടയത്ത് 'ഹൃദയതാളം' മെഗാ സൈക്ലത്തോൺ; പങ്കാളികളായത് 700 പേർ

ഹൃദയാരോഗ്യ സന്ദേശമുയർത്തി നടത്തുന്ന കോട്ടയം സൈക്ലത്തണിന് ഗംഭീര തുടക്കം. ഏഴു വയസ്സുകാരൻ മുതൽ 84 വയസ്സുള്ളവർ വരെ  അണി നിരന്ന സൈക്ലത്തൺ മലയാള മനോരമ, കാരിത്താസ് ആശുപത്രി, കോട്ടയം സൈക്ലിങ് ക്ലബ് എന്നിവർ ചേർന്നാണ് നടത്തുന്നത്. 100 മീറ്റർ റൈഡ് രാവിലെ 5.45ന് ചാണ്ടി ഉമ്മൻ എം.എൽഎ ഫ്ലാഗ് ഓഫ് ചെയ്തു. സൈക്കിൾ ചവിട്ടുന്നത് ഒരു സംസ്കാരമായി മാറണമെന്നും സൈക്കിൾ ഓടിക്കാൻ സൌകര്യത്തിന് നിരത്തുകളും മറ്റ് സജ്ജീകരണങ്ങളും ഭാവിയിൽ ഇവിടെ ഉണ്ടാകണമെന്നും അദ്ദേഹം പറഞ്ഞു. 

അഞ്ചുവർഷം കൊണ്ട് ഇന്ത്യ മുഴുവൻ സൈക്കിളിൽ സഞ്ചരിച്ച നവീൻ പോൾ  ഉൾപ്പെടെ 100 കിലോമീറ്റർ റൈഡിൽ പങ്കെടുക്കുന്നുണ്ട്. കോട്ടയം, പാമ്പാടി, കാഞ്ഞിരപ്പള്ളി, ഈരാറ്റുപേട്ട, ഭരണങ്ങാനം, പാലാ വഴി തിരികെ കാരിത്താസ് ഗ്രൗണ്ടിൽ സമാപിക്കുന്നതാണ് 100 കിലോമീറ്റർ റൈഡ്. 40 കിലോമീറ്റർ റൈഡ് രാവിലെ 6,15ന്  കോട്ടയം ജില്ലാ പൊലീസ് മേധാവി സാബു മാത്യു  ഫ്ലാഗ് ഓഫ് ചെയ്തു. ഏറ്റവും നല്ല വ്യായാമങ്ങളിൽ ഒന്നായ സൈക്ലിങ് എല്ലാവരും ജീവിതത്തിൽ ദിനചര്യയാക്കണമെന്ന് അദ്ദേഹം പറഞ്ഞു. 

കാരിത്താസ് ആശുപത്രിയിൽനിന്ന് കോട്ടയം, മണർകാട്, അയർക്കുന്നം, കിടങ്ങൂർ വഴി തിരിച്ചെത്തും. കുട്ടികളും വനിതകളും ഉൾപ്പെടെ പങ്കെടുക്കുന്ന 5 കിലോമീറ്റർ ഫൺ റൈഡ് രാവിലെ 7ന്  കലക്ടർ ചേതൻ കുമാർ മീണ ഫ്ലാഗ് ഓഫ് ചെയ്തു. സൈക്ലിങ് ദൂരം ക്രമമായി ഉയർത്തുന്നതു പോലെ ജീവിതത്തിലെ കഴിവുകൾ കണ്ടെത്തി വളർത്താൻ കഴിയട്ടെ എന്ന് കലക്ടർ പറഞ്ഞു. 

ലോക ഹൃദയദിനാചരണത്തിന്റെ ഭാഗമായി ‘ഹൃദയതാളം’ എന്ന പേരിലാണ് സൈക്ലത്തൺ സംഘടിപ്പിക്കുന്നത്. കാരിത്താസ് ആശുപത്രി ഡയറക്ടർ ഫാ. ബിനു കുന്നത്ത്, ഫാ. സൈജു പുത്തൻപറമ്പിൽ, കോട്ടയം സൈക്ലിങ് ക്ലബ് പ്രസിഡന്റ് ഡോ. ഫിയോണ ജോഷി, സെക്രട്ടറി ആൽബിൻ ഇമ്മാനുവേൽ, കോഓർഡിനേറ്റ‍ർമാരായ ചെറിയാൻ വർഗീസ് എന്നിവർ പ്രസംഗിച്ചു. നിരത്തുകളിലെ പോയിന്റുകളിൽ കുടിവെള്ള വിതരണത്തിനും വൈദ്യസഹായത്തിനും സൈക്കിൾ റിപ്പയറിനും ഉൾപ്പെടെയുള്ള ക്രമീകരണങ്ങൾ നടത്തിയിട്ടുണ്ട്. പങ്കെടുക്കുന്നവർക്ക് ഹൃദയതാളം മെഡൽ, ടി-ഷർട്ട് എന്നിവ സമ്മാനിച്ചു.