ഡല്‍ഹിയില്‍ കനത്തമഴ; ശക്തമായ കാറ്റിന് സാധ്യത; ഹിമാചലില്‍ വീണ്ടും പ്രളയ മുന്നറിയിപ്പ്

ഉത്തരേന്ത്യയിൽ കനത്ത മഴ തുടരുന്നു. ഡൽഹിയിൽ പുലർച്ചെ മുതൽ അതിശക്തമായ മഴയാണ് പെയ്യുന്നത്. ഡൽഹിയിൽ ഓറഞ്ച് അലർട്ട് പ്രഖ്യാപിച്ചിട്ടുണ്ട്. അതിശക്തമായ മഴയ്ക്കും കാറ്റിനും സാധ്യതയുണ്ടെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്.

മഴക്കെടുതി രൂക്ഷമായ ഹിമാചൽ പ്രദേശിൽ റെഡ് അലർട്ട് തുടരുകയാണ്. വീണ്ടും മിന്നൽ പ്രളയ മുന്നറിയിപ്പും നൽകിയിട്ടുണ്ട്. ഷിംല, സോളൻ, ഹാമിർപൂർ ഉൾപ്പെടെ 9 ജില്ലകളിലുള്ളവർ അടുത്ത 24 മണിക്കൂർ അതീവ ജാഗ്രത പാലിക്കണമെന്ന് കാലാവസ്ഥാ കേന്ദ്രം നിർദേശം നൽകി. പഞ്ചാബിലും റെഡ് അലർട്ട് തുടരുകയാണ്.

ഹിമാചലിൽ ഇതുവരെ 74 മരണങ്ങളാണ് റിപ്പോർട്ട് ചെയ്തത്. 31 പേരെ ഇനിയും കണ്ടെത്താനുണ്ട്. സംസ്ഥാനത്ത് 240 റോഡുകൾ ഇപ്പോഴും അടഞ്ഞുകിടക്കുകയാണ്.