ദേവന് നേദിക്കുന്നതിന് മുന്‍പ് വള്ളസദ്യ മന്ത്രിക്ക്; ആചാരലംഘനമെന്ന് തന്ത്രിയുടെ കത്ത്

ആറന്മുള അഷ്ടമി രോഹിണി വള്ളസദ്യ വിവാദത്തില്‍ പ്രതികരണവുമായി തന്ത്രി. ദേവന് നേദിക്കുന്നതിന് മുന്‍പ് മന്ത്രിക്ക് നല്‍കിയ നടപടി. ആചാരലംഘനമെന്ന് ബോര്‍ഡിന് തന്ത്രിയുടെ കത്ത്. പരിഹാരക്രിയ ചെയ്യണമെന്നും നിര്‍ദേശം. തന്ത്രിയുടെ കത്തിന്‍റെ പകര്‍പ്പ് മനോരമ ന്യൂസിന് ലഭിച്ചു. 

ആറന്മുള അഷ്ടമി രോഹിണി വള്ളസദ്യയിലെ ആചാരലംഘനം സ്ഥിരീകരിച്ച് ക്ഷേത്രം തന്ത്രി. ദേവന് നേദിക്കുന്നതിന് മുൻപ് മന്ത്രിക്ക് സദ്യ വിളമ്പിയ നടപടി ഗുരുതരമായ ആചാരലംഘനമാണെന്ന് തന്ത്രി ദേവസ്വം ബോർഡിന് നൽകിയ കത്തിൽ വ്യക്തമാക്കുന്നു. 'കഴിഞ്ഞ അഷ്ടമി രോഹിണി ദേവൻ സ്വീകരിച്ചിട്ടില്ല, അതിനാൽ പരിഹാരക്രിയകൾ ചെയ്യണം' എന്ന് കത്തിൽ തന്ത്രി കർശനമായി നിർദേശിക്കുന്നു. 

പള്ളിയോട സേവാസംഘം ഭാരവാഹികളും ദേവസ്വം ഉദ്യോഗസ്ഥരും ക്ഷേത്രനടയിൽ എണ്ണപ്പണം സമർപ്പിക്കണമെന്നും ചടങ്ങുകൾ ആവർത്തിക്കണമെന്നും നിർദേശമുണ്ട്. മുൻപ് ആചാരലംഘനം നടന്നിട്ടില്ലെന്ന് പള്ളിയോട സേവാസംഘം വാദിച്ചിരുന്നു. എന്നാൽ, തന്ത്രി തന്നെ ലംഘനം സ്ഥിരീകരിച്ചതോടെ പള്ളിയോട സേവാസംഘം വെട്ടിലായി. ഭാവിയിൽ ഇത്തരം വീഴ്ചകൾ ആവർത്തിക്കില്ലെന്ന് എല്ലാവരും ചേർന്ന് സത്യം ചെയ്യണമെന്നും തന്ത്രിയുടെ കത്തിലുണ്ട്. മനോരമ ന്യൂസാണ് തന്ത്രിയുടെ കത്തിന്റെ പകർപ്പ് പുറത്തുവിട്ടത്.