കേരളത്തിലേക്കുള്ള യാത്ര രക്ഷിതാക്കള്‍ അറിഞ്ഞില്ല?; 8 പേരും അപകടസ്ഥലത്തുതന്നെ മരിച്ചു

തൃശൂർ കയ്പമംഗലത്ത് ദേശീയപാതയിൽ നിർത്തിയിട്ടിരുന്ന ചരക്കുലോറിക്കു പിന്നിൽ കാറിടിച്ച് വൻ ദുരന്തം. അപകടത്തിൽ തമിഴ്നാട്ടിലെ ദിണ്ഡിഗൽ പിഎസ്എൻഎ എൻജിനീയറിങ് ആൻഡ് ടെക്നോളജി കോളജിലെ ഏഴ് വിദ്യാർഥികളും കാർ ഡ്രൈവറും ഉൾപ്പെടെ എട്ടുപേർ തൽക്ഷണം മരിച്ചു. വെള്ളിയാഴ്ച രാത്രി പതിനൊന്ന് മുക്കാലോടെ കയ്പമംഗലം പനമ്പിക്കുന്ന് സെന്ററിനു സമീപമായിരുന്നു അപകടം. 

വാരാന്ത്യ അവധി ആഘോഷിക്കാനോ സുഹൃത്തുക്കളെ കാണാനോ ആയി കേരളത്തിലേക്ക് വന്നതായിരുന്നു ഇവരെന്നാണ് പ്രാഥമിക നിഗമനം. അപകടവിവരമറിഞ്ഞ് ബന്ധപ്പെട്ടവരുടെ രക്ഷിതാക്കളെ പൊലീസ് ഫോണിൽ വിവരമറിയിച്ചെങ്കിലും കുട്ടികൾ കേരളത്തിലേക്ക് യാത്ര തിരിച്ചു എന്ന കാര്യം തങ്ങൾക്ക് അറിയില്ലായിരുന്നുവെന്നാണ് കുടുംബാംഗങ്ങൾ പ്രതികരിച്ചത്.

നിർമാണം പുരോഗമിക്കുന്ന ദേശീയപാതയിലെ ഡൈവേർഷൻ ഭാഗത്ത് നിർത്തിയിട്ടിരുന്ന ലോറിയിലേക്ക് തമിഴ്നാട് റജിസ്ട്രേഷനിലുള്ള കാർ അതിവേഗത്തിൽ ഇടിച്ചുകയറുകയായിരുന്നു. ഇടിയുടെ ആഘാതത്തിൽ പൂർണമായും തകർന്ന കാർ വെട്ടിപ്പൊളിച്ചാണ് ഉള്ളിലുണ്ടായിരുന്ന എട്ടുപേരെയും പുറത്തെടുത്തത്.

മരിച്ചവരിൽ ദിണ്ഡിഗൽ സ്വദേശികളായ സൂര്യ, യുവസഞ്ജിത്, മധുര സ്വദേശികളായ പ്രസന്ന, സന്തോഷ്, സേലം സ്വദേശി വിശ്വ എന്നിവരെ കാറിൽനിന്ന് ലഭിച്ച ഐഡി കാർഡുകളുടെ അടിസ്ഥാനത്തിൽ തിരിച്ചറിഞ്ഞിട്ടുണ്ട്. 20-ഉം 21-ഉം വയസ്സ് പ്രായമുള്ളവരാണ് അപകടത്തിൽപ്പെട്ട വിദ്യാർഥികൾ. 

ദേശീയപാതയിൽ ആവശ്യത്തിന് വെളിച്ചമോ വ്യക്തമായ ദിശാബോർഡുകളോ ഇല്ലാതെ ചരക്കുലോറി നിർത്തിയിട്ടിരുന്നതാണ് അപകടത്തിന്റെ തീവ്രത വർധിപ്പിച്ചതെന്ന് കൊടുങ്ങല്ലൂർ ഡിവൈഎസ്പി രതീഷ് കുമാർ അറിയിച്ചു. സുഗമമായ യാത്ര ഉറപ്പാക്കുന്ന വിശാലമായ പാതയിലൂടെ മണിക്കൂറിൽ 100 കിലോമീറ്ററിലധികം വേഗത്തിലെത്തിയ കാറിന്, ഡൈവേർഷൻ സൂചിപ്പിക്കുന്ന ബോർഡിന് തൊട്ടുമുന്നിലായി പാർക്ക് ചെയ്തിരുന്ന ലോറിയെ പെട്ടെന്ന് തിരിച്ചറിയാൻ സാധിച്ചില്ല. 

റോഡ് നിർമാണ മേഖലകളിൽ യാതൊരുവിധ മുൻകരുതലുകളുമില്ലാതെ വാഹനങ്ങൾ അലക്ഷ്യമായി നിർത്തിയിടുന്ന പ്രവണത പ്രദേശത്ത് പതിവാണെന്ന് നാട്ടുകാരും ആരോപിക്കുന്നു. അപകടത്തെക്കുറിച്ച് സമഗ്രമായ അന്വേഷണം നടത്തുമെന്ന് അധികൃതർ ഉറപ്പുനൽകിയിട്ടുണ്ട്. മൃതദേഹങ്ങൾ തൃശൂർ മെഡിക്കൽ കോളജ് ആശുപത്രി മോർച്ചറിയിലേക്ക് മാറ്റി.