യൂട്യൂബ് ചാനൽ വഴി തനിക്കെതിരെ അടിസ്ഥാന രഹിതമായ ആരോപണങ്ങള് ഉന്നയിച്ച ഫസ്മിന സാക്കിറിനെതിരെ നിയമനടപടികൾ ആരംഭിക്കുമെന്ന് ഗായകന് അക്ബര് ഖാന്. ഫെയ്സ്ബുക്ക് പോസ്റ്റിലൂടെയാണ് അദ്ദേഹം ഇക്കാര്യം അറിയിച്ചത്. വിവാഹിതനായ അക്ബർ ഖാൻ ഡേറ്റിങ് ആപ്പായ ടിന്ററിൽ സജീവമാണെന്നും, അപരിചിതരായ പെൺകുട്ടികളുമായി ചാറ്റ് ചെയ്യുകയും ഫോൺ നമ്പർ കൈമാറുകയും ചെയ്യുന്നുണ്ടെന്നും പറഞ്ഞാണ് ഫസ്മിന യൂട്യൂബ് വിഡിയോ ചെയ്തത്.
ഒരു യൂട്യൂബ് ചാനൽ വഴി തൻ്റെ പേരിൽ തെറ്റായതും അടിസ്ഥാനരഹിതവും ആയ നിരവധി ആരോപണങ്ങൾ ഉന്നയിച്ചുകൊണ്ട് വീഡിയോ പ്രസിദ്ധീകരിച്ചിരിക്കുന്നതായി എൻ്റെ ശ്രദ്ധയിൽപ്പെട്ടിരിക്കുന്നു. ചില ഔദ്യോഗിക, പരിപാടികൾക്കായി ഞാൻ ഖത്തറിൽ ആയതുകൊണ്ടാണ് എന്റെ പ്രതികരണം വൈകിയത്.
ഞാൻ ഈ വിഷയത്തിൽ നിയമനടപടികൾ ആരംഭിക്കാൻ തീരുമാനിച്ചിരിക്കുന്നു. സോഷ്യൽ മീഡിയ പ്ലാറ്റ്ഫോമുകളിൽ അഭിപ്രായപ്രകടനത്തിൻ്റെയും സ്വാതന്ത്ര്യത്തിന്റെയും പേരിൽ ആരും മറ്റൊരാളുടെ പ്രതിഷ്ഠയെയും വ്യക്തിത്വത്തെയും ഹനിക്കുന്ന തരത്തിലുള്ള അപകീർത്തികരമായ പ്രസ്താവനകൾ നടത്താൻ അധികാരമുള്ളവരല്ലെന്നത് മനസ്സിലാക്കുക. നിയമപരമായ പ്രക്രിയയിലൂടെ ബന്ധപ്പെട്ട വ്യക്തികളോട്, അവർ ആരോപിക്കുന്നതുപോലെ, ഞാൻ ചെയ്തുവെന്നു പറയുന്ന ഏതെങ്കിലും "മോശമായ" പ്രസ്താവനയോ പ്രവർത്തിയോ എന്താണെന്ന് തെളിയിക്കണമെന്നാവശ്യപ്പെടും. സത്യാവസ്ഥ തെളിയിക്കപ്പെടുമെന്നും നിയമ വ്യവസ്ഥ ഈ വിഷയത്തിൽ അനുയോജ്യമായ വിധിനിർണയം നടത്തുമെന്നും ഞാൻ വിശ്വസിക്കുന്നു. – ഗായകന് അക്ബര് ഖാന് ഫെയ്സ്ബുക്കില് കുറിച്ചു.
അക്ബര് ഖാന്റെ പോസ്റ്റിന് താഴെ ഗായകനെ അനുകൂലിച്ച് നിരവധി പേരാണ് രംഗത്തെത്തിയത്. തെറ്റ് ചെയ്തിട്ടില്ലെങ്കില് പെണ്കുട്ടിക്കെതിരെ നിയമനടപടി സ്വീകരിക്കണമെന്നാണ് ഭൂരിഭാഗം പേരും പറയുന്നത്.