ബൈക്ക് ടാക്സികള്‍ക്ക് റെഡ് സിഗ്നൽ; വൻ നീക്കവുമായി കര്‍ണാടക സര്‍ക്കാര്‍ ​

കർണാടകയിൽ ബൈക്ക് ടാക്സി സേവനങ്ങൾക്കെതിരെ സർക്കാർ നടപടി കൂടുതൽ ശക്തമാക്കുകയാണ്. ‘ഓപ്പറേഷൻ ബൈക്ക് ടാക്സി’ എന്ന പേരിൽ സംസ്ഥാന വ്യാപക പരിശോധനകൾ  ഗതാഗത വകുപ്പ് ആരംഭിച്ചു. മോട്ടോര്‍ വാഹന നിയമപ്രകാരം ടാക്സിയായി റജിസ്റ്റര്‍ ചെയ്യാതെ സ്വകാര്യ വാഹനങ്ങളില്‍ സേവനം നടത്തുന്ന ഇരുചക്രവാഹനങ്ങളാണ് പിടിച്ചെടുക്കുന്നത്. കൂടാതെ ഡ്രൈവർമാർക്കെതിരെ കർശന നടപടി സ്വീകരിക്കുകയും ചെയ്യുകയാണ്.

ബെംഗളൂരു ഉൾപ്പെടെയുള്ള നഗരങ്ങളിൽ ഇതിനകം പരിശോധനകൾ വ്യാപിപ്പിച്ചിട്ടുണ്ട്. ബൈക്ക് ടാക്സി സർവീസ് നടത്തുന്നതിനിടെ പിടിക്കപ്പെടുന്ന ഡ്രൈവർമാരുടെ ലൈസൻസ് റദ്ദാക്കുകയും വാഹനങ്ങളുടെ റജിസ്ട്രേഷൻ സർട്ടിഫിക്കറ്റ് (RC) റദ്ദാക്കുകയും ചെയ്യുമെന്നാണ് ഗതാഗത വകുപ്പിന്‍റെ മുന്നറിയിപ്പ്. തുടര്‍ച്ചായായി ബൈക്ക് ടാക്സികള്‍ അപകടത്തില്‍പ്പെടുന്നതും കൂടി പരിഗണിച്ചാണ് സര്‍ക്കാരിന്‍റെ നടപടി. ഈയിടെ കോഴിക്കോട് സ്വദേശിയായ യുവതി ബൈക്ക് ടാക്സിയില്‍ നിന്ന് തെറിച്ച് വീണ് ഗുരുതരമായി പരുക്കേറ്റിരുന്നു

എന്താണ് പ്രധാന തർക്കം?

 കുറഞ്ഞ ചെലവിൽ യാത്രാസൗകര്യം നൽകുകയും ആയിരക്കണക്കിന് ആളുകൾക്ക് തൊഴിൽ സൃഷ്ടിക്കുകയും ചെയ്യുന്ന സംവിധാനമാണ് ബൈക്ക് ടാക്സികളെന്നാണ് കമ്പനികളുടെ വാദം. ബെംഗളൂരു പോലുള്ള നഗരങ്ങളിലെ ഗതാഗതക്കുരുക്കിന് ഒരു പ്രായോഗിക പരിഹാരമായും ബൈക്ക് ടാക്സികളെ കാണുന്നുണ്ട്.

എന്നാൽ സർക്കാർ ചൂണ്ടിക്കാട്ടുന്നത് മറ്റൊന്നാണ്. സ്വകാര്യ റജിസ്ട്രേഷനിലുള്ള വാഹനങ്ങൾ വാണിജ്യ ആവശ്യങ്ങൾക്ക് ഉപയോഗിക്കുന്നത് നിലവിലെ നിയമങ്ങൾക്ക് വിരുദ്ധമാണെന്നാണ് നിലപാട്. യാത്രക്കാരുടെ സുരക്ഷ, ഇൻഷുറൻസ് പരിരക്ഷ, നിയന്ത്രണ സംവിധാനങ്ങളുടെ അഭാവം എന്നിവയും ആശങ്കയായി സർക്കാർ ഉയർത്തിക്കാട്ടുന്നു.

റാപ്പിഡോ, ഊബർ, ഓല എന്നിവയ്ക്ക് നോട്ടീസ്

ബൈക്ക് ടാക്സി സേവനങ്ങൾ ലഭ്യമാക്കുന്ന പ്രമുഖ ആപ്പ് അധിഷ്ഠിത കമ്പനികളായ റാപ്പിഡോ, ഊബർ, ഓല എന്നിവയ്ക്ക് സർക്കാർ നോട്ടീസ് അയച്ചിട്ടുണ്ട്. സംസ്ഥാനത്ത് ബൈക്ക് ടാക്സി സേവനങ്ങൾക്ക് നിയമപരമായ അനുമതിയില്ലെന്നും അതിനാൽ ആപ്പുകളിൽ നിന്ന് ഈ സേവനം ഉടൻ നീക്കം ചെയ്യണമെന്നുമാണ് നിർദേശം.

നോട്ടീസ് അവഗണിച്ചാൽ കൂടുതൽ കടുത്ത നടപടികളിലേക്ക് നീങ്ങുമെന്നും സർക്കാർ വ്യക്തമാക്കിയിട്ടുണ്ട്. ആവശ്യമായ നടപടികൾ സ്വീകരിക്കാത്ത പക്ഷം ഗൂഗിളിനോടും ആപ്പിളിനോടും ബന്ധപ്പെട്ട ആപ്പുകൾക്കെതിരെ നടപടിയെടുക്കാൻ ആവശ്യപ്പെടുമെന്നും മുന്നറിയിപ്പുണ്ട്.

വർഷങ്ങളായുള്ള നിയമപോരാട്ടത്തിന്‍റെ തുടർച്ച

സര്‍ക്കാരിന്‍റെ ഇപ്പോഴത്തെ  നടപടി ഒറ്റ ദിവസം കൊണ്ട് ഉണ്ടായതല്ല. കർണാടകയിൽ ബൈക്ക് ടാക്സി സേവനങ്ങളെ ചൊല്ലിയുള്ള തർക്കം വർഷങ്ങളായി തുടരുകയാണ്. 2019 മുതൽ റാപ്പിഡോ അടക്കമുള്ള കമ്പനികൾ ബെംഗളൂരു നഗരത്തിൽ ബൈക്ക് ടാക്സി സേവനം നടത്തുന്നുണ്ട്. ഗതാഗതക്കുരുക്കിൽപ്പെട്ട നഗരത്തിൽ കുറഞ്ഞ ചെലവിലും വേഗത്തിലും യാത്ര ചെയ്യാനാകുന്ന സംവിധാനമെന്ന നിലയിൽ സേവനം വേഗത്തിൽ ജനപ്രീതി നേടി.

2021-ൽ അന്നത്തെ ബിജെപി സർക്കാർ ഇലക്ട്രിക് ബൈക്ക് ടാക്സികൾക്ക് അനുമതി നൽകുന്ന നയം പ്രഖ്യാപിച്ചെങ്കിലും അത് പൂർണമായി നടപ്പായില്ല. ഇതിനിടെ സ്വകാര്യ വാഹനങ്ങൾ വാണിജ്യ ആവശ്യങ്ങൾക്ക് ഉപയോഗിക്കുന്നതിനെതിരെ ഓട്ടോ-ടാക്സി സംഘടനകൾ ശക്തമായ എതിർപ്പ് ഉയർത്തി.

തുടർന്ന് വിഷയം കോടതിയിലെത്തി. ബൈക്ക് ടാക്സി സേവനങ്ങൾക്ക് വ്യക്തമായ നിയമപരമായ ചട്ടക്കൂടില്ലെന്ന വാദം ശക്തമായതോടെ ഹൈക്കോടതി ഇടപെട്ടു. നിലവിലുള്ള നിയമപ്രകാരം സേവനം തുടരാനാകില്ലെന്ന നിലപാടാണ് കോടതിയും സ്വീകരിച്ചത്. തുടർന്ന് കമ്പനികളും സർക്കാരും തമ്മിലുള്ള നിയമപോരാട്ടം വിവിധ ഘട്ടങ്ങളിലൂടെ മുന്നോട്ടുപോയി. 

തൊഴിലാളി സംഘടനകൾ രണ്ട് പക്ഷത്ത്

നടപടിക്ക് പിന്നിൽ തൊഴിലാളി സംഘടനകളുടെ സമ്മർദ്ദവും പ്രധാന ഘടകമാണ്. കർണാടക ഓൺലൈൻ ടാക്സി വർക്കേഴ്സ് അസോസിയേഷന്‍റെ ആവശ്യപ്രകാരമാണ് സർക്കാർ നടപടികൾ ശക്തമാക്കിയതെന്നാണ് റിപ്പോർട്ടുകൾ. ബൈക്ക് ടാക്സി സേവനങ്ങൾ ഓട്ടോ, ടാക്സി തൊഴിലാളികളുടെ വരുമാനത്തെ പ്രതികൂലമായി ബാധിക്കുന്നുവെന്നാണ് ഇവരുടെ വാദം.

അതേസമയം, കർണാടക ആപ്പ് ബേസ്ഡ് വർക്കേഴ്സ് യൂണിയൻ (KAWU) ബൈക്ക് ടാക്സി ഡ്രൈവർമാരുടെ ഉപജീവനം സംരക്ഷിക്കണമെന്ന് ആവശ്യപ്പെട്ട് സമര പ്രഖ്യാപനം നടത്തിയിട്ടുണ്ട്. പൂർണ നിരോധനത്തിന് പകരം വ്യക്തമായ നിയമപരമായ ചട്ടക്കൂട് കൊണ്ടുവരണമെന്നാണ് യൂണിയന്റെ ആവശ്യം.

യാത്രക്കാരും ഡ്രൈവർമാരും അനിശ്ചിതത്വത്തിൽ

ബെംഗളൂരു പോലുള്ള നഗരങ്ങളിൽ  ബൈക്ക് ടാക്സികൾ വലിയ പങ്കുവഹിച്ചിട്ടുണ്ട്. മെട്രോ സ്റ്റേഷനുകളിൽ നിന്ന് ഓഫീസുകളിലേക്കും താമസ സ്ഥലങ്ങളിലേക്കും എത്താൻ ആയിരക്കണക്കിന് ആളുകൾ ദിവസവും ഈ സേവനത്തെ ആശ്രയിക്കുന്നു.

സേവനത്തിനെതിരെ നടപടി കടുപ്പിച്ചതോടെ ആയിരക്കണക്കിന് ഡ്രൈവർമാരുടെ വരുമാനവും ലക്ഷക്കണക്കിന് യാത്രക്കാരുടെ യാത്രാ സൗകര്യവും അനിശ്ചിതത്വത്തിലായിരിക്കുകയാണ്. നഗര ഗതാഗത സംവിധാനത്തിലും ഇതിന്‍റെ പ്രതിഫലനം ഉണ്ടാകുമെന്നാണ് വിലയിരുത്തൽ.

• ഇനി എന്ത്?

കർണാടകയിലെ ബൈക്ക് ടാക്സി മേഖലയ്ക്ക് ഇനി നിർണായക ദിവസങ്ങളാണ് മുന്നിലുള്ളത്. സർക്കാർ നടപടികൾ ശക്തമാകുന്നതിനിടെ കമ്പനികൾ വീണ്ടും കോടതിയെ സമീപിക്കാനുള്ള സാധ്യതയുണ്ട്. അതേസമയം, ബൈക്ക് ടാക്സികൾക്ക് പ്രത്യേക നിയമപരമായ അംഗീകാരവും നിയന്ത്രണ ചട്ടക്കൂടും വേണമെന്ന ആവശ്യം കൂടുതൽ ശക്തമാകുകയാണ്.

ബൈക്ക് ടാക്സികളെ പൂർണമായും നിരോധിക്കുന്ന വഴിയിലേക്കാണോ കർണാടക നീങ്ങുന്നത്, അതോ പുതിയ നയം രൂപീകരിച്ച് നിയമവിധേയമാക്കുമോ എന്നതാണ് ഇനി ഉയരുന്ന പ്രധാന ചോദ്യം. സർക്കാർ, കമ്പനികൾ, തൊഴിലാളി സംഘടനകൾ, യാത്രക്കാർ എന്നിവരുടെ താൽപര്യങ്ങൾ നിര്‍ണായകമാകുന്ന നടപടി കർണാടകയിലെ നഗര ഗതാഗതത്തിന്‍റെ ഭാവി നിർണയിക്കുന്ന വിഷയമായി മാറിയിരിക്കുകയാണ്.