പാലം തകര്‍ന്നിട്ട് അഞ്ചു വർഷം; രക്ഷാപ്രവര്‍ത്തകര്‍ക്ക് തുണയായത് കാടിന്‍റെ മക്കളുടെ ചങ്ങാടം

പ്രളയത്തിൽ തകർന്ന മുണ്ടേരി ഇരുട്ടുകുത്തി പാലം പുനർ നിർമ്മിച്ചില്ല. അഞ്ചു വർഷം പിന്നിടുമ്പോഴും ചാലിയാർ കടക്കാൻ പ്രദേശവാസികൾ ആശ്രയിക്കുന്നത് മുളകൊണ്ട് നിർമ്മിച്ച ചങ്ങാടത്തെയാണ്. നിലവിൽ ചാലിയാറിനു മറുകരയിലുള്ള നാലു ഊരുകളിലെ അറുന്നൂറിലധികം ആളുകൾക്ക് പുറം ലോകവുമായി ബന്ധപ്പെടാനുള്ള ഏക ആശ്രയം ഈ ചങ്ങാടമാണ്. 

വയനാടിന്റെ മാറുപിളർന്നെത്തിയ ഉരുളിനെ പേറി ചാലിയാർ നിലതെറ്റി ഒഴുകി. ആർത്തൊഴുകിയ ചാലിയറിനെ വരുതിയിലാക്കി ആദ്യം തുഴ എറിഞ്ഞത് ഈ കാടിന്റെ മക്കളാണ്. മുളങ്കമ്പുകൾ കൂട്ടി കെട്ടി നിർമിച്ച ചങ്ങാടം. അഞ്ചാണ്ടായി പുറം ലോകവുമായുള്ള ബന്ധത്തിന് ഏക ആശ്രയം. ഇവർക്കിതൊരു ഞാണിന്മേൽ കളിയാണ്. മഴ പെയ്താൽ ചാലിയാർ കരകവിഞ്ഞൊഴുകും. പിന്നെ ജീവൻ പണയം വച്ചുവേണം ഈ ചങ്ങാടത്തിൽ മാറുകരെഎത്താൻ. 2019 ലെ പ്രളയത്തിൽ ഒലിച്ചു പോയതാണ് ഇരുട്ടുകുത്തിക്കടവിലെ പാലം. അന്നുതൊട്ട് ഈ ചങ്ങാടമാണ് ഏക ആശ്രയം. 

വയനാട് മുണ്ടക്കൈ ഉരുൾപൊട്ടലിൽ ഉരുളിനൊപ്പം ചാലിയറിലൂടെ ഒഴുകി വന്ന മൃതദേഹങ്ങൾ തേടിയുള്ള തിരച്ചിലിനും പാലമില്ലാത്തത് പ്രതിസന്ധിയായി. പുഴയ്ക്ക് മറുകര കണ്ടെത്തിയ മൃതദേഹങ്ങൾ കുത്തൊഴുക്കിൽ ചാലിയാർ നീന്തിക്കിടന്നാണ് ഇക്കരെ എത്തിച്ചത്. കാടിന്റെ മക്കളുടെ ഈ ചങ്ങാടമാണ് രക്ഷാപ്രവർത്തകർക്കും തുണയായത്. പുതിയ പാലത്തിനുള്ള പ്രാഥമിക മണ്ണ് പരിശോധന മാത്രമാണിവിടെ നടന്നത്. ആരൊക്കെയോ വന്ന് പരിശോധനകൾ നടത്തിപ്പോയി എന്നാണിവർ പറയുന്നത്. ഊരുകളിൽ നിന്നും ചാലിയാറിന് മറുകര എത്താൻ ഒരു മാർഗ്ഗം വേണം. അത് മാത്രമാണ് ഇവരുടെ ആവശ്യം.