ഓട്ടോ–ടാക്‌സി നിരക്ക് വർധിപ്പിക്കുമെന്ന് സംസ്ഥാന സർക്കാർ. ജനുവരി ഒന്ന് മുതൽ പുതുക്കിയ നിരക്ക് പ്രാബല്യത്തിൽ വരും. നിരക്ക് പരിഷ്‌കരണം ആവശ്യപ്പെട്ട് പണിമുടക്ക് പ്രഖ്യാപിച്ച തൊഴിലാളി യൂണിയനുകളുമായി ഗതാഗതമന്ത്രി സി.പി. ജോൺ നടത്തിയ ചർച്ചയിലാണ് തീരുമാനം. Also Read: വിദ്യാർഥികളെ 60 ദിവസം പുറത്താക്കിയത് പോരേ?, ഇനിയെന്ത് മാപ്പപേക്ഷ: ഹൈക്കോടതി
നിരക്ക് വർധന സംബന്ധിച്ച് പഠനം നടത്തി ശുപാർശ സമർപ്പിക്കുന്നതിനായി കമ്മിഷനെ നിയോഗിക്കുമെന്ന് മന്ത്രി യൂണിയൻ പ്രതിനിധികൾക്ക് ഉറപ്പുനൽകി. കൂടാതെ, അസംഘടിത മേഖലയിൽ പ്രവർത്തിക്കുന്ന ഓട്ടോറിക്ഷ–ടാക്‌സി തൊഴിലാളികൾക്ക് ഇ.എസ്.ഐ പരിരക്ഷ ഏർപ്പെടുത്തുന്ന കാര്യവും പരിഗണിക്കുമെന്ന് അറിയിച്ചു.
ഓട്ടോറിക്ഷകളുടെ മിനിമം ചാർജ് നിലവിലെ 30 രൂപയിൽ നിന്ന് 50 രൂപയായും ടാക്‌സികളുടെ മിനിമം നിരക്ക് 250 രൂപയിൽ നിന്ന് 300 രൂപയായും ഉയർത്തണമെന്നാണ് യൂണിയനുകളുടെ പ്രധാന ആവശ്യം. നിരക്ക് പരിഷ്‌കരണം ആവശ്യപ്പെട്ട് വിവിധ ട്രേഡ് യൂണിയനുകൾ നേരത്തെ സർക്കാരിന് നിവേദനം നൽകിയിരുന്നു.
തുടർന്ന് ട്രാൻസ്‌പോർട്ട് കമ്മിഷണറുടെ നേതൃത്വത്തിൽ ചർച്ചകൾ നടന്നെങ്കിലും തീരുമാനത്തിലെത്തിയിരുന്നില്ല. ഇതിൽ പ്രതിഷേധിച്ചാണ് 24 മണിക്കൂർ പണിമുടക്ക് പ്രഖ്യാപിച്ചത്. എന്നാൽ, സർക്കാരിന്റെ ഉറപ്പുകൾ പരിഗണിച്ച് പണിമുടക്ക് പിൻവലിക്കാൻ യൂണിയനുകൾ തീരുമാനിക്കുകയായിരുന്നു.