‘പരസ്യ ചര്‍ച്ചകള്‍ മോശം സന്ദേശം നല്‍കും; ഹൈക്കമാന്‍ഡ് ഇടപെടുമെന്ന് പ്രതീക്ഷ’’

നിയമസഭാ തിരഞ്ഞെടുപ്പ് ഫലം വരുന്നതിന് മുൻപേ കോൺഗ്രസിൽ ആരംഭിച്ച മുഖ്യമന്ത്രി ചർച്ചകളിൽ കടുത്ത അതൃപ്തി രേഖപ്പെടുത്തി മുസ്ലിം ലീഗ് രംഗത്ത്. ഇത്തരം പരസ്യ പ്രതികരണങ്ങൾ വോട്ടർമാർക്കിടയിലും അണികൾക്കിടയിലും തെറ്റായ സന്ദേശം നല്‍കുമെന്ന് സാദിഖലി തങ്ങളും പി.കെ.കുഞ്ഞാലിക്കുട്ടിയും മനോരമ ന്യൂസിനോട് പറഞ്ഞു. 

തിരഞ്ഞെടുപ്പ് ഫലം മെയ് നാലിന് വരാനിരിക്കെ, അതിന് മുൻപേ നടത്തുന്ന അവകാശവാദങ്ങൾക്കും വാക്പോരുകൾക്കും യാതൊരു വിലയുമില്ലെന്ന് നേതാക്കൾ പറഞ്ഞു. കെ. സുധാകരൻ ഉൾപ്പെടെയുള്ള നേതാക്കൾ മുഖ്യമന്ത്രി സ്ഥാനത്തെ ചൊല്ലി നടത്തുന്ന പ്രസ്താവനകൾ മുന്നണിയുടെ കെട്ടുറപ്പിനെ ബാധിക്കുമെന്നാണ് ലീഗിന്റെ വിലയിരുത്തൽ.

"കോൺഗ്രസിൽ ഒരുപാട് നേതാക്കൾ ഉള്ളത് സ്വാഭാവികമാണ്. എന്നാൽ നേതാക്കളല്ല, അവരുടെ അണികളാണ് ഇപ്പോൾ ഇത്തരം ചർച്ചകൾക്ക് പിന്നിൽ. ഇത് പൊതുസമൂഹത്തിന് മുന്നിൽ മുന്നണിയെക്കുറിച്ച് മോശം ചിത്രം നൽകുന്നു. ഇത്തരം പ്രവണതകൾ അവസാനിപ്പിക്കാൻ ഹൈക്കമാൻഡ് ഉചിതമായ തീരുമാനമെടുക്കുമെന്നാണ് ഞങ്ങൾ കരുതുന്നത്," പി.കെ. കുഞ്ഞാലിക്കുട്ടി പറഞ്ഞു. തിരഞ്ഞെടുപ്പ് ഫലം വന്ന ശേഷം ഭൂരിപക്ഷം ലഭിക്കുമ്പോള്‍  മാത്രം എല്ലാ ഘടകകക്ഷികളും ചേർന്ന് ഗൗരവമായ ചർച്ചകളിലൂടെ തീരുമാനമെടുക്കേണ്ട കാര്യമാണിതെന്നും അവർ കൂട്ടിച്ചേർത്തു.

മുന്നണി അധികാരത്തിൽ വന്നാൽ ലീഗ് ഉപമുഖ്യമന്ത്രി സ്ഥാനം ആവശ്യപ്പെടുമെന്ന തരത്തിലുള്ള പ്രചാരണങ്ങളെയും നേതാക്കൾ തള്ളി. അത്തരമൊരു അവകാശവാദം തങ്ങൾ ഉന്നയിച്ചിട്ടില്ലെന്നും യുഡിഎഫിനെ അധികാരത്തിലെത്തിച്ച് മതേതര സർക്കാർ രൂപീകരിക്കുക എന്നത് മാത്രമാണ് നിലവിലെ ലക്ഷ്യമെന്നും അവർ വ്യക്തമാക്കി. "അഞ്ചാം മന്ത്രി" വിവാദം പോലുള്ള പഴയ കാര്യങ്ങൾ ഉയർത്തിക്കാട്ടി ലീഗ് മേധാവിത്വം നേടുമെന്ന തരത്തിൽ പ്രതിപക്ഷം നടത്തുന്ന വിമർശനങ്ങളിൽ അടിസ്ഥാനമില്ലെന്ന് സാദിഖലി തങ്ങൾ പറഞ്ഞു. മതേതര ജനാധിപത്യ മൂല്യങ്ങൾ ഉയർത്തിപ്പിടിച്ചാണ് ലീഗ് പ്രവർത്തിക്കുന്നത്. ഏതെങ്കിലും ഒരു വിഭാഗത്തിന് മേൽക്കൈ നേടുക എന്നത് പാർട്ടിയുടെ ലക്ഷ്യമല്ലെന്നും ലീഗിനെ ആരും പേടിക്കേണ്ടതില്ലെന്നും അദ്ദേഹം ആവർത്തിച്ചു.

കോൺഗ്രസിനുള്ളിലെ അധികാര തർക്കം മുന്നണിയുടെ വിജയസാധ്യതയെ ബാധിക്കുമോ എന്ന ആശങ്ക നിലനിൽക്കെയാണ് ലീഗിന്റെ ഈ പരസ്യമായ നിലപാട് മാറ്റം. കെ.സി. വേണുഗോപാലിനെ പിന്തുണച്ച് ചില നേതാക്കൾ രംഗത്തെത്തിയത് ഗ്രൂപ്പ് പോര് വീണ്ടും സജീവമാക്കിയിരുന്നു. ഈ സാഹചര്യത്തിൽ ഹൈക്കമാൻഡ് കർശന നിർദ്ദേശം നൽകി ചർച്ചകൾക്ക് തടയിടണമെന്നാണ് യുഡിഎഫിലെ രണ്ടാമത്തെ വലിയ കക്ഷിയായ മുസ്ലിം ലീഗ് ആവശ്യപ്പെടുന്നത്.