ആശമാരുടെ ഓണറേറിയം കൂട്ടി; ക്ഷേമപെന്‍ഷന്‍ വര്‍ധിപ്പിച്ചു; വമ്പന്‍ പ്രഖ്യാപനങ്ങളുമായി മുഖ്യമന്ത്രി

തിരഞ്ഞെടുപ്പ് അടുത്തുവരുന്ന പശ്ചാത്തലത്തിൽ വമ്പിച്ച ജനക്ഷേമ പ്രഖ്യാപനങ്ങളുമായി മുഖ്യമന്ത്രി. കേന്ദ്ര സർക്കാർ സാമ്പത്തികമായി ഉപരോധം തീർത്ത് ശരിക്കാൻ ശ്രമിക്കുമ്പോഴും സംഘടിതമായ ഒട്ടേറെ വ്യാജ പ്രചാരണങ്ങളിലൂടെ വലതുപക്ഷ ശക്തികൾ സർക്കാരിനെ തകർക്കാൻ ശ്രമിക്കുമ്പോഴും അതിനെയെല്ലാം അതിജീവിച്ചാണ് ഈ നേട്ടങ്ങൾ കൈവരിക്കാൻ കഴിഞ്ഞിട്ടുള്ളതെന്ന് മുഖ്യമന്ത്രി.

"സമൂഹത്തിൽ ഏറ്റവും കഷ്ടത അനുഭവിക്കുന്നവരുടെ കൈപിടിച്ചുയർത്തുക എന്ന മഹത്തായ ലക്ഷ്യമാണ് നാം നേടുന്നത്. ഇത് ലോകമാകെ അംഗീകരിക്കുന്ന കേരള മാതൃകയ്ക്ക് കൂടുതൽ തിളക്കം നൽകുന്ന നേട്ടമാണ്. നമ്മുടെ വികസന മാതൃക കേവലം സാമ്പത്തിക കണക്കുകളുടെതല്ല, അത് മാനവികതയിൽ അധിഷ്ഠിതമാണ്," മുഖ്യമന്ത്രി പറഞ്ഞു. നവകേരള സദസ്സ് ഉൾപ്പെടെയുള്ള വിപുലമായ ചർച്ചകൾക്ക് ശേഷമാണ് ഈ തീരുമാനങ്ങളിലേക്ക് എത്തിയതെന്നും അദ്ദേഹം കൂട്ടിച്ചേർത്തു.

വോട്ടർ പട്ടിക പ്രത്യേക തീവ്ര പുനഃപരിശോധന (എസ്.ഐ.ആർ.) തിടുക്കപ്പെട്ട് നടപ്പാക്കാനുള്ള തിരഞ്ഞെടുപ്പ് കമ്മീഷൻ തീരുമാനത്തിനെതിരെ സംസ്ഥാനത്ത് ശക്തമായ നീക്കം. ഈ നീക്കത്തിനെതിരെ തുടർനടപടികൾ ആലോചിക്കുന്നതിനായി നവംബർ 5ന് വൈകിട്ട് 4 മണിക്ക് സർവകക്ഷി യോഗം വിളിക്കാൻ ഇന്ന് ചേർന്ന മന്ത്രിസഭാ യോഗം തീരുമാനിച്ചു.

രാഷ്ട്രീയപാർട്ടികളുടെയും സംസ്ഥാന മുഖ്യ തിരഞ്ഞെടുപ്പ് ഓഫീസറുടെയും അഭിപ്രായം അവഗണിച്ച് എസ്.ഐ.ആർ. നടപ്പാക്കാനുള്ള തീരുമാനമാണ് കമ്മീഷൻ എടുത്തത്. സംസ്ഥാനത്തെ തദ്ദേശസ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പ് അടുത്തിരിക്കെ ഇത് പ്രാവർത്തികമല്ലെന്ന് മുഖ്യ തിരഞ്ഞെടുപ്പ് കമ്മീഷണർ തന്നെ അഭിപ്രായപ്പെട്ടിരുന്നു. രാജ്യത്തെ ജനാധിപത്യ പ്രക്രിയയ്ക്ക് വെല്ലുവിളി ഉയർത്തുന്ന ഈ നീക്കത്തിനെതിരെ കേരള നിയമസഭ നേരത്തെ ഐകകണ്ഠ്യേന പ്രമേയം അംഗീകരിച്ചിരുന്നു.

മുഖ്യമന്ത്രിയുടെ പ്രധാന ജനക്ഷേമ പ്രഖ്യാപനങ്ങൾ

തിരഞ്ഞെടുപ്പ് അടുത്തുവരുന്ന പശ്ചാത്തലത്തിൽ വമ്പിച്ച ജനക്ഷേമ പ്രഖ്യാപനങ്ങളുമായി മുഖ്യമന്ത്രി. സാമൂഹ്യ സുരക്ഷാ പെൻഷനുകൾ ₹1600-ൽ നിന്ന് ₹2000 രൂപയായി വർദ്ധിപ്പിച്ചു. സ്ത്രീകൾക്ക് പ്രതിമാസം ₹1000 നൽകുന്ന 'സ്ത്രീ സുരക്ഷാ പെൻഷൻ' ഉൾപ്പെടെ മൂന്ന് പുതിയ പദ്ധതികളും പ്രഖ്യാപിച്ചു.

പ്രധാന പ്രഖ്യാപനങ്ങൾ:

• ക്ഷേമപെൻഷൻ വർദ്ധന: സാമൂഹ്യ സുരക്ഷാ പെൻഷനുകളും ക്ഷേമനിധി ബോർഡ് പെൻഷനുകളും (സർക്കസ്, അവശകലാകാര പെൻഷനുകൾ ഉൾപ്പെടെ) പ്രതിമാസം ₹1600-ൽ നിന്ന് ₹2000 രൂപയായി വർദ്ധിപ്പിച്ചു.
• സ്ത്രീ സുരക്ഷാ പെൻഷൻ: 35 മുതൽ 60 വയസ്സ് വരെ പ്രായമുള്ള, നിലവിൽ പെൻഷൻ ലഭിക്കാത്ത AAY (മഞ്ഞ കാർഡ്), മുൻഗണനാ വിഭാഗം (പിങ്ക് കാർഡ്) എന്നിവയിൽപ്പെട്ട 33.34 ലക്ഷം സ്ത്രീകൾക്ക് പ്രതിമാസം ₹1000 രൂപ വീതം അനുവദിക്കും.
• കണക്ട് ടു വർക്ക് സ്കോളർഷിപ്പ്: യുവജനങ്ങൾക്ക് മികച്ച ജോലി ലഭിക്കാൻ പ്രതിമാസം ₹1000 രൂപ ധനസഹായം നൽകുന്ന പദ്ധതി.
• ആശ വർക്കർമാർ: ഓണറേറിയം ₹1000 രൂപ വർദ്ധിപ്പിച്ചു.
• റബർ താങ്ങുവില: റബറിന്റെ താങ്ങുവില ₹200 രൂപയായി വർദ്ധിപ്പിച്ചു.
• നെല്ല് സംഭരണവില: നെല്ലിന്റെ സംഭരണവില ₹30 ആയി വർദ്ധിപ്പിച്ചു.
• ഡി.എ./ഡി.ആർ. കുടിശിക: ഒരു ഗഡു അടുത്ത മാസം ശമ്പളത്തോടൊപ്പം നാല് ശതമാനം നിരക്കിൽ നൽകും.

മന്ത്രിസഭാ യോഗത്തിലെ മറ്റ് സുപ്രധാന തീരുമാനങ്ങൾ

1. അഗ്നിരക്ഷാ സേനയിൽ വനിതാ സ്റ്റേഷൻ ഓഫീസർമാർ

അഗ്നിരക്ഷാ സേവന വകുപ്പിൽ സ്റ്റേഷൻ ഓഫീസർ തസ്തികയിൽ വനിതകളെ നിയമിക്കുന്നതിനായി പുതിയതായി 12 വനിതാ സ്റ്റേഷൻ ഓഫീസർ തസ്തികകൾ സൃഷ്ടിക്കും. ഇതിൽ 50% പി.എസ്.സി. വഴി നേരിട്ടുള്ള നിയമനവും 50% നിലവിലുള്ള വനിതാ ഫയർ ഓഫീസർമാരിൽ നിന്നായിരിക്കും.

2. നെല്ല് സംഭരണം: മില്ലുടമകൾക്ക് നഷ്ടപരിഹാരം

നെല്ല് സംഭരണവുമായി ബന്ധപ്പെട്ട് മില്ലുടമകൾക്ക് 2022-23 സംഭരണ വർഷം 'ഔട്ട് ടേൺ റേഷ്യോ'യുമായി ബന്ധപ്പെട്ട് നൽകാനുള്ള ₹63.37 കോടി രൂപയുടെ നഷ്ടപരിഹാര തുക അനുവദിക്കുന്ന കാര്യം മന്ത്രിസഭ പരിഗണിക്കും.

കേരളത്തിന്റെ പ്രത്യേക സാഹചര്യം കണക്കിലെടുത്ത് കേന്ദ്രം നിശ്ചയിച്ച 68% ഔട്ട് ടേൺ റേഷ്യോയിൽ മാറ്റം വരുത്താൻ കേന്ദ്ര സർക്കാരിനോട് ആവശ്യപ്പെടും.

2025-26 സംഭരണവർഷം മുതൽ ഔട്ട് ടേൺ റേഷ്യോയിലെ വ്യത്യാസം മൂലം മില്ലുടമകൾക്കുണ്ടാകുന്ന നഷ്ടം പരിഹരിക്കുന്നതിന് ന്യായമായ നടപടി സംസ്ഥാന സർക്കാർ കൈക്കൊള്ളും.

ട്രാൻസ്പോർട്ടേഷൻ ചാർജ് അനുവദിച്ചു നൽകാൻ കേന്ദ്രത്തോട് ആവശ്യപ്പെടുകയും ഇത് ലഭിക്കുന്ന മുറയ്ക്ക് പൂർണ്ണമായും മില്ലുടമകൾക്ക് നൽകാനും ധാരണയായി.

3. പ്രളയ ദുരിതാശ്വാസം: രജിസ്ട്രേഷൻ ഫീസ് ഇളവ്

കോട്ടയം ജില്ലയിലെ കൂട്ടിക്കലിൽ പ്രളയത്തിൽ വീട് നഷ്ടപ്പെട്ട 25 പേർക്ക് സൗജന്യമായി കൈമാറുന്ന ഭൂമിയുടെ രജിസ്ട്രേഷന് മുദ്രവിലയിലും രജിസ്ട്രേഷൻ ഫീസിലും ഇളവ് നൽകും. ₹26,78,739 രൂപയുടെ ഇളവാണ് ഈ കൈമാറ്റങ്ങൾക്ക് അനുവദിക്കുക.

പിഎം ശ്രീ പദ്ധതി പുനഃപരിശോധിക്കും, തൽക്കാലം നിർത്തിവച്ചു

കേന്ദ്ര സർക്കാരിന്റെ 'പിഎം ശ്രീ' പദ്ധതി നടപ്പാക്കുന്നത് പുനഃപരിശോധിക്കാൻ തീരുമാനിച്ചു. പദ്ധതി സംബന്ധിച്ച ധാരണാപത്രം ഒപ്പിട്ടതുമായി ബന്ധപ്പെട്ട് ഉയർന്ന വിവാദങ്ങളും ആശങ്കകളും കണക്കിലെടുത്താണ് തീരുമാനം.

ഉപസമിതി: പദ്ധതി നടപ്പാക്കുന്നത് റിവ്യൂ ചെയ്യുന്നതിനും റിപ്പോർട്ട് നൽകുന്നതിനുമായി വിദ്യാഭ്യാസമന്ത്രി വി. ശിവൻകുട്ടി അധ്യക്ഷനായി ഏഴംഗ മന്ത്രിസഭാ ഉപസമിതിയെ രൂപീകരിച്ചു.

അംഗങ്ങൾ: കെ. രാജൻ, പി. പ്രസാദ്, റോഷി അഗസ്റ്റിൻ, പി. രാജീവ്, എ.കെ. ശശീന്ദ്രൻ, കെ. കൃഷ്ണൻകുട്ടി എന്നിവരാണ് സമിതി അംഗങ്ങൾ.

സബ് കമ്മിറ്റി റിപ്പോർട്ട് ലഭിക്കുന്നത് വരെ സംസ്ഥാനത്ത് പിഎം ശ്രീ നടപ്പാക്കുന്ന കാര്യങ്ങളുമായി മുന്നോട്ട് പോകില്ലെന്ന് കേന്ദ്ര സർക്കാരിനെ കത്ത് മുഖേന അറിയിക്കും.