ബിഹാറിൽ പെൺകുട്ടിക്കും സുഹൃത്തിനുമെതിരെ സദാചാര ഗുണ്ടായിസം; മുഖ്യപ്രതിയെ പൊലീസ് വെടിവച്ച് വീഴ്ത്തി

ബിഹാറിലെ ജമുയിയിൽ ബൈക്കിൽ സഞ്ചരിക്കുകയായിരുന്ന പെൺകുട്ടിയെയും സുഹൃത്തിനെയും ആക്രമിച്ച കേസിലെ മുഖ്യപ്രതി നന്ദൻ യാദവിനെ പൊലീസ് വെടിവച്ച് വീഴ്ത്തി. പ്രതി രക്ഷപ്പെടാൻ ശ്രമിക്കുന്നതിനിടെ വെടിയുതിർക്കുകയായിരുന്നെന്ന് പൊലീസ് പറഞ്ഞു.

പെൺകുട്ടിയെയും സുഹൃത്തിനെയും ആക്രമിക്കുന്ന വിഡിയോ പുറത്തുവന്നതിന് പിന്നാലെയാണ് സംഭവം പുറംലോകമറിയുന്നത്. ദൃശ്യങ്ങളിൽ ഓറഞ്ച് തലപ്പാവ് ധരിച്ചയാളാണ് മുഖ്യപ്രതി നന്ദൻ യാദവ്. മുഖം മറച്ച് പൊലീസ് ഉദ്യോഗസ്ഥരുടെ തോളിൽ കൈകൾ തൂക്കിയിട്ട നിലയിൽ ആശുപത്രിയിലേക്ക് കൊണ്ടുപോകുന്ന യാദവിന്റെ ചിത്രങ്ങളും പുറത്തുവന്നിട്ടുണ്ട്. ഇപ്പോൾ പുറത്തുവരുന്ന ചിത്രങ്ങളിലും യാദവിന്റെ മുഖം മറച്ച നിലയിലാണ്.

കേസിൽ ഇതുവരെ അഞ്ച് പേരെ അറസ്റ്റ് ചെയ്തിട്ടുണ്ടെന്ന് പൊലീസ് പറഞ്ഞു. അറസ്റ്റിലായ അഞ്ചുപേർക്ക് പുറമേ പ്രായപൂർത്തിയാകാത്ത രണ്ടുപേരെയും തിരിച്ചറിഞ്ഞിട്ടുണ്ട്. ഇവരെയും ഉടൻ അറസ്റ്റ് ചെയ്യുമെന്ന് പൊലീസ് വൃത്തങ്ങൾ അറിയിച്ചു. സംഭവത്തിൽ ഉൾപ്പെട്ട എല്ലാ പ്രതികളെയും തിരിച്ചറിഞ്ഞിട്ടുണ്ടെന്നും അവർക്കെതിരെ കർശന നടപടി സ്വീകരിക്കുമെന്നും ബിഹാർ ഉപമുഖ്യമന്ത്രി വിജയ് കുമാർ ചൗധരി പറഞ്ഞു. പൊലീസ് വേഗത്തിൽ നടപടി സ്വീകരിച്ചെന്നും കേസിലെ ഒരു പ്രതിയെയും വെറുതെ വിടില്ലെന്നും ബിഹാർ മന്ത്രി ശ്രാവൺ കുമാറും പറഞ്ഞു.

കഴിഞ്ഞ ഞായറാഴ്ച ജമുയിയിലെ വിനോദസഞ്ചാരകേന്ദ്രമായ മഡ്‍വ പർവതത്തിലെത്തിയ സ്കൂൾ വിദ്യാർഥികളായ ആൺകുട്ടിയെയും പെൺകുട്ടിയെയും നന്ദൻ യാദവും സംഘവും തടഞ്ഞുനിർത്തി ഉപദ്രവിക്കുകയായിരുന്നു. പർവതത്തിലെത്തി മടങ്ങുന്നതിനിടെ അഞ്ച് പേരടങ്ങുന്ന സംഘം ഇവരെ തടഞ്ഞുനിർത്തി. ഇരുവരും അവിടെ എത്തിയതിന്റെ കാരണം ചോദിച്ചായിരുന്നു തുടക്കം.

പിന്നാലെ സംഘത്തിലെ ഒരാൾ ആൺകുട്ടിയുടെ കോളറിൽ പിടിച്ച് തള്ളുന്നതും ഇരുവരും ചേർന്ന് ഇയാളെ പ്രതിരോധിച്ച് രക്ഷപ്പെടാൻ ശ്രമിക്കുന്നതും ദൃശ്യങ്ങളിലുണ്ട്. എന്നാൽ സംഘം കുട്ടികളെ വീണ്ടും പിടികൂടുകയായിരുന്നു. ഇതിനിടെ ഒരാൾ പെൺകുട്ടിയുടെ കഴുത്തിൽ പിടിച്ച് വലിച്ച് താഴെയിടുന്നതും തുടർന്ന് ശരീരത്തിൽ ബലമായി പിടിക്കുന്നതും ദൃശ്യങ്ങളിൽ കാണാം. ആൺകുട്ടി ഇയാളെ പിന്നിൽനിന്ന് ആക്രമിച്ച് പെൺകുട്ടിയെ രക്ഷിക്കാൻ ശ്രമിക്കുന്നുണ്ട്. പിടിവലിക്കിടെ മറ്റൊരാളും പെൺകുട്ടിയെ ആക്രമിക്കുന്നുണ്ട്.

പിന്നീട് ഇരുവരും സ്കൂട്ടറിൽ കയറി രക്ഷപ്പെടാൻ ശ്രമിച്ചെങ്കിലും സംഘം വീണ്ടും തടഞ്ഞു. തുടർന്ന് കുട്ടികളെക്കൊണ്ട് മാപ്പ് പറയിപ്പിക്കുന്നതും വിഡിയോയിൽ കാണാം.

പെൺകുട്ടിക്കെതിരെ ലൈംഗികാതിക്രമം നടത്തുന്നതിന്റെ ദൃശ്യങ്ങളും പുറത്തുവന്നിരുന്നു. അക്രമിസംഘം തന്നെയാണ് സംഭവത്തിന്റെ വിഡിയോ പകർത്തിയത്. വിഡിയോ വ്യാപകമായി പ്രചരിച്ചതിന് പിന്നാലെ ദേശീയ വനിതാ കമ്മിഷൻ സ്വമേധയാ കേസെടുത്തിരുന്നു.