ദേശാഭിമാനിയിലെ ‘കള്ളൻ വിജയൻ’ വിവാദത്തിൽ നടപടി; കെ.ആർ.അജയനെ വാരാന്തപ്പതിപ്പ് ചുമതലയിൽനിന്ന് നീക്കി

ദേശാഭിമാനി വാരാന്തപ്പതിപ്പിലെ ‘കള്ളന്‍ വിജയന്‍’ ലേഖനവിവാദത്തില്‍ നടപടി. കെ.ആര്‍. അജയനെ വാരാന്തപ്പതിപ്പിന്റെ ചുമതലയില്‍ നിന്ന് നീക്കി. ടി ചന്ദ്രമോഹനാണ് പകരം ചുമതല. വാരാന്തപ്പതിപ്പിന്റെ ആദ്യ പേജിൽ അനുസ്മരണ ലേഖനവും അവസാന പേജിൽ വിവാദ ശീർഷകത്തിലുള്ള നാടകപ്രവർത്തകനെക്കുറിച്ചുള്ള ലേഖനവും പ്രസിദ്ധീകരിക്കാനായിരുന്നു തീരുമാനം. തലക്കെട്ട് തെറ്റായി വ്യാഖ്യാനിക്കപ്പെടാമെന്ന ആശങ്ക എഡിറ്റോറിയൽ ചർച്ചയിൽ ഉയർന്നതോടെ പതിപ്പ് അച്ചടിക്കാതെ മാറ്റിവെക്കുകയും പിന്നീട് വിവാദ ലേഖനം ഒഴിവാക്കുകയും ചെയ്തു. 

ലേഖനം പ്രസിദ്ധീകരിക്കണമെന്നും തലക്കെട്ട് ഉചിതമാണെന്നും ഉള്ളടക്കം പാർട്ടി വിരുദ്ധമല്ലെന്നും വാരാന്തപ്പതിപ്പ് എഡിറ്റർ കെ.ആര്‍. അജയന്‍ വിശദീകരണത്തിൽ നിലപാട് അറിയിച്ചു. വിവരം പുറത്തുപോയതുമായി ബന്ധപ്പെട്ട മാനേജ്മെന്റ് വിലയിരുത്തലിനുശേഷം വിശദീകരണം തള്ളി ചുമതലയിൽ നിന്ന് നീക്കാൻ എഡിറ്റോറിയൽ ബോർഡ് തീരുമാനിച്ചു. പകരം ചുമതല മറ്റൊരാൾക്ക് നൽകി. എഡിറ്ററുടെ മുറി പൂട്ടി താക്കോൽ മാനേജ്മെന്റ് കൈവശം വെച്ചതായും അദ്ദേഹം ഓഫീസിലെത്തിയില്ലെന്നും വ്യക്തമാക്കുന്നു.

സംഭവത്തെച്ചൊല്ലി സ്ഥാപനത്തിനകത്ത് ഭിന്നതയുണ്ടെന്നും പാർട്ടി നേതൃത്വത്തിന്റെ അനുമതിയോടെയാകാം നടപടിയെന്നും ചർച്ചയിൽ വിലയിരുത്തി. പാർട്ടി പത്രത്തിൽ തെറ്റിദ്ധാരണയ്ക്ക് ഇടയാക്കാവുന്ന ശീർഷകം ഒഴിവാക്കേണ്ടതായിരുന്നുവെന്നും നടപടി ഒഴിവാക്കാനാകാത്ത ഘട്ടത്തിലെത്തിയെന്നും  സെബാസ്റ്റ്യന്‍ പോള്‍ പ്രതികരിച്ചു.