1886 ഒക്ടോബർ 29ന് ഒപ്പിട്ട പാട്ടക്കരാർ. 999 വർഷത്തേക്ക് ഭൂമിയും ജലാവകാശവും തമിഴ്നാടിന് കൈമാറിയ കരാർ. കാലം മാറി, സർക്കാരുകൾ മാറി. പക്ഷേ, മുല്ലപ്പെരിയാറിനെ ചൊല്ലിയുള്ള തർക്കങ്ങൾക്ക് മാത്രം അവസാനമായില്ല. അണക്കെട്ടിന്റെ സുരക്ഷയും ജലനിരപ്പും ചർച്ചയാകുമ്പോൾ കേരളവും തമിഴ്നാടും വീണ്ടും നേർക്കുനേർ.
മുല്ലപ്പെരിയാർ പാട്ടക്കരാറിന്റെ ചരിത്രവും തർക്കങ്ങളുടെ നാൾവഴികളും
999 വർഷത്തെ കരാർ; തുടക്കം 1886ൽ
കേരളവും തമിഴ്നാടും തമ്മിലുള്ള മുല്ലപ്പെരിയാർ തർക്കങ്ങളുടെ വേരുകൾ 19–ാം നൂറ്റാണ്ടിലേക്കാണ് നീളുന്നത്. 1886 ഒക്ടോബർ 29നാണ് തിരുവിതാംകൂർ നാട്ടുരാജ്യവും ബ്രിട്ടിഷ് ഇന്ത്യയിലെ മദ്രാസ് പ്രസിഡൻസിയും തമ്മിൽ മുല്ലപ്പെരിയാർ പാട്ടക്കരാർ ഒപ്പിട്ടത്. തിരുവിതാംകൂർ മഹാരാജാവിനുവേണ്ടി ദിവാൻ വി. രാമയ്യങ്കാറും ബ്രിട്ടിഷ് ഭരണകൂടത്തിനുവേണ്ടി മദ്രാസ് പ്രസിഡൻസിയിലെ ഉദ്യോഗസ്ഥരുമാണ് കരാറിൽ ഒപ്പിട്ടത്.
കൊടിയ വരൾച്ചയിൽ ദുരിതത്തിലായിരുന്ന തമിഴ്നാട്ടിലെ മധുര ഉൾപ്പെടെയുള്ള പ്രദേശങ്ങളിൽ ജലലഭ്യത ഉറപ്പാക്കുകയായിരുന്നു പദ്ധതിയുടെ ലക്ഷ്യം. പടിഞ്ഞാറോട്ട് ഒഴുകുന്ന പെരിയാർ നദിയിലെ വെള്ളം അണക്കെട്ടിലൂടെ കിഴക്കോട്ട് തിരിച്ചുവിട്ട് തമിഴ്നാട്ടിലെ വരണ്ട പ്രദേശങ്ങളിൽ എത്തിക്കാനുള്ള പദ്ധതിക്ക് ഇതോടെ വഴിതുറന്നു.
എന്നാൽ, കരാർ ഒപ്പിട്ട സാഹചര്യവും അതിന്റെ വ്യവസ്ഥകളും കാലക്രമത്തിൽ വലിയ രാഷ്ട്രീയ-നിയമ തർക്കങ്ങൾക്ക് വഴിവച്ചു. ബ്രിട്ടിഷ് ഭരണകൂടത്തിന്റെ സമ്മർദത്തിന് വഴങ്ങിയാണ് തിരുവിതാംകൂർ കരാറിൽ ഒപ്പിട്ടതെന്ന വിമർശനവും പിന്നീട് ശക്തമായി ഉയർന്നു.
പെന്നിക്വിക്കിന്റെ നേതൃത്വത്തിൽ അണക്കെട്ട് നിർമാണം
1887ലാണ് ബ്രിട്ടിഷ് എൻജിനീയർ കേണൽ ജോൺ പെന്നിക്വിക്കിന്റെ നേതൃത്വത്തിൽ അണക്കെട്ടിന്റെ നിർമാണം ആരംഭിച്ചത്. നിർമാണത്തിനിടെ പ്രകൃതിദുരന്തങ്ങളും പ്രതികൂല സാഹചര്യങ്ങളും വെല്ലുവിളിയായി. പലതവണ നിർമിതികൾ തകർന്നതോടെ ബ്രിട്ടിഷ് സർക്കാർ പദ്ധതിയിൽനിന്ന് പിന്മാറിയെങ്കിലും പെന്നിക്വിക്ക് ശ്രമം ഉപേക്ഷിച്ചില്ലെന്നാണ് ചരിത്രരേഖകളിൽ പറയുന്നത്.
ഇംഗ്ലണ്ടിലെ തന്റെ സ്വത്ത് വിറ്റുകിട്ടിയ പണം ഉപയോഗിച്ച് നിർമാണം പൂർത്തിയാക്കാൻ അദ്ദേഹം ശ്രമിച്ചുവെന്ന കഥയും മുല്ലപ്പെരിയാറിന്റെ ചരിത്രത്തിൽ ഏറെ പ്രസിദ്ധമാണ്.
1895 ഒക്ടോബർ 10ന് അണക്കെട്ടിൽനിന്ന് തമിഴ്നാട്ടിലേക്ക് വെള്ളം തുറന്നുവിട്ടു. പെരിയാർ നദിയിലെ വെള്ളം തമിഴ്നാട്ടിലെ വരണ്ട പ്രദേശങ്ങളിലെത്തിക്കുന്ന പദ്ധതി ഇതോടെ യാഥാർഥ്യമായി.
വൈദ്യുതോൽപാദനവും കരാർ പുതുക്കലും
1958ൽ കേരളത്തിന്റെ അനുമതിയില്ലാതെ കുമളി ലോവർ ക്യാംപിൽ മുല്ലപ്പെരിയാർ അണക്കെട്ടിലെ വെള്ളം ഉപയോഗിച്ച് തമിഴ്നാട് വൈദ്യുതോൽപാദനം ആരംഭിച്ചു. 1970ൽ കരാർ പുതുക്കിയതോടെയാണ് വൈദ്യുതോൽപാദനവുമായി ബന്ധപ്പെട്ട അനുമതി ഔദ്യോഗികമായത്. 1970 മേയ് 29ന് അന്നത്തെ മുഖ്യമന്ത്രി സി. അച്യുതമേനോന്റെ കാലത്താണ് 1886ലെ പാട്ടക്കരാർ പുതുക്കിയത്. കരാർ പുതുക്കിയതും അതിലെ വ്യവസ്ഥകളും പിന്നീട് കേരളത്തിൽ വലിയ രാഷ്ട്രീയ ചർച്ചകൾക്കും വിമർശനങ്ങൾക്കും വഴിവച്ചു.
1979ൽ സുരക്ഷാ ആശങ്ക; ജലനിരപ്പ് 136 അടിയായി
മുല്ലപ്പെരിയാർ തർക്കത്തിൽ നിർണായക വഴിത്തിരിവായത് 1979ലാണ്. അണക്കെട്ടിന് ബലക്ഷയമുണ്ടെന്ന വാർത്ത പുറത്തുവന്നതോടെ സുരക്ഷയെക്കുറിച്ചുള്ള ആശങ്കകൾ ശക്തമായി. അണക്കെട്ട് പരിശോധിച്ച കേന്ദ്ര ജലകമ്മീഷൻ ജലനിരപ്പ് 152 അടിയിൽനിന്ന് 136 അടിയായി കുറയ്ക്കാൻ നിർദേശിച്ചു. അണക്കെട്ടിന്റെ ബലപ്പെടുത്തലിനായി അടിയന്തരമായി നടപ്പാക്കേണ്ട പ്രവൃത്തികളും നിർദേശിച്ചു. ബലപ്പെടുത്തൽ ജോലികൾ പൂർത്തിയായശേഷം ജലനിരപ്പ് വീണ്ടും ഉയർത്തണമെന്ന ആവശ്യവുമായി തമിഴ്നാട് രംഗത്തെത്തി. അണക്കെട്ടിന്റെ സുരക്ഷയാണ് പ്രധാനമെന്ന് കേരളവും ജലലഭ്യത ഉറപ്പാക്കണമെന്ന നിലപാടിൽ തമിഴ്നാടും ഉറച്ചുനിന്നതോടെ തർക്കം കൂടുതൽ സങ്കീർണമായി.
സുപ്രീം കോടതിയിലേക്ക് 142 അടി
ജലനിരപ്പിനെ ചൊല്ലിയുള്ള തർക്കം ഒടുവിൽ സുപ്രീം കോടതിയിലെത്തി. അണക്കെട്ടിന്റെ സുരക്ഷയും ഇരുസംസ്ഥാനങ്ങളുടെയും വാദങ്ങളും പരിശോധിക്കാൻ 2010ൽ സുപ്രീം കോടതി മുൻ ചീഫ് ജസ്റ്റിസ് എ.എസ്. ആനന്ദിന്റെ നേതൃത്വത്തിൽ അഞ്ചംഗ എംപവേർഡ് കമ്മിറ്റിയെ നിയോഗിച്ചു. കമ്മിറ്റിയുടെ റിപ്പോർട്ടിന്റെ അടിസ്ഥാനത്തിൽ 2014ൽ സുപ്രീം കോടതി മുല്ലപ്പെരിയാർ അണക്കെട്ടിലെ ജലനിരപ്പ് 142 അടിയാക്കാൻ തമിഴ്നാടിന് അനുമതി നൽകി. അണക്കെട്ടിന്റെ പ്രവർത്തനങ്ങളും സുരക്ഷാ പരിശോധനകളും നിരീക്ഷിക്കുന്നതിനായി കേന്ദ്ര ജലകമ്മീഷൻ പ്രതിനിധി അധ്യക്ഷനായ മൂന്നംഗ സൂപ്പർവൈസറി കമ്മിറ്റിയും രൂപീകരിച്ചു. കേരളത്തിന്റെയും തമിഴ്നാടിന്റെയും പ്രതിനിധികൾ ഉൾപ്പെട്ട സമിതിയെ സഹായിക്കാൻ ഉപസമിതിയുമുണ്ടാക്കി.
എന്നാൽ, ജലനിരപ്പ് ഉയർത്തുന്നതിനെച്ചൊല്ലിയുള്ള ആശങ്കകൾക്കും സുരക്ഷ സംബന്ധിച്ച ചർച്ചകൾക്കും ഇതോടെ അവസാനമായില്ല. 2022ൽ മേൽനോട്ട സമിതിക്ക് കൂടുതൽ അധികാരങ്ങൾ 2022 ഏപ്രിലിൽ മുല്ലപ്പെരിയാർ മേൽനോട്ട സമിതിക്ക് സുപ്രീം കോടതി കൂടുതൽ അധികാരങ്ങൾ നൽകി. അണക്കെട്ടിന്റെ സുരക്ഷാ അറ്റകുറ്റപ്പണികൾ, ജലനിരപ്പ് നിയന്ത്രണം, പ്രളയ മുന്നറിയിപ്പ് സംവിധാനങ്ങൾ തുടങ്ങിയ കാര്യങ്ങളിൽ സമിതിയുടെ ഉത്തരവാദിത്തം വർധിപ്പിച്ചു. അണക്കെട്ടിന്റെ സുരക്ഷ വിലയിരുത്തുന്നതിനായി സമഗ്രമായ പരിശോധന നടത്തേണ്ടതിന്റെ ആവശ്യകതയും ഇതോടെ വീണ്ടും ചർച്ചയായി. ആധുനിക സാങ്കേതികവിദ്യകൾ ഉപയോഗിച്ചുള്ള സുരക്ഷാ അവലോകനവും ഇരുസംസ്ഥാനങ്ങളും തമ്മിലുള്ള ഏകോപനവും പ്രധാന വിഷയങ്ങളായി തുടർന്നു.
പുതിയ സുരക്ഷാ പരിശോധന; കേരളത്തിന് അതൃപ്തി
അണക്കെട്ടിന്റെ സുരക്ഷയെക്കുറിച്ചുള്ള തർക്കങ്ങൾക്കിടെ വിദഗ്ധസംഘം കഴിഞ്ഞ മാസം ആദ്യവാരം മുല്ലപ്പെരിയാറിൽ പരിശോധന നടത്തിയിരുന്നു. എന്നാൽ, പുതിയ സാങ്കേതികവിദ്യകൾ ഉപയോഗിച്ചുള്ള സമഗ്ര സുരക്ഷാ അവലോകനം നടന്നിട്ടില്ലെന്ന എതിർപ്പ് കേരളം സംഘത്തിന്റെ ചെയർമാനെ അറിയിച്ചിട്ടുണ്ട്.
പരിശോധനാ റിപ്പോർട്ട് ദേശീയ അണക്കെട്ട് സുരക്ഷാ അതോറിറ്റിക്ക് സമർപ്പിക്കുന്നതിനൊപ്പം കേരളം, തമിഴ്നാട് സർക്കാരുകൾക്കും കൈമാറുമെന്നാണ് അറിയിച്ചിട്ടുള്ളത്.
അണക്കെട്ടിന്റെ നിലവിലെ സുരക്ഷാ സ്ഥിതി സംബന്ധിച്ച വിലയിരുത്തലും തുടർനടപടികളും വരുംദിവസങ്ങളിൽ നിർണായകമാകും.
സർക്കാരുകൾ മാറി; നിലപാടുകളിൽ മാറ്റമുണ്ടോ?
തമിഴ്നാട്ടിൽ പുതിയ സർക്കാർ അധികാരത്തിലെത്തിയിട്ടും മുല്ലപ്പെരിയാർ വിഷയത്തിൽ സംസ്ഥാനത്തിന്റെ പരമ്പരാഗത നിലപാടിൽ മാറ്റമുണ്ടായിട്ടില്ലെന്നാണ് നിലവിലെ സാഹചര്യം സൂചിപ്പിക്കുന്നത്. ജലനിരപ്പ് ഉയർത്തണമെന്ന ആവശ്യത്തിൽ തമിഴ്നാട് ഉറച്ചുനിൽക്കുമ്പോൾ അണക്കെട്ടിന്റെ സുരക്ഷയുമായി ബന്ധപ്പെട്ട ആശങ്കകൾക്കാണ് കേരളം പ്രാധാന്യം നൽകുന്നത്. ഇരുസംസ്ഥാനങ്ങളിലെയും ജനങ്ങളുടെ താൽപര്യങ്ങളും സുരക്ഷാ ആശങ്കകളും ജലലഭ്യതയുടെ ആവശ്യകതയും ഒരുപോലെ പരിഗണിക്കേണ്ട വിഷയമാണിത്. കോടതി ഉത്തരവുകളും വിദഗ്ധസമിതികളുടെ പരിശോധനകളും തുടരുമ്പോഴും രാഷ്ട്രീയമായും നിയമപരമായും മുല്ലപ്പെരിയാർ തർക്കം സജീവമായി തുടരുന്നു.
140 വർഷം പിന്നിടുമ്പോഴും ഉത്തരം കിട്ടാത്ത ചോദ്യങ്ങൾ
1886ലെ പാട്ടക്കരാറിൽനിന്ന് ഇന്നത്തെ സുരക്ഷാ പരിശോധനകളിലേക്കുള്ള മുല്ലപ്പെരിയാറിന്റെ യാത്ര 140 വർഷം പിന്നിടുകയാണ്. കാലത്തിനനുസരിച്ച് ഭരണസംവിധാനങ്ങളും സാങ്കേതികവിദ്യകളും മാറിയെങ്കിലും അണക്കെട്ടിനെ ചൊല്ലിയുള്ള അടിസ്ഥാന തർക്കങ്ങൾക്ക് പരിഹാരമായിട്ടില്ല.
ജലനിരപ്പ് എത്രയാകണം? അണക്കെട്ടിന്റെ സുരക്ഷ എങ്ങനെ ഉറപ്പാക്കണം? കേരളത്തിന്റെയും തമിഴ്നാടിന്റെയും ആശങ്കകൾക്ക് എങ്ങനെ പരിഹാരം കണ്ടെത്തണം?
ഈ ചോദ്യങ്ങൾക്കുള്ള ഉത്തരങ്ങളാണ് മുല്ലപ്പെരിയാറിന്റെ ഭാവി നിർണയിക്കുക. 140 വർഷം പഴക്കമുള്ള കരാർ വീണ്ടും ചർച്ചയാകുമ്പോൾ, ചരിത്രത്തിന്റെ ഭാരം പേറുന്ന ഈ തർക്കത്തിൽ ശാശ്വത പരിഹാരം എപ്പോൾ എന്ന ചോദ്യം ഇന്നും ബാക്കിയാണ്.