പശ്ചിമ ബംഗാളിലെ ഉപതിരഞ്ഞെടുപ്പ്; രാഷ്ട്രീയ പോരാട്ടം ശക്തമാകുന്നു

പശ്ചിമ ബംഗാളിലെ ഉപതിരഞ്ഞെടുപ്പിന് മുന്നോടിയായി രാഷ്ട്രീയ പോരാട്ടം ശക്തമാകുന്നു. റജിനഗർ മണ്ഡലത്തിൽ മത്സരരംഗത്ത് നിന്ന് പിന്മാറാനുള്ള തീരുമാനം തിരുത്തിയതായി തൃണമൂൽ കോൺഗ്രസ് സ്ഥാനാർഥി റബിയുള്‍ ആലം ചൗധരി വ്യക്തമാക്കി. ഭീഷണിയെ തുടർന്ന് പ്രചാരണത്തിന് പ്രവർത്തകർ ഉണ്ടാകില്ലെന്ന് ചൂണ്ടിക്കാട്ടിയാണ് നേരത്തെ പിന്മാറുന്നതായി പ്രഖ്യാപിച്ചത്. പിന്നീട് നിലപാട് മാറ്റിയ അദ്ദേഹം പൊലീസ് സംരക്ഷണം ആവശ്യപ്പെട്ടു.

ഇതിനിടെ നന്ദിഗ്രാമിലെ കോൺഗ്രസ് സ്ഥാനാർഥി മിലൻ പ്രധാന്‍ അറസ്റ്റിലായി. 2007ലെ നന്ദിഗ്രാം സമരവുമായി ബന്ധപ്പെട്ട കേസിലാണ് 19 വർഷത്തിന് ശേഷം അറസ്റ്റ്. കോടതിയിൽ ഹാജരാക്കിയ മിലൻ പ്രധാന്‍ മത്സരത്തിൽ നിന്ന് പിന്മാറില്ലെന്ന് കോൺഗ്രസ് നേതൃത്വം അറിയിച്ചു. അറസ്റ്റ് ചെയ്തതുകൊണ്ട് സ്ഥാനാർഥി പിന്മാറില്ലെന്ന് എഐസിസി ജനറൽ സെക്രട്ടറി കെ.സി. വേണുഗോപാൽ വ്യക്തമാക്കി.

നന്ദിഗ്രാമിലെ മമത ബാനർജിയുടെ സ്ഥാനാർഥി സഞ്ചിത പ്രധാന്‍ അവസാന നിമിഷം പത്രിക പിൻവലിച്ചിരുന്നു. മുഖ്യമന്ത്രി സുവേന്ദു അധികാരിയെ കണ്ടതിന് പിന്നാലെയായിരുന്നു പത്രിക പിൻവലിക്കൽ. ഇതിന് പിന്നാലെ മമത ബാനർജി കോൺഗ്രസ് സ്ഥാനാർഥിക്ക് പിന്തുണ പ്രഖ്യാപിച്ചു.

2007ൽ കർഷകരുടെ ഭൂമി ഏറ്റെടുക്കുന്നതിനെതിരെ നന്ദിഗ്രാമിൽ നടന്ന പ്രക്ഷോഭം പശ്ചിമ ബംഗാളിലെ രാഷ്ട്രീയത്തിൽ നിർണായക വഴിത്തിരിവായിരുന്നു. മൂന്ന് പതിറ്റാണ്ടിലേറെ നീണ്ട സിപിഎം നേതൃത്വത്തിലുള്ള ഇടതുമുന്നണി ഭരണത്തിന് അന്ത്യം കുറിക്കുന്നതിൽ നന്ദിഗ്രാം സമരം പ്രധാന പങ്കുവഹിച്ചു.

അന്ന് മമത ബാനർജിക്കൊപ്പം സമരത്തിന് നേതൃത്വം നൽകിയവരിൽ ഒരാളായിരുന്നു നിലവിലെ മുഖ്യമന്ത്രി സുവേന്ദു അധികാരി. 2020ൽ ബിജെപിയിൽ ചേർന്ന അധികാരി, 2021ലെ നിയമസഭാ തിരഞ്ഞെടുപ്പിൽ നന്ദിഗ്രാമിൽ മമത ബാനർജിയെ പരാജയപ്പെടുത്തി. പിന്നീട് മമത ബാനർജി നന്ദിഗ്രാം സീറ്റ് ഒഴിഞ്ഞതിനെ തുടർന്നാണ് ഉപതിരഞ്ഞെടുപ്പിന് കളമൊരുങ്ങിയത്.

റജിനഗറിലെ സ്ഥാനാർഥിയുടെ പിന്മാറ്റ തീരുമാനം മാറ്റിയതും നന്ദിഗ്രാമിലെ കോൺഗ്രസ് സ്ഥാനാർഥിയുടെ അറസ്റ്റും പത്രിക പിൻവലിക്കലും ഉൾപ്പെടെയുള്ള സംഭവങ്ങളോടെ ബംഗാളിലെ ഉപതിരഞ്ഞെടുപ്പ് രാഷ്ട്രീയ പോരാട്ടത്തിന് കൂടുതൽ ശ്രദ്ധ നേടുകയാണ്.