"ദീപിക വായിക്കുന്ന പൊട്ടൻ, ബോണ്ട പൊതിയുന്ന പേപ്പർ പോലും വായിക്കാത്ത ബുദ്ധിമാനേക്കാൾ ഭേദമാണ്"

സഭാ നേതൃത്വത്തിനെതിരെ പി.സി. ജോർജ് നടത്തിയ വിവാദ പരാമർശങ്ങൾക്കെതിരെ കടുത്ത ഭാഷയിലുള്ള മറുപടിയുമായി കോൺഗ്രസ് നേതാവ് അഡ്വ. വസന്ത് സിറിയക് രംഗത്തെത്തി. "ദീപിക വായിക്കുന്ന പൊട്ടൻ, ബോണ്ട പൊതിയുന്ന പേപ്പർ പോലും വായിക്കാത്ത ബുദ്ധിമാനേക്കാൾ ഭേദമാണ്" എന്ന പരിഹാസത്തോടെയാണ് അദ്ദേഹം തന്റെ ഫെയ്സ്ബുക്ക് കുറിപ്പ് ആരംഭിക്കുന്നത്. സഭയെയും മെത്രാന്മാരെയും അധിക്ഷേപിക്കുന്ന ജോർജിന്റെ ശൈലിയെ അതിരൂക്ഷമായ വാക്കുകളിലൂടെയാണ് വസന്ത് വിമര്‍ശിച്ചത്. 

പി.സി. ജോർജിന് മറുപടി നൽകുന്നതിനേക്കാൾ ഭേദം സെപ്റ്റിക് ടാങ്കിൽ മുഖമിട്ടു നിൽക്കുന്നതാണെന്ന വികാരപരമായ പ്രതികരണമാണ് അദ്ദേഹം നടത്തിയത്. പി.സി. ജോർജും മകനും കേന്ദ്രമന്ത്രിസ്ഥാനം ലക്ഷ്യം വെച്ച് സഭയെ രാഷ്ട്രീയമായി വിൽക്കാൻ ശ്രമിച്ചുവെന്നും, ആ നീക്കം സഭാ നേതൃത്വം ഇടപെട്ട് തടഞ്ഞതിന്റെ വൈരാഗ്യമാണ് ഇപ്പോൾ പുറത്തുവരുന്നതെന്നും വസന്ത് ആരോപിച്ചു. രാഷ്ട്രീയ ലാഭത്തിനായി സഭയെ കരുവാക്കാൻ ശ്രമിച്ചവർ പരാജയപ്പെട്ടപ്പോഴുള്ള നിരാശയാണ് ഈ പ്രസ്താവനകൾക്ക് പിന്നിലെന്ന് അദ്ദേഹം കൂട്ടിച്ചേർത്തു.

സഭയെയും അതിന്റെ വിശ്വാസ്യതയെയും തകർക്കാൻ ശ്രമിക്കുന്നവർക്കെതിരെ വിശ്വാസികൾ ജാഗ്രത പാലിക്കണമെന്നും, രാഷ്ട്രീയ നേട്ടങ്ങൾക്കായി സഭയെ പണയപ്പെടുത്താൻ ആരെയും അനുവദിക്കില്ലെന്നും അദ്ദേഹം വ്യക്തമാക്കി.  രാഷ്ട്രീയ പ്രസ്താവനകളുടെ പേരിൽ പി.സി. ജോർജിനെതിരെ കത്തോലിക്കാ കോൺഗ്രസ് ഉൾപ്പെടെയുള്ള സംഘടനകൾ നേരത്തെ തന്നെ രംഗത്തെത്തിയിരുന്നു.