എല്ലാവരുടെയും മുഖത്ത് പുഞ്ചിരി! നാഗപട്ടണത്തെ ഈ ഗ്രാമത്തിൽ മദ്യപിച്ചാൽ പിഴ 5000

തമിഴ്‌നാട്ടിലെ നാഗപട്ടണം ജില്ലയിലുള്ള വിലുന്താമാവടി എന്ന മൽസ്യത്തൊഴിലാളി ഗ്രാമം ഇപ്പോൾ വാർത്തകളിൽ നിറയുന്നത് വേറിട്ടൊരു തീരുമാനത്തിന്റെ പേരിലാണ്. യുവതലമുറയെ മദ്യപാനത്തിന്റെ കെണിയിൽ നിന്ന് രക്ഷിക്കാനായി ഗ്രാമവാസികൾ സ്വയം അടിച്ചേൽപ്പിച്ച കർശനമായ നിയമമാണിത്. മദ്യപിച്ചാൽ അവിവാഹിതരായ യുവാക്കൾക്ക് 5000 രൂപ പിഴ എന്നതാണ് ഈ ഗ്രാമത്തിലെ പുതിയ 'വൈറൽ റൂൾ'.

ഏറെക്കാലമായി മദ്യപാനം മൂലം ഒട്ടേറെ കുടുംബപ്രശ്നങ്ങളും അപകടങ്ങളും ഈ ഗ്രാമത്തിൽ റിപ്പോർട്ട് ചെയ്യപ്പെട്ടിരുന്നു. അടുത്തിടെ വിലുന്താമാവടി സ്വദേശിയായ പതിനെട്ടു വയസ്സുകാരൻ മദ്യപിച്ച് വാഹനമോടിച്ച് അപകടത്തിൽപ്പെട്ട് മരിച്ചത് ഗ്രാമവാസികളെ ആകെ ഞെട്ടിച്ചു. കൂടാതെ, മദ്യപിച്ച് വീട്ടിലെത്തി ബഹളമുണ്ടാക്കുന്നവരുടെ എണ്ണം കൂടിയതും നാട്ടുകാരുടെ ഉറക്കം കെടുത്തി. ഒടുവിൽ ഗ്രാമവാസികൾ പഞ്ചായത്ത് തലത്തിൽ യോഗം ചേർന്ന് ഒരു തീരുമാനത്തിലെത്തി. മദ്യപാനം ഗ്രാമത്തിൽ നിന്ന് തുടച്ചുനീക്കുക. ഈ മാസം ആദ്യം മുതലാണ് ഈ പുതിയ പരിഷ്കാരം പ്രാബല്യത്തിൽ വന്നത്.

നിയമങ്ങൾ ഇങ്ങനെ;

ഗ്രാമത്തിലെ അവിവാഹിതരായ യുവാക്കൾക്ക് മദ്യപാനത്തിന് കർശന വിലക്കാണ്. പിടിക്കപ്പെട്ടാൽ പിഴയായി അടക്കേണ്ടത് 5000 രൂപയാണ്. വിവാഹിതരായവർക്ക് മദ്യപിക്കാൻ ഇളവുകൾ ഉണ്ടെങ്കിലും, അവർക്കും കർശനമായ നിയന്ത്രണങ്ങളുണ്ട്. മദ്യപിച്ച് വീട്ടിലെത്തി കുടുംബാംഗങ്ങളെ ഉപദ്രവിക്കുകയോ ബഹളമുണ്ടാക്കുകയോ ചെയ്താൽ വിവാഹിതരാണെങ്കിലും അവരും 5000 രൂപ പിഴയടക്കണം.

മദ്യപാനികളെ പിടികൂടാൻ 'ഇനാം'

ഈ നിയമം നടപ്പിലാക്കാൻ ഗ്രാമവാസികൾ കണ്ടെത്തിയ മാർഗ്ഗം അതിനേക്കാളും രസകരമാണ്. ഗ്രാമത്തിനുള്ളിൽ മദ്യപാനം നടക്കുന്നുണ്ടെന്ന് കൃത്യമായ തെളിവുകളോടെ അധികൃതരെ അറിയിക്കുന്നവർക്ക് 2000 രൂപ പാരിതോഷികമായി നൽകാനും പഞ്ചായത്ത് തീരുമാനിച്ചു. ഇതോടെ മദ്യപിക്കുന്നവർക്ക് എപ്പോഴും ഭീഷണിയായി നാട്ടുകാരുടെ കണ്ണുകൾ ഉണർന്നിരിക്കുകയാണ്.

മാറ്റം കണ്ടുതുടങ്ങി!

ഈ പരിഷ്കാരത്തെ ഗ്രാമത്തിലെ സ്ത്രീകൾ വലിയ ആശ്വാസത്തോടെയാണ് നോക്കിക്കാണുന്നത്. മദ്യപാനികൾ കുറഞ്ഞതോടെ കുടുംബങ്ങളിൽ സമാധാനം തിരിച്ചെത്തിയെന്നും, തങ്ങളുടെ മക്കൾ സുരക്ഷിതരാണെന്നും അവർ പറയുന്നു. ഗ്രാമത്തിന്റെ മുഖച്ഛായ മാറ്റാനുള്ള ഈ വലിയൊരു ചുവടുവെപ്പ് സാമൂഹിക തിന്മകൾക്കെതിരെ ഒരു ജനത ഒന്നിച്ചുനിന്നാൽ എന്ത് മാറ്റങ്ങൾ കൊണ്ടുവരാൻ സാധിക്കും എന്നതിന്റെ മികച്ച ഉദാഹരണമായി മാറുകയാണ്.