പ്രശസ്ത നർത്തകി മേതിൽ ദേവികയും നടൻ മുകേഷും വേർപിരിയുന്ന വാർത്ത ഞെട്ടലോടെയാണ് സമൂഹം കേട്ടത്. ഇതോടൊപ്പം സോഷ്യൽമീഡിയകളിൽ നിറംപിടിപ്പിച്ച പല കഥകളും പ്രചരിച്ചു. അതിലൊന്നായിരുന്നു മേതിൽ ദേവികയുടെ മുൻ ഭർത്താവ് നിർമാതാവ് രാജീവ് ഗോവിന്ദനാണെന്നത്. പേരിലെ സാമ്യമാണ് ഇദ്ദേഹത്തിനു വിനയായത്. രാജീവ് നായർ എന്നാണ് ദേവികയുടെ മുൻ ഭർത്താവിന്റെ പേര്.
‘മേതിൽ ദേവികയുടെ മുൻ ഭർത്താവ് രാജീവ് നായർ താങ്കളാണോ എന്ന ചോദ്യത്തിന് ഉത്തരം പറഞ്ഞു മടുത്തു, ആ രാജീവ് നായർ ഞാനല്ല...’– നിർമാതാവ് രാജീവ് ഗോവിന്ദൻ പറയുന്നു. തന്റെ സോഷ്യൽമീഡിയ അക്കൗണ്ട് തുറക്കാൻ കഴിയാത്ത അവസ്ഥയാണെന്നും രാജീവ് പറയുന്നു.
ആ രാജീവ് നായർ ഞാനല്ല...ഒരു ഓൺലൈൻ മാധ്യമം ഈ വാർത്ത ഏറ്റെടുത്തതോടെയാണ് ജീവിതത്തിലെ അപ്രതീക്ഷിതമായ ചില അധ്യായങ്ങളുടെ തുടക്കം. ആദ്യം തന്നെ പറയട്ടെ, ദേവികയുടെ ഭർത്താവായിരുന്ന രാജീവ് നായർ ഞാനല്ല. എനിക്കവരുമായി ഒരു ബന്ധവും ഇല്ല. യാതൊരു അന്വേഷണവും നടത്താതെ എന്നെയും എന്റെ കവിതകളെയും മേതിൽ ദേവികയ്ക്ക് ചാർത്തി നൽകി. ഭാവനാസമ്പന്നമായ കഥകൾ ചമച്ചു. എന്ത് മാധ്യമ പ്രവർത്തനമാണിത്? അടിസ്ഥാനരഹിതമായ ഇത്തരം വാർത്തകൾ പ്രചരിപ്പിക്കുന്നവർക്കെതിരെ നിയമ നടപടി സ്വീകരിക്കാൻ തന്നെയാണ് തീരുമാനം.
ഞാനാണെന്ന് കൃത്യമായി തിരിച്ചറിയാൻ എന്റെ ചിത്രങ്ങളും ഗാനങ്ങളും പുസ്തകവുമൊക്കെ അതിൽ വലിച്ചിഴച്ചു. ദേവികയുടെ പുത്രന്റെ പിതൃത്വവും എന്റെ ചുമലിൽ ചാർത്തി. എങ്ങനെയാണ് ഞാനാണ് ദേവികയുടെ ആദ്യ ഭർത്താവെന്ന നിഗമനത്തിലേക്ക് ഇവരെത്തിയതെന്ന് എത്ര ആലോചിച്ചിട്ടും മനസ്സിലാകുന്നില്ല. ലോകത്തെ എല്ലാ 'രാജീവ് 'മാരും ഒന്നല്ല.
വാർത്ത സൃഷ്ടിച്ചവരും പ്രചരിപ്പിച്ചവരും തെറ്റുകാർ തന്നെയാണ്. എന്നെ അപമാനിക്കുന്ന തരത്തിൽ പ്രചരിപ്പിക്കുന്ന വിഡിയോ പിൻവലിക്കണം. നിയമ നടപടികൾ ആരംഭിച്ചു കഴിഞ്ഞെന്നും രാജീവ് കൂട്ടിച്ചേർത്തു.