‘പിഎം ശ്രീ നടപ്പാക്കാതിരിക്കാനാണോ നിങ്ങള്‍ ഒപ്പിട്ടത്’; സഭയിൽ ചൂടേറിയ ചർച്ച

പിഎം ശ്രീ (PM-SHRI) സ്കൂൾ പദ്ധതി കേരളത്തിൽ നടപ്പാക്കുന്നതുമായി ബന്ധപ്പെട്ട് നിയമസഭയിൽ ഭരണ-പ്രതിപക്ഷ നേതാക്കൾ തമ്മിൽ കടുത്ത വാക്പോര്. എൽ.ഡി.എഫ് ഭരണകാലത്ത് ആർ.എസ്.എസ് (RSS) അജണ്ടയെന്ന് വിളിച്ച് ആക്ഷേപിച്ച പദ്ധതിയുടെ ധാരണാപത്രത്തിൽ ഒപ്പുവെച്ചത് ഇടതുപക്ഷ സർക്കാരാണെന്ന് മുഖ്യമന്ത്രി വി.ഡി. സതീശൻ. എന്നാൽ, സർവ്വശിക്ഷാ അഭിയാൻ (SSA) ഫണ്ട് തടഞ്ഞുവെച്ചതിനെത്തുടർന്ന് പണത്തിന് വേണ്ടിയാണ് അന്ന് ഒപ്പിട്ടതെന്നും പിന്നീട് അത് തെറ്റായ ശ്രമമാണെന്ന് കണ്ട് മരവിപ്പിച്ചതാണെന്നും പ്രതിപക്ഷ നേതാവ് പിണറായി വിജയൻ വ്യക്തമാക്കി.

പ്രതിപക്ഷ നേതാവ് പിണറായി വിജയൻ മുൻ ഇടതുപക്ഷ സർക്കാരിന്റെ നയം വ്യക്തമാക്കിക്കൊണ്ടാണ് ഭരണപക്ഷത്തെ നേരിട്ടത്. കേന്ദ്ര സർക്കാർ കേരളത്തിനുള്ള സർവ്വശിക്ഷാ അഭിയാന്റെ 1,500 കോടിയിലധികം രൂപയുടെ ഫണ്ട് തടഞ്ഞുവെച്ചപ്പോഴാണ് പിഎം ശ്രീ പദ്ധതിയുടെ പ്രാഥമിക ധാരണാപത്രത്തിൽ ഒപ്പിട്ടത്. ആ പണം വാങ്ങിയില്ലെങ്കിൽ കേരളത്തിലെ പൊതുവിദ്യാഭ്യാസ മേഖല വലിയ പ്രയാസത്തിലാകുമായിരുന്നു. ഫണ്ട് ലക്ഷ്യമിട്ട് ഒപ്പിട്ടെങ്കിലും ആ ശ്രമം ശരിയല്ലെന്ന് പിന്നീട് എൽ.ഡി.എഫ് തീരുമാനിക്കുകയും പദ്ധതി മരവിപ്പിക്കുകയുമായിരുന്നു. പുതിയ ദേശീയ വിദ്യാഭ്യാസ നയം (NEP) കേരളത്തിൽ നടപ്പാക്കില്ലെന്ന നിലപാടിൽ മാറ്റമില്ല. ആർ.എസ്.എസ് അജണ്ടയുള്ള ഒരു കാര്യവും കേരളത്തിൽ നടപ്പാക്കാൻ അനുവദിക്കില്ലെന്നും എട്ട് മാസമായി ഇത് മരവിപ്പിച്ചു നിർത്തിയിരിക്കുകയാണെന്നും പിണറായി വിജയൻ വ്യക്തമാക്കി.

പിണറായി വിജയന്റെ വാദങ്ങളെ പൂർണ്ണമായി തള്ളിക്കൊണ്ടാണ് മുഖ്യമന്ത്രി വി.ഡി. സതീശൻ രംഗത്തെത്തിയത്. ആർ.എസ്.എസിന്റെ വിഷസർപ്പങ്ങൾക്ക് മുന്നിൽ വിളക്കുകൊളുത്തി ഒപ്പുവെച്ചത് മുൻ എൽ.ഡി.എഫ് സർക്കാരാണ്. മരവിപ്പിക്കാൻ വേണ്ടിയിട്ടാണോ അന്ന് ഒപ്പിട്ടതെന്ന് വ്യക്തമാക്കണം. രാഷ്ട്രീയമായി കീഴടങ്ങി ഒപ്പിട്ട ശേഷം ഇപ്പോൾ അതിനെ ന്യായീകരിക്കുകയാണ് പ്രതിപക്ഷം ചെയ്യുന്നത്. പദ്ധതി മരവിപ്പിച്ചു എന്ന് പറയുന്ന പ്രതിപക്ഷം, ഇത് കേരളത്തിൽ നടപ്പാക്കില്ലെന്ന് കാണിച്ച് കഴിഞ്ഞ എട്ട് മാസമായി കേന്ദ്രത്തിന് ഒരു ഔദ്യോഗിക കത്തുപോലും നൽകിയിട്ടില്ല.

പുതിയ യു.ഡി.എഫ് ഗവൺമെന്റ് ഇക്കാര്യത്തിൽ മന്ത്രിമാരുടെ ഒരു ഉപസമിതിയെ (Sub-committee) നിയോഗിച്ചിട്ടുണ്ട്. സ്കൂളുകളുടെ സിലബസിലോ (Syllabus), കരിക്കുലം സ്വാതന്ത്ര്യത്തിലോ (Curriculum Freedom) തൊടാൻ കേന്ദ്ര സർക്കാരിനെ അനുവദിക്കില്ല. സ്കൂളുകളെ തിരഞ്ഞെടുക്കുന്നതിനുള്ള അധികാരം പൂർണ്ണമായും സംസ്ഥാന സർക്കാരിൽ നിലനിർത്തിക്കൊണ്ട് മാത്രമേ മുന്നോട്ടുപോകൂ എന്ന് മുഖ്യമന്ത്രി വ്യക്തമാക്കി.

പിഎം ശ്രീ തർക്കത്തിന് പുറമെ സംസ്ഥാനത്തിന്റെ കടബാധ്യതയെക്കുറിച്ചും സഭയിൽ കടുത്ത വാദപ്രതിവാദങ്ങൾ നടന്നു. സംസ്ഥാനത്തിന്റെ കടം 49,000 കോടിയല്ലെന്നും കിഫ്ബിയുടെയും കെ.എസ്.ഇ.ബി.യുടെയും കടം കൂടി കൂട്ടുമ്പോൾ അത് 87,000 കോടി രൂപയാകുമെന്നും മുഖ്യമന്ത്രി സഭയെ അറിയിച്ചു. ഒമ്പത് ശതമാനത്തിലേറെ ഉയർന്ന പലിശയ്ക്കാണ് കിഫ്ബി കടമെടുത്തിരിക്കുന്നത്. മുൻ സർക്കാർ കുടിശ്ശികയാക്കിയ 16 മാസത്തെ ക്ഷേമ പെൻഷൻ തുക പുതിയ ഗവൺമെന്റാണ് നൽകേണ്ടി വരുന്നതെന്നും വി.ഡി. സതീശൻ കുറ്റപ്പെടുത്തി.

സഭയിൽ കോൺഗ്രസ് തർക്കിച്ചു പിളരുമെന്ന് പ്രസംഗിച്ച ബി.ജെ.പി നേതാവിനെയും മുഖ്യമന്ത്രി പരിഹസിച്ചു. മൂന്ന് പേർ മാത്രം ജയിച്ചുവന്ന ബി.ജെ.പിയിൽ കടുത്ത ഭിന്നതയാണുള്ളതെന്നും രണ്ട് മുതിർന്ന നേതാക്കളെ രണ്ട്, മൂന്ന് ബെഞ്ചുകളിലിരുത്തിയാണ് കക്ഷിനേതാവ് മുൻസീറ്റിലിരിക്കുന്നതെന്നും മുഖ്യമന്ത്രി വി.ഡി. സതീശൻ പരിഹസിച്ചു.