supplyco-offer

ഫുട്ബോൾ ആരാധകർക്ക് ആവേശം പകരാൻ സോക്കർ ഇലവനുമായി സപ്ലൈകോ. ഫിഫ ലോകകപ്പിനോടനുബന്ധിച്ച് ഉപഭോക്താക്കൾക്കും ഫുട്ബോൾ ആരാധകർക്കുമായിട്ടാണ് പ്രത്യേക ഓഫർ പദ്ധതിയായ ‘സപ്ലൈകോ സോക്കർ ഇലവൻ’ നടപ്പിലാക്കുന്നത്. തിങ്കളാഴ്ച മുതൽ ആരംഭിക്കുന്ന ഈ പദ്ധതിയിലൂടെ ലോകകപ്പിലെ പ്രമുഖ 11 ടീമുകളെ സപ്ലൈകോയുടെ 11 ശബരി ഉൽപ്പന്നങ്ങളുമായി ബന്ധപ്പെടുത്തി ആകർഷകമായ വിലക്കിഴിവുകൾ നൽകും.

ഓരോ മത്സരത്തിലും ഒരു ടീം നേടുന്ന ഗോളുകളുടെ എണ്ണത്തിന് തുല്യമായ ശതമാനം വിലക്കിഴിവാണ് അതുമായി ബന്ധപ്പെടുത്തിയിരിക്കുന്ന ശബരി ഉൽപ്പന്നത്തിന് ലഭിക്കുക. ഉദാഹരണത്തിന്, ഒരു മത്സരത്തിൽ ബ്രസീൽ മൂന്ന് ഗോൾ നേടിയാൽ ശബരി മഞ്ഞൾപ്പൊടിക്ക് അടുത്ത മത്സരം ആരംഭിക്കുന്നതുവരെ മൂന്ന് ശതമാനം വിലക്കിഴിവ് ലഭിക്കും. ഷൂട്ടൗട്ടിൽ നേടുന്ന ഗോളുകൾ ഇതിനായി പരിഗണിക്കില്ല.

ഓരോ ടീമിന്റെയും വിലക്കിഴിവ് നിരക്ക് ആ ടീമിന്റെ അടുത്ത മത്സരം ആരംഭിക്കുന്നതുവരെ മാത്രമായിരിക്കും പ്രാബല്യത്തിൽ ഉണ്ടാകുക. തുടർന്ന് പുതിയ മത്സരത്തിലെ ഗോൾനേട്ടത്തിന്റെ അടിസ്ഥാനത്തിൽ വിലക്കിഴിവ് പുതുക്കി നിശ്ചയിക്കും. ഒരു ടീം ലോകകപ്പിൽ നിന്ന് പുറത്താകുന്ന ഘട്ടത്തിൽ അതുമായി ബന്ധപ്പെട്ട ഓഫറും അവസാനിക്കുന്നതാണ്.

ബ്രസീൽ, ജർമ്മനി, നെതർലാൻഡ്, സ്പെയിൻ, ബെൽജിയം, ഫ്രാൻസ്, അർജന്റീന, ഇംഗ്ലണ്ട്, പോർച്ചുഗൽ, ക്രൊയേഷ്യ, മൊറോക്കോ എന്നീ ടീമുകളാണ് ‘സപ്ലൈകോ ഇലവൻ’ പദ്ധതിയിൽ ഉൾപ്പെടുത്തിയിട്ടുള്ളത്. ടീമുകളുമായി ബന്ധപ്പെടുത്തിയിരിക്കുന്ന ശബരി ഉൽപ്പന്നങ്ങള്‍ ഇങ്ങനെ: 

  •  ബ്രസീൽ – ശബരി മഞ്ഞൾപ്പൊടി
  •  ജർമ്മനി – ശബരി അപ്പംപൊടി
  •  നെതർലാൻഡ് – ശബരി സാമ്പാർപ്പൊടി
  •  സ്പെയിൻ – ശബരി പുട്ടുപൊടി
  • അർജന്റീന – ശബരി  പായസം മിക്സ്
  • ബെൽജിയം – ശബരി സൂപ്പർ ഫൈൻ ഡസ്റ്റ് ടീ
  • പോർച്ചുഗൽ – ശബരി മുളകുപൊടി
  • ക്രൊയേഷ്യ – ശബരി വെളിച്ചെണ്ണ
  •  ഇംഗ്ലണ്ട് – ശബരി ഉപ്പ്
  •  മൊറോക്കോ – ശബരി ഹോട്ടൽ ബ്ലെൻഡ് ടീ
  • ഫ്രാൻസ് – ശബരി ഗോൾഡ് ടീ

ഈ 11 ടീമുകളിൽ ഏതെങ്കിലും ഒരു ടീം ലോകകപ്പ നേടുകയാണെങ്കിൽ ആ ടീമുമായി ബന്ധപ്പെടുത്തിയിരിക്കുന്ന ശബരി ഉൽപ്പന്നം ഉപഭോക്താക്കൾക്ക്  പ്രത്യേക അധിക വിലക്കുറവിൽ നൽകും. ലോകകപ്പ് ആവേശത്തെ ജനങ്ങളുടെ ദൈനംദിന ജീവിതവുമായി ബന്ധിപ്പിക്കുന്ന ഈ പ്രത്യേക ഓഫർ പദ്ധതി ഫുട്ബോൾ ആരാധകർക്കും ഉപഭോക്താക്കൾക്കും ഒരുപോലെ ആവേശകരമായ അനുഭവമാകുമെന്ന് സപ്ലൈകോ  മാനേജിംഗ് ഡയറക്ടർ അറിയിച്ചു. സപ്ലൈകോ വില്പനശാലകളിൽ നിലവിൽ ലഭ്യമായ വിലക്കുറവിന് പുറമേയാണ് ഈ വിലക്കിഴിവെന്നും സപ്ലൈകോ അറിയിച്ചു.

ENGLISH SUMMARY:

The Kerala State Civil Supplies Corporation, popularly known as Supplyco, has launched an innovative promotional campaign titled 'Supplyco Soccer Eleven' to celebrate the ongoing FIFA World Cup 2026. Beginning this coming Monday, the unique retail initiative dynamically links eleven prominent international football teams with eleven select in-house Sabari brand grocery products. Under this dynamic pricing scheme, the percentage of discount applied to a specific product will directly match the number of goals scored by its corresponding team in their latest match. For instance, if fan-favorite Brazil scores three goals in a game, the retail price of Sabari turmeric powder will automatically drop by three percent until their next fixture begins. Similar unique pairings include tying football giants Argentina to the Sabari payasam mix, Portugal to chili powder, and reigning contenders France to Sabari Gold Tea. According to the Supplyco Managing Director, these special tournament bonuses will act as cash-saving extensions over the existing subsidized price structures available across state-run supermarkets.

Related Articles