അരിവിലയ്ക്ക് പിന്നാലെ ഉള്ളിവിലയും കുതിക്കുന്നു; അടുക്കള ബജറ്റ് താളംതെറ്റുന്നു

അരിവിലയ്ക്ക് പിന്നാലെ സവാളയുടെയും ചെറിയ ഉള്ളിയുടെയും വില സംസ്ഥാനത്ത് കുതിച്ചുയരുന്നു. ഒരു മാസം മുൻപ് കിലോയ്ക്ക് 30 രൂപയായിരുന്ന സവാളയ്ക്ക് ഇപ്പോൾ 60 രൂപ നൽകണം. ചെറിയ ഉള്ളിയുടെ വിലയാകട്ടെ കിലോയ്ക്ക് 160 രൂപയിലുമെത്തി. വിലക്കയറ്റം സാധാരണ കുടുംബങ്ങളുടെ അടുക്കള ബജറ്റിനൊപ്പം ഹോട്ടൽ മേഖലയുടെയും കണക്കുകൂട്ടലുകൾ തെറ്റിക്കുകയാണ്. Also Read: നിയന്ത്രണ രേഖയ്ക്കരികെ സൈനികാഭ്യാസത്തിന് തയാറെടുത്ത് വ്യോമസേന; നോട്ടാം പ്രഖ്യാപിച്ചു

വീടുകളിലും ഹോട്ടലുകളിലും ഉള്ളിയുടെ ഉപയോഗം കുറയ്ക്കേണ്ട സ്ഥിതിയാണ് വിലക്കയറ്റം സൃഷ്ടിക്കുന്നത്. സവാളയ്ക്ക് കിലോയ്ക്ക് 60 രൂപയായപ്പോൾ ചെറിയ ഉള്ളിയുടെ വില 160 രൂപയിലേക്ക് കുതിച്ചു. ദിവസേനയുള്ള പാചകത്തിൽ ഒഴിവാക്കാനാകാത്ത ചേരുവകളുടെ വില ഇങ്ങനെ ഉയരുന്നത് വലിയ സാമ്പത്തിക ബാധ്യതയാകുകയാണെന്ന് ഹോട്ടല്‍ രംഗത്തുള്ളവരും പറയുന്നു.

ഓണത്തിന് ശേഷം സവാളയുടെയും ചെറിയ ഉള്ളിയുടെയും വിലയിൽ കാര്യമായ കുറവുണ്ടായിട്ടില്ലെന്നാണ് വ്യാപാരികൾ പറയുന്നത്. മൊത്തവിൽപ്പന വിപണിയിൽ സവാളയ്ക്ക് കിലോയ്ക്ക് 50 രൂപയാണ് വില. ചില്ലറ വിപണിയിലെത്തുമ്പോൾ ഇത് 60 രൂപയാകുന്നു. ചെറിയ ഉള്ളിയുടെ കാര്യത്തിലും മൊത്തവിൽപ്പനയും ചില്ലറ വിൽപ്പനയും തമ്മിൽ കിലോയ്ക്ക് പത്തുരൂപയുടെ വ്യത്യാസമുണ്ട്. മഹാരാഷ്ട്രയിലെ നാസിക്കിൽനിന്നുള്ള സവാളയുടെ വരവ് കുറഞ്ഞതാണ് വില ഉയരാൻ പ്രധാന കാരണമെന്നാണ് വ്യാപാരികൾ ചൂണ്ടിക്കാട്ടുന്നത്.