‘രാഹുല്‍ ഗാന്ധി പുറത്തുവിട്ട ഒരു രേഖ തെറ്റ്’; വിശദീകരണവുമായി കമ്മിഷന്‍

കർണാടകയിലെ വോട്ടർപട്ടികയിൽ ക്രമക്കേട് നടന്നെന്ന രാഹുൽ ഗാന്ധിയുടെ ആരോപണത്തിൽ വിശദീകരണവുമായി മുഖ്യ തിരഞ്ഞെടുപ്പ് ഓഫീസർ രംഗത്ത്. രാഹുൽ ഗാന്ധി വാർത്താസമ്മേളനത്തിൽ പുറത്തുവിട്ട രേഖ തെറ്റാണെന്ന് തിരഞ്ഞെടുപ്പ് കമ്മീഷൻ അറിയിച്ചു. ഈ രേഖ പോളിങ് ഓഫീസർ നൽകിയതല്ലെന്നും, ആരോപണങ്ങൾ തെളിയിക്കുന്നതിനുള്ള തെളിവുകൾ ഹാജരാക്കിയാൽ അന്വേഷണം നടത്താമെന്നും തിരഞ്ഞെടുപ്പ് ഓഫീസർ വ്യക്തമാക്കി.

കർണാടക മുഖ്യ തിരഞ്ഞെടുപ്പ് ഓഫീസർ രാഹുൽ ഗാന്ധിക്ക് അയച്ച നോട്ടീസിലാണ് ഈ വിശദീകരണമുള്ളത്. ശകുൻ റാണി എന്ന വോട്ടർ രണ്ടിടത്ത് വോട്ട് ചെയ്തെന്നും പോളിങ് ഓഫീസർ ഇത് രണ്ടിടത്തും സാക്ഷ്യപ്പെടുത്തിയെന്നുമാണ് രാഹുൽ ഗാന്ധി ആരോപിച്ചത്. എന്നാൽ ഈ രേഖ തെറ്റാണെന്നും, വോട്ടർ ഒരിടത്ത് മാത്രമാണ് വോട്ട് രേഖപ്പെടുത്തിയതെന്നും തിരഞ്ഞെടുപ്പ് കമ്മീഷൻ വ്യക്തമാക്കി.

രാഹുൽ ഗാന്ധി ഉന്നയിച്ച മറ്റ് ആരോപണങ്ങളെക്കുറിച്ച് തിരഞ്ഞെടുപ്പ് കമ്മിഷന്‍ പ്രതികരിച്ചിട്ടില്ല. ഒരേ വീട്ടിൽ 80 വോട്ടർമാർ ഉണ്ടെന്നും വോട്ടർപട്ടികയിൽ വീട്ടുനമ്പറുകൾ തെറ്റായി രേഖപ്പെടുത്തിയിട്ടുണ്ടെന്നുമുള്ള ആരോപണങ്ങളോട് മുഖ്യ തിരഞ്ഞെടുപ്പ് ഓഫീസർ പ്രതികരിച്ചിട്ടില്ല.

പുറത്തുവിട്ട രേഖ പോളിങ് ഓഫീസർ നൽകിയതല്ലെന്നും, ആരോപണങ്ങൾ ശരിയാണെന്ന് തെളിയിക്കുന്ന രേഖകൾ സഹിതം തിരഞ്ഞെടുപ്പ് കമ്മീഷനെ സമീപിച്ചാൽ അന്വേഷണം നടത്താമെന്നും തിരഞ്ഞെടുപ്പ് ഓഫീസർ അറിയിച്ചിട്ടുണ്ട്. രാഹുൽ ഗാന്ധി ഉന്നയിച്ച മുഴുവൻ ആരോപണങ്ങൾക്കും കമ്മിഷന്‍ മറുപടി നൽകിയിട്ടില്ല.