അധിര് രഞ്ജന്റെ 'രാഷ്ട്രപത്നി' പരാമർശം; ആയുധമാക്കി ബിജെപി, പ്രതിഷേധം
രാഷ്ട്രപതി ദ്രൗപദി മുര്മുവിനെ കോണ്ഗ്രസ് ലോക്സഭാകക്ഷി നേതാവ് അധിര് രഞ്ജന് ചൗധരി രാഷ്ട്രപത്നി എന്ന് വിളിച്ചത് ആയുധമാക്കി ബിജെപി. കോണ്ഗ്രസിന് ആദിവാസി വിരുദ്ധ മനോഭാവമാണെന്ന് കേന്ദ്രമന്ത്രി സ്മൃതി ഇറാനി കുറ്റപ്പെടുത്തി. ദ്രൗപദി മുര്മു രാഷ്ട്രപതി സ്ഥാനാര്ഥിയായപ്പോള് മുതല് കോണ്ഗ്രസ് നിരന്തരം അപകീര്ത്തികരമായ പരാമര്ശങ്ങളാണ് നടത്തുന്നത്. അധിര് രഞ്ജന് ചൗധരിയുടെ പ്രസ്താവനയില് കോണ്ഗ്രസ് മാപ്പു പറയണമെന്നും സ്മൃതി ഇറാനി ആവശ്യപ്പെട്ടു. പ്രസ്താവനയ്ക്കെതിരെ ബിജെപി എംപിമാര് പാര്ലമെന്റ് വളപ്പില് പ്രതിഷേധിച്ചു, കോണ്ഗ്രസിനെതിരെ ലോക്സഭയിലും രാജ്യസഭയിലും ബിജെപി എംപിമാര് നോട്ടിസ് നല്കും. ഒരു ഹിന്ദി ചാനലിനോട് പ്രതികരിക്കവെയാണ് അധിര് രഞ്ജന് ചൗധരി വിവാദ പരാമര്ശം നടത്തിയത്.
