'പങ്കാളിയുമായി സെക്സിലേര്‍പ്പെടുമ്പോള്‍ തന്നെ മനസ്സിൽ മറ്റൊരാളെ സങ്കല്‍പ്പിക്കുന്നവരുണ്ട്, അതും അവിഹിതമല്ലേ? '

അമേരിക്കയിലെ ഒരു കമ്പനി സിഇഒയുടെ അവിഹിതം, ഒരു മ്യൂസിക്ക് പ്രോഗ്രാമിന്റെ ഇടക്ക് പിടിക്കപ്പെട്ട വാര്‍ത്തകള്‍ ട്രോളായും മറ്റും സമൂഹമാധ്യമങ്ങളില്‍ നിറയുന്ന പശ്ചാത്തലത്തില്‍, അവിഹിതത്തിന്റെ രസതന്ത്രത്തെപ്പറ്റി വൈറല്‍ കുറിപ്പുമായി ബ്ലോഗര്‍ നസീര്‍ ഹുസൈന്‍ കിഴക്കേടത്ത്. 

അമേരിക്കയിലെ കമ്പനി സിഇഒയുടെ അവിഹിതത്തിന്‍റെ വാര്‍ത്തയ്ക്ക് താഴെ ആളുകളിടുന്ന കമന്റുകൾ കണ്ടാൽ ആദ്യമായാണ് ഒരാൾ അവിഹിതം ചെയ്യുന്നതെന്ന് തോന്നും, ബാക്കി എല്ലാവരും പാവങ്ങളാണെന്നും.. യഥാർത്ഥത്തിൽ അവിഹിതമല്ല, മറിച്ച് ദീർഘകാലം നമ്മൾ സന്തോഷമെന്ന്  പുറത്ത് നടിച്ച് കൊണ്ടുനടക്കുന്ന വിവാഹ ബന്ധങ്ങളാണ് തെറ്റെന്നാണ് എനിക്ക് തോന്നുന്നത്. ഭൂരിഭാഗം വിവാഹ ബന്ധങ്ങളും നിശബ്ദമായ ഡൈവോഴ്‌സുകൾ നടന്നു കഴിഞ്ഞവയാണ്. അവർ ഒരുമിച്ച് താമസിക്കുകയും കുട്ടികളെ നോക്കുകയും, പുറത്തുള്ളവരെ കാണിക്കാൻ വേണ്ടി ജന്മദിന ആശംസകൾ ഇടുകയുമൊക്കെ ചെയ്യുമെങ്കിലും കിടപ്പറയിൽ അങ്ങോട്ടും ഇങ്ങോട്ടും തിരിഞ്ഞു കിടന്നുറങ്ങുന്നവരും, പരസ്പരം സംസാരിക്കാനുള്ള വിഷയങ്ങൾ വരണ്ടുപോയവരും ആയിരിക്കും. 

എല്ലാവരും അങ്ങിനെയാണെന്നല്ല ഞാൻ പറയുന്നത്, പക്ഷെ ഇരുപത് മുപ്പത് വർഷങ്ങൾ പ്രണയത്തോടെ ജീവിക്കുന്നവരുടെ ഇടയിൽ യാഥാർത്ഥത്തിൽ  പ്രവർത്തിക്കുന്നത് സൗഹൃദമായിരിക്കും. അവർ വിവാഹത്തിന് മുൻപോ പിമ്പോ  നല്ല സുഹൃത്തുക്കൾ ആയി മാറിയവർ ആയിരിക്കും. പ്രണയത്തിന് മാത്രം ഒരു ബന്ധം ദീർഘനാൾ  കൊണ്ടുപോകാൻ പറ്റില്ല, അതങ്ങനെയല്ല ഡിസൈൻ ചെയ്യപ്പെട്ടിട്ടുള്ളത്. പലപ്പോഴും അവിഹിതം സെക്‌സിന് വേണ്ടി മാത്രമാണെന്ന് തെറ്റിദ്ധരിക്കപ്പെടാറുണ്ട്. കുറെ കൂടി സങ്കീർണമായ കാരണങ്ങളാണ് യാഥാർത്ഥത്തിൽ  അവിഹിതങ്ങളുടെ പിറകിലുള്ളത്, ലൈംഗിക പലപ്പോഴും അവിഹിതത്തിന്റെ ഒരു സൈഡ് എഫ്ഫക്റ്റ് മാത്രമാണ്.

പരിണാമപരമായി  എല്ലാ മനുഷ്യരും ജീവിതകാലം മുഴുവൻ ഒരേ പങ്കാളികളുടെ കൂടെ കഴിയാൻ വേണ്ടി ഉണ്ടാക്കപെട്ടവരല്ല. പുരുഷന്മാർക്ക് കുട്ടികളെ നോക്കേണ്ട അധിക ചുമതല ഇല്ലാതിരുന്ന കാലത്ത് ലോകം മുഴുവൻ തന്റെ വിത്ത് വിതക്കാനുള്ള നെട്ടോട്ടത്തിൽ പല പങ്കാളികൾ ഉണ്ടായിരുന്നവരാണ് പുരുഷന്മാർ. ഏറ്റവും നല്ല ബീജം വേണമെന്നത് കൊണ്ട് പല പങ്കാളികളുമായി ബന്ധപെട്ടവരാണ് സ്ത്രീകളും. കുട്ടി ജനിച്ച് അവർ സ്വന്തം കാലിൽ നിൽക്കുന്നത്  വരെ മാത്രം പുരുഷനും സ്ത്രീയും കുട്ടികളെ നോക്കുകയും അതിന് ശേഷം മറ്റൊരു പങ്കാളിയെ തേടി പോവുകയും ചെയ്യുന്ന ഒരു സിസ്റ്റത്തിൽ നിന്ന് പ്രണയം, ലൈംഗികത , സ്നേഹം, കുട്ടികൾ എന്നിങ്ങനെ എല്ലാം കൂടി ജീവിതകാലം മുഴുവൻ ഒരേ ഒരു പങ്കാളി ഉള്ള  കല്യാണം എന്ന ഒറ്റ പാക്കേജിലേക്ക് മാറിയിട്ട്, മനുഷ്യ ചരിത്രവുമായി തട്ടിച്ച് നോക്കുമ്പോൾ, അധികം നാളായിട്ടില്ല.  ഗർഭ നിരോധന മാർഗങ്ങൾ  നിലവിൽ വന്നതിൽ പിന്നെ ഗർഭം ഉണ്ടാകാതെയും ലൈംഗിക ബന്ധത്തിൽ ഏർപ്പെടാം എന്നതുകൊണ്ട് സ്ത്രീകൾക്കും ഇപ്പോൾ തങ്ങൾക്ക് ഇഷ്ടമുള്ള പുരുഷന്മാരുമായി ടെൻഷൻ ഇല്ലാതെ ലൈംഗിക ബന്ധം പുലർത്താം. 

ഒരേ പങ്കാളിയുമായുള്ള ദീർഘ കാല ദാമ്പത്യങ്ങളിൽ ലൈംഗിക ബന്ധങ്ങൾ വരണ്ടുപോകുന്നത് സ്വാഭാവികമായ കാര്യമാണ്, കാരണം കുട്ടികളെ ഉണ്ടാക്കുക എന്ന പ്രകൃതിയുടെ നിയമം പാലിച്ചു കഴിഞ്ഞാൽ പിന്നെ ഈ ബന്ധം തുടരാനുള്ള ഹോർമോണുകൾ ഒന്നും ശരീരം പുറപ്പെടുവിക്കേണ്ട കാര്യമില്ല. ഇതിന്റെ അർഥം എല്ലാവരും  കുറെ പങ്കാളികളുമായി ഒരേ സമയത്ത് ബന്ധപ്പെടുന്നു എന്നല്ല, മറിച്ച് ഒരു സമയത്ത് ഒരു പങ്കാളിയും, അതിന് ശേഷം മറ്റൊരു പങ്കാളിയും എന്ന പോലെ സീരിയൽ മോണോഗമി കൊണ്ടുനടക്കുന്നവരും, ഒരേ സമയത്ത് പല പ്രണയബന്ധങ്ങൾ ഉള്ള പൊളി അമോറസ് ആയ ആളുകളുമുണ്ട്. ഇതെല്ലാം സ്വാഭാവികമായി കാണുന്ന ഒരു സമൂഹം ഉണ്ടായിവരണം. 

എന്നിട്ടും ഭൂരിഭാഗം ആളുകളും ഒരേ കുടുംബത്തിൽ തന്നെ കഴിയാനുള്ള കാരണം ആധുനിക സമൂഹങ്ങളിൽ കുട്ടികൾ വളർത്തിയെടുക്കാൻ ദീഘകാലം എടുക്കും എന്നതും, ആളുകൾ എന്ത് പറയും എന്നുളള സദാചാര ബോധവും കൊണ്ടാണ്. തന്റെ ഇണ വേറെ ഒരാളെ തേടി പോയാൽ അത് സ്വാഭാവികമായ പ്രക്രിയ ആയിട്ടല്ല , മറിച്ച് തന്റെ എന്തോ കുറവുകൊണ്ടാണ് എന്ന് കരുതുന്ന പൊതുബോധമാണ് ഇന്നത്തെ സോഷ്യൽ കണ്ടിഷനിംഗ് കൊണ്ട് നിലവിലുള്ളത്.  അതുകൊണ്ടു തന്നെ സ്വന്തം പങ്കാളിയുമായി ലൈംഗിക ബന്ധത്തിൽ ഏർപ്പെടുമ്പോൾ തന്നെ മനസ്സിൽ വേറെ ഒരാളെ സങ്കലിപ്പിക്കുന്ന ആണും പെണ്ണും ഉൾപ്പെടയുള്ള ആളുകളുമുണ്ട്. ഒരു തരത്തിൽ പറഞ്ഞാൽ അതും അവിഹിതമാണ്, ആരും അറിയുന്നില്ല എന്നെ ഉള്ളൂ. 

പെണ്ണുങ്ങളെ നമ്മുടെ സദാചാരത്തിന്റെ കാവൽക്കാരായി നിർത്തിയിരിക്കുന്നത് കൊണ്ട് പലപ്പോഴും സ്ത്രീകൾ അവിഹിതത്തിനെ കുറിച്ച് ചിന്തിക്കുന്നത് തന്നെ പാപമായി കരുതുന്നവരായിരിക്കും. സെക്സ് തന്നെ പാപമാണെന്ന് കരുതുന്ന ഒരു സമൂഹമാണ് നമ്മുടേത്, പിന്നെയാണ് അവിഹിതം. ആണുങ്ങൾ പ്രണയം നടിച്ച് സെക്സ് നേടുകയും, സ്ത്രീകൾ സെക്സ് കൊടുത്ത് പ്രണയം നേടുകയും ചെയ്യുന്നവരാണെന്ന് ചിലരെങ്കിലും പറയുന്നത് നമ്മുടെ ഇപ്പോഴുള്ള സോഷ്യൽ കണ്ടിഷനിങ് കൊണ്ടായിരിക്കണം. 

ലൈംഗികത പലപ്പോഴും അവിഹിതതിന്റെ ഒരു സൈഡ് എഫക്റ്റ്  മാത്രമാണ്. ആളുകൾ വേറെ ബന്ധങ്ങൾ തേടി പോകാനുള്ള പ്രധാന കാരണം മാനസിക ബന്ധങ്ങളാണ്. സ്വന്തം പങ്കാളി തരാത്ത സ്പേസ്, കരുതൽ, സ്നേഹം, നമ്മളെ നമ്മളായി പൂര്ണമായുള്ള മനസ്സിലാക്കൽ  ഒക്കെ വേറൊരു സ്ഥലത്തു നിന്ന് കിട്ടുമ്പോഴാണ് ആളുകൾ മറ്റൊരു ഇടം തേടി പോകുന്നത്. കുട്ടികൾ ഉള്ളത് കൊണ്ടോ, ആളുകൾ എന്ത് പറയും എന്ന വിചാരം കൊണ്ടോ സ്വന്തം പങ്കാളിയെ ഉപേക്ഷിച്ചു പോകുന്നില്ല എന്നെ ഉള്ളൂ.  പലരുടെയും ബെഡ് റൂമുകൾ മരണം നടന്ന വീടുകളെ പോലെ മൗനം നിറഞ്ഞവയാണ്. ഒരേ ബെഡിൽ കിടക്കുന്നു എന്നെ ഉള്ളൂ. ബന്ധം തുടങ്ങിയപ്പോൾ ഉണ്ടായിരുന്ന ഊഷ്മളതയൊക്കെ പണ്ടേ പോയിക്കാണും. ഈ മാറ്റം പക്ഷെ വളരെ പതുക്കെ നടക്കുന്ന ഒന്നായത് കൊണ്ട്, പലർക്കും എങ്ങിനെ എപ്പോൾ ഈ മാറ്റം സംഭവിച്ചു എന്ന് പറയാനും കഴിയില്ല. അങ്ങിനെയുള്ള ഒരു ബന്ധത്തിൽ നിന്നുള്ള രക്ഷപെടൽ കൂടിയാണ് അവിഹിതം. 

അവിഹിതത്തിന്റെ മറ്റൊരു കാരണം മനുഷ്യർ മാറുന്നതാണ്. നമ്മുടെ പേഴ്‌സണാലിറ്റി, ലൈംഗിക താല്പര്യങ്ങൾ ഒക്കെ കാലം കഴിയുന്തോറും മാറും. നമ്മുടെ പങ്കാളികൾ അതെ പോലെ തന്നെ മാറണം എന്നില്ല. ഇത്തരം മാറ്റങ്ങൾ ആദ്യം വളരെ നന്നായിരുന്ന ബന്ധങ്ങൾ തകരാൻ കാരണമാകാം. ഒരാളുടെ ലൈംഗിക താല്പര്യങ്ങൾ  തന്റെ പങ്കാളിയിൽ നിന്ന് വളരെയധികം വ്യത്യാസപ്പെട്ടിരുന്നാൽ അതുകൊണ്ടും അവിഹിതം സംഭവിക്കാം. ലൈംഗിക കാരണങ്ങൾ കൂടാതെ കുട്ടികാലത്തെ ട്രോമ , നാർസിസം പോലുള്ള  പങ്കാളികളുടെ വ്യക്തിത്വ പ്രശ്നങ്ങൾ കുറെ കാര്യങ്ങൾ അവിഹിതത്തിന്റെ കാരണങ്ങളായി വരാം.  

ഇത്രയും പറഞ്ഞത് കൊണ്ട് ഒരു പ്രശ്നവും ഇല്ലാത്ത , അവളരെ നിസാരമായി കാണാവുന്ന ഒന്നാണ് അവിഹിതമെന്ന തെറ്റിദ്ധരിക്കരുത്. ഇന്നത്തെ സമൂഹത്തിൽ ജനിച്ച് വളർന്ന, വിവാഹം ഒരേ പങ്കാളിയുമായി മരണം വരെയുള്ള ഒരു കോൺട്രാക്ട് ആണെന്ന് വിശ്വസിക്കുന്ന,  പൂർണമായും തന്റേത് മാത്രമെന്ന് കരുതുന്ന പങ്കാളി താൻ അല്ലാതെ വേറൊരാളെ തേടി പോയി എന്നത് ,ആളുകൾക്ക് ഒരു  ലൈഫ് ലോങ്ങ് ഷോക്ക് ആയിരിക്കും കൊടുക്കുക. ഒരിക്കൽ വിശ്വാസം നഷ്ടപ്പെട്ടാൽ അത് തിരികെ പിടിക്കാനും ഒരു മാർഗവും ഉണ്ടാകില്ല. അവിഹിതം ഉണ്ടാകുന്നതിന് മുന്നേ തന്നെ പ്രശ്നങ്ങൾ തുറന്നു സംസാരിക്കാൻ പറ്റിയ, സോൾവ് ചെയ്യാൻ കഴിയ്യാത്ത പ്രശ്നങ്ങൾ ആണെങ്കിൽ പിരിയാൻ , അല്ലെങ്കിൽ ബന്ധം കൂടുതൽ ദൃഢമാക്കാനുള്ള നടപടികൾ എടുക്കാനൊക്കെ ഉള്ള ബന്ധങ്ങൾ അപൂർവം ചിലരുടെ ഇടയിലെങ്കിലുമുണ്ട്.

ഒരിക്കൽ കൂടി പറയുന്നു, ഇത് എല്ലാവരുടെയും കാര്യമല്ല, ദീര്ഘകാലം സ്നേഹത്തോടെ കഴിയുന്നവരുണ്ട്. അവർക്കിടയിൽ നല്ല, എന്തും പറയാവുന്ന സൗഹൃദങ്ങൾ ഉണ്ട്, തങ്ങളുടെ  ബന്ധം ഊഷ്മളതയോടെ മുന്നോട്ട് കൊണ്ടുപോകാൻ കരുതിക്കൂട്ടി കാര്യങ്ങൾ ചെയ്യുന്നവരുണ്ട്.  ആദ്യത്തെ കൂട്ടർക്ക് തോന്നാത്ത കുറ്റബോധം രണ്ടാമത്തെ ആളുകൾക്ക് വേണ്ട എന്ന് മാത്രമാണ് ഞാൻ പറയാൻ ഉദേശിച്ചത്. നമ്മുടെ ഇഷ്ടങ്ങൾ തുറന്നു പറയാൻ ഇടമില്ലാത്തിടത്താണ് അവിഹിതത്തിന്റെ വിത്തുകൾ പാകപ്പെടുന്നത്.

ഒന്നുകിൽ നമ്മളിൽ ഭൂരിഭാഗവും അവിഹിതക്കാരാണ്, പിടിക്കപ്പെട്ട ചിലരും പിടിക്കപെടാൻ ഇരിക്കുന്നവരും എന്നുള്ള വ്യത്യാസം മാത്രം. പക്ഷെ ഭൂരിഭാഗവും സമൂഹത്തിനും കുടുംബത്തിനും വേണ്ടി പരാജയപ്പെട്ട ഒരു ദാമ്പത്യ ജീവിതം നിശബ്ദം സഹിക്കുന്ന ആളുകളാണ്. നമ്മുടെ സമൂഹത്തിന്റെയും മതങ്ങളുടെയും  സദാചാര ബോധങ്ങൾക്ക് വേണ്ടി സ്വന്തം ജീവിതം ബലിയർപ്പിക്കുന്നവർ.

അവിഹിതം ചെയ്യണമെന്ന് തോന്നിയാൽ അതിന്റെ കാരണങ്ങളെ പറ്റി പരസ്പരം ബഹുമാനത്തോടെ, വിധിക്കാതെ, വിധിക്കപെടാതെ ചർച്ച ചെയ്യാനുള്ള സാഹചര്യം ഉള്ള ബന്ധങ്ങൾ  ആകട്ടെ നമ്മുടേത്. ഇത് പറയാൻ എളുപ്പമാണ്, നടപ്പിലാക്കാൻ വളരെ ബുദ്ധിമുട്ടും. 

നിന്റെ ഭാര്യ വേറെ ഒരാളെ പ്രണയിച്ചാൽ, അവിഹിതം ചെയ്‌താൽ  നീ സമ്മതിക്കുമോ എന്ന് നിങ്ങൾക്ക് എന്നോട് ചോദിയ്ക്കാൻ തോന്നുന്നുണ്ടെങ്കിൽ പോസ്റ്റ് ഒന്നുകൂടെ വായിച്ചുനോക്കുന്നത് നന്നായിരിക്കും എന്ന പരാമര്‍ശത്തോടെയാണ് കുറിപ്പ് അവസാനിക്കുന്നത്.