സുരേഷ് ബാബുവിനെതിരെ ലൈംഗികച്ചുവയുള്ള വാട്സാപ്പ് ചാറ്റുള്‍പ്പടെ തെളിവ്; പരാതിക്കാരിയെ അനുനയിപ്പിക്കാന്‍ സിപിഎം

സിപിഎം പാലക്കാട് മുൻ ജില്ലാ സെക്രട്ടറി ഇ.എൻ.സുരേഷ് ബാബുവിന് എതിരായ സംഘടനാ നടപടി വൈകിയേക്കും. തെറ്റുതിരുത്തലിനുള്ള വിശാല ജില്ലാ കമ്മിറ്റി യോഗങ്ങൾ പൂർത്തിയായ ശേഷമാകും സുരേഷ് ബാബുവിന് എതിരായ പരാതി സംസ്ഥാന കമ്മിറ്റിയിൽ വരിക. അതേസമയം, നടപടി ഉറപ്പ് നൽകി, പരാതിക്കാരിയായ അഭിഭാഷകയെ അനുനയിപ്പിക്കാനുള്ള നീക്കത്തിലാണ് പാർട്ടി നേതൃത്വം. വിശാല ജില്ലാ കമ്മിറ്റി യോഗത്തിനിടെ യുവതി എം.വി.ഗോവിന്ദനുമായി കൂടികാഴ്ച നടത്തിയിരുന്നു. ലൈംഗിക ചുവയോടെ തന്നെ സമീപിച്ച സുരേഷ് ബാബുവിന് എതിരെ വാട്സാപ്പ് ചാറ്റുകളും വിഡിയോ കോൾ റെക്കോർഡും ഉൾപ്പെടെയുള്ള നിരവധി തെളിവുകളാണ് യുവതി നൽകിയിട്ടുള്ളത്. Also Read: നേതാക്കളുടെ സാന്നിധ്യത്തില്‍ പരാതി വായിച്ചുകേള്‍പ്പിച്ചു; സുരേഷ് ബാബു തെറിച്ചു; ‘ഓപ്പറേഷന്‍ പിണറായി’

സംഘടനാ സമ്മേളനത്തില്‍ പങ്കെടുക്കാന്‍ എത്തിയപ്പോള്‍ പാര്‍ട്ടി ഓഫിസില്‍ വച്ചാണ് സുരേഷ്ബാബുവില്‍ നിന്നും വനിതാ നേതാവിന് ദുരനുഭവം ഉണ്ടായത്. ഒരു വര്‍ഷത്തോളമായി ഫോണിലും ശല്യപ്പെടുത്തിയിരുന്നുവെന്ന് യുവതി പറയുന്നു. പാര്‍ട്ടി നടപടിയെടുത്തില്ലെങ്കില്‍ നിയമ നടപടി സ്വീകരിക്കുമെന്ന് അഭിഭാഷകയായ ഇവര്‍ വ്യക്തമാക്കിയതോടെയാണ് ജില്ലാ സെക്രട്ടറി സ്ഥാനം സുരേഷ് ബാബുവിന് ഒഴിയേണ്ടി വന്നത്. 

യുവതിയുടെ പരാതി ഗൗരവമേറിയതാണെന്ന് വിലയിരുത്തിയ മുതിര്‍ന്ന നേതാക്കള്‍ സ്ഥാനമൊഴിയാന്‍ നിര്‍ദേശിക്കുകയായിരുന്നു. മലപ്പുറത്തേക്ക് സുരേഷ് ബാബുവിനെ പിണറായി വിജയന്‍ ഇടപെട്ടാണ് വിളിച്ചുവരുത്തിയതെന്നാണ് വിവരം. നേതാക്കളുടെ സാന്നിധ്യത്തില്‍ പരാതി വായിച്ചു കേള്‍പ്പിച്ച ശേഷം ജില്ലാ സെക്രട്ടറിസ്ഥാനത്ത് നിന്നൊഴിയാന്‍ ആവശ്യപ്പെടുകയായിരുന്നു. സുരേഷ് ബാബുവിനെതിരെ കടുത്ത നടപടി വരുമെന്നും പാര്‍ട്ടി അംഗത്വത്തില്‍ നിന്ന് പുറത്താക്കിയേക്കുമെന്നും വാര്‍ത്തകള്‍ വന്നിരുന്നുവെങ്കിലും പിന്നീട് നിലപാട് മയപ്പെടുത്തിയെന്നാണ് സൂചന. മുന്‍ എംഎല്‍എയായ വി. ചെന്താമരാക്ഷനാണ് പുതിയ ജില്ലാ സെക്രട്ടറി.