ഓണറേറിയം മുടങ്ങി; ഒരു വര്‍ഷമായി ശമ്പളമില്ലാതെ സ്പെഷല്‍ സ്കൂള്‍ അധ്യാപകര്‍

സംസ്ഥാനത്തെ സ്പെഷല്‍ സ്കൂള്‍ അധ്യാപകര്‍ക്ക് ശമ്പളം മുടങ്ങിയിട്ട് ഒരു വര്‍ഷം. സ്പെഷല്‍ സ്കൂളുകള്‍ക്കുള്ള ഒാണറേറിയം കൃത്യസമയത്ത് സര്‍ക്കാര്‍ നല്‍കാത്തതാണ് വേതനം മുടങ്ങാന്‍ കാരണം. സ്പെഷല്‍ സ്കൂള്‍ അധ്യാപകരുടെ വിദ്യാഭ്യാസ യോഗ്യതയില്‍ സര്‍ക്കാര്‍ മാറ്റം വരുത്തിയതോടെ പതിറ്റാണ്ടുകളായി സ്പെഷല്‍ സ്കൂളുകളില്‍ ജോലി ചെയ്യുന്ന താല്‍കാലിക അധ്യാപകരുടെ തൊഴിലും തുലാസിലാണ്. 

 

ഭിന്നശേഷിക്കാരായ കുട്ടികളുടെ അമ്മമാരാണ് സ്പെഷല്‍ സ്കൂളുകളിലെ നല്ലൊരു ശതമാനം അധ്യാപകര്‍. സ്വന്തം കുഞ്ഞുങ്ങളെയെന്നോണമാണ് ഇവര്‍ ഒന്നിലേറെ വൈകല്യങ്ങളുള്ള കുട്ടികളെ പരിചരിക്കുന്നതും. അവരോട് കൂടിയാണ് ശമ്പളം നല്‍കാതെയുള്ള വിദ്യാഭ്യാസ വകുപ്പിന്റെ വിവേചനവും.

 

അതിനിടെ സ്പെഷല്‍ സ്കൂള്‍ അധ്യാപകരുടെ വിദ്യാഭ്യാസ യോഗ്യത ബിഎഡ് ആക്കി ഉയര്‍ത്തിയ വിദ്യാഭ്യാസവകുപ്പിന്റെ നടപടിയും ഇവരുടെയെല്ലാം സമാധാനം െകടുത്തുകയാണ്. ബഡ്സ് സ്കൂള്‍ ബഡ്സ് റിഹാബിലിറ്റേഷന്‍ സെന്റര്‍ എന്നിവിടങ്ങളിലെ അടിസ്ഥാന യോഗ്യത പ്ലസ് ടുവും, സ്പെഷല്‍ എഡ്യുക്കേഷന്‍ ഡിപ്ലോമയും ആണെന്നിരിക്കെ സ്പെഷല്‍ സ്കൂളകളിലെ അധ്യാപകര്‍ക്ക് മാത്രം ബി.എഡ് അടിസ്ഥാനയോഗ്യതയാക്കിയ നടപടി പിനവലിക്കണമെന്ന ആവശ്യവും ഇവര്‍ക്കുണ്ട്.