പാര്‍ലമെന്‍റ് വളപ്പില്‍ ഏറ്റുമുട്ടി ഇന്ത്യാ സഖ്യവും ഭരണപക്ഷവും; നാടകീയ രംഗങ്ങൾ

അംബേദ്കര്‍ക്കെതിരായ അമിത് ഷായുടെ പരാമര്‍ശത്തെച്ചൊല്ലി പാര്‍ലമെന്‍റില്‍ ഭരണ–പ്രതിപക്ഷ പോരും കയ്യാങ്കളിയും. പ്രവേശന കവാടമായ മകര കവാടത്തിലുണ്ടായ ഉന്തിലും തള്ളിലും  മല്ലികാര്‍ജുന്‍ ഖര്‍ഗെയ്ക്കും മൂന്ന് ബിജെപി എം.പിമാര്‍ക്കും പരുക്കേറ്റു.  ഇരുസഭകളും നടപടികളിലേക്ക് കടക്കാതെ പിരിഞ്ഞു. വിഡിയോ റിപ്പോര്‍ട്ട് കാണാം. 

ഭരണഘടനാശില്‍പിയെ അപമാനിച്ച കോണ്‍ഗ്രസ് മാപ്പുപറയണമെന്നും രാഹുല്‍ഗാന്ധിയും മല്ലികാര്‍ജുന്‍ ഖര്‍ഗെയും രാജിവയ്ക്കണമെന്നും ആവശ്യപ്പെട്ട് ഭരണപക്ഷമാണ് മകരകവാടത്തില്‍ പ്രതിഷേധം തുടങ്ങിയത്. ഈ സമയം അംബേദ്കര്‍ പ്രതിമയ്ക്ക് മുന്നില്‍ ഒന്നിച്ച പ്രതിപക്ഷം ആഭ്യന്ത്രമന്ത്രി അമിത് ഷാ രാജിവയ്ക്കണമെന്നാവശ്യപ്പെടു. അംബേദ്കര്‍ പ്രതിമയില്‍ നിന്ന് പ്രകടനമായി പ്രതിപക്ഷം മകരകവാടത്തിലെത്തുമ്പോള്‍ വഴിയടച്ച് ഭരണപക്ഷസമരം തുടരുകയായിരുന്നു. പ്രിയങ്കഗാന്ധിയുടെ നേതൃത്വത്തില്‍ അകത്തേയ്ക്ക് പോകാന്‍ ശ്രമിച്ചതോടെ ഉന്തും തള്ളുമായി. ഇരുകൂട്ടരും നിലത്തിരുന്ന് മുദ്രാവാക്യംവിളിച്ചു. 

മല്ലികാര്‍ജുന്‍ ഖര്‍ഗെയടക്കം ഉന്തിലും തള്ളിലും പെട്ടു. മകരകവാടത്തിന്‍റെ പടികളിലൂടെ പ്രതിപക്ഷ നേതാവ് രാഹുല്‍ഗാന്ധി  ബലമായി അകത്തേയ്ക്ക് കയറാന്‍ ശ്രമിച്ചതും കുറേപ്പേര്‍ മറിഞ്ഞുവീണു. മൂന്ന് ബിജെപി എം.പിമാര്‍ക്ക് പരുക്കേറ്റു. ഇവരെ ആംബുലന്‍സില്‍ ആശുപത്രിയിലേക്ക് മാറ്റി. ഇതേസമയം കെ.സി വേണുഗോപാലിന്‍റെ നേതൃത്വത്തില്‍ മകരകവാടത്തിന് ഇരുവശങ്ങളിലുമുള്ള മതിലില്‍ കയറി മുദ്രാവാക്യം മുഴക്കാനാരംഭിച്ചു. സുരക്ഷ ഉദ്യോഗസ്ഥര്‍ പണിപ്പെട്ടാണ് ഇവരെ താഴെ ഇറക്കിയത്. 

പതിനൊന്നു മണിക്ക് ഇരുസഭകളും ചേര്‍ന്നതും പിരിഞ്ഞു. രണ്ടുമണിക്കും സമാനസ്ഥിതി തുടര്‍ന്നതോടെ സഭകള്‍ ഇന്നത്തേയ്ക്ക് പിരിഞ്ഞു. ലോക്സഭയില്‍ പ്രതിപക്ഷ അംഗങ്ങള്‍ സ്പീക്കറുടെ ഡയസില്‍ കയറിയും ജയ് ഭീം മുദ്രാവാക്യം മുഴക്കി.