ഹൃദയാഘാതത്തിന് ശേഷം എപ്പോള്‍ മുതല്‍ വ്യായാമം തുടങ്ങാം? വിദഗ്ദര്‍ പറയുന്നതിങ്ങനെ

ഹൃദയാഘാതമുണ്ടായ ശേഷം ആശുപത്രിയിൽ നിന്നും ഡിസ്ചാർജ് ആയി വീട്ടിലെത്തിയാൽ മിക്കവരുടെയും മനസ്സിൽ വരുന്ന പ്രധാന സംശയങ്ങളിലൊന്നാണ് എപ്പോഴാണ് സാധാരണ ജീവിതത്തിലേക്ക് മടങ്ങാനാകുകയെന്നതും എപ്പോൾ മുതൽ നടക്കാനും വ്യായാമം ചെയ്യാനും തുടങ്ങാമെന്നതും. ഹൃദയാഘാതം ഉണ്ടായതിന് ശേഷമുള്ള ശാരീരിക പ്രവർത്തനങ്ങളെക്കുറിച്ചും വ്യായാമങ്ങളെക്കുറിച്ചും പ്രമുഖ ഹൃദ്രോഗ വിദഗ്ധർ നൽകുന്ന നിർദ്ദേശങ്ങൾ എന്തൊക്കെയാണെന്ന് നോക്കാം.

ഹൃദയാഘാതമുണ്ടായ ശേഷം രോഗി പൂർണ്ണമായും ആരോഗ്യസ്ഥിതി വീണ്ടെടുക്കുകയും മറ്റ് പ്രശ്നങ്ങളൊന്നുമില്ലാതിരിക്കുകയും ചെയ്താൽ, 24 മുതൽ 48 മണിക്കൂറിനുള്ളിൽ തന്നെ ചെറിയ രീതിയിലുള്ള ചലനങ്ങൾ ആരംഭിക്കാം. എഴുന്നേറ്റിരിക്കുക, ചെറിയ രീതിയിൽ മുറിയിലെ നടപ്പ് എന്നിവ ഇതിൽ ഉൾപ്പെടുന്നു. പെട്ടെന്ന് കിടപ്പിലാവുന്നത് മൂലം ശരീരത്തിലുണ്ടാകുന്ന തളർച്ച ഒഴിവാക്കാൻ ഇത് സഹായിക്കും.

ആശുപത്രിയില്‍ നിന്നും വീട്ടിലെത്തിയ ശേഷമുള്ള വ്യായാമങ്ങളിൽ ഏറ്റവും സുരക്ഷിതമായ മാർഗ്ഗം ലഘുവായ നടത്തമാണ്. തുടക്കത്തിൽ ദിവസത്തിൽ ഒന്നോ രണ്ടോ തവണയായി 15 മുതൽ 20 മിനിറ്റ് വരെ സാവധാനം നടക്കാം. ഒഴിഞ്ഞ വയറ്റിൽ നടക്കാൻ ഡോക്ടർമാർ സാധാരണയായി നിർദ്ദേശിക്കാറുണ്ട്. ശരീരത്തിന്റെ അവസ്ഥയ്ക്കനുസരിച്ച് ദിവസങ്ങൾ കഴിയുന്തോറും നടത്തത്തിന്റെ സമയം ക്രമേണ വർദ്ധിപ്പിക്കാം.

ഓരോ വ്യക്തിയുടെയും ഹൃദയത്തിന്റെ ആരോഗ്യസ്ഥിതിയും ഹൃദയാഘാതത്തിന്റെ തീവ്രതയും വ്യത്യാസപ്പെട്ടിരിക്കും. അതിനാൽ കാർഡിയോളജിസ്റ്റിന്റെ കൃത്യമായ ഉപദേശം തേടിയ ശേഷം മാത്രമേ വ്യായാമങ്ങൾ തുടങ്ങാവൂ. നടത്തത്തിനിടയിലോ വ്യായാമ വേളയിലോ നെഞ്ചുവേദനയോ അസാധാരണമായ കിതപ്പോ അനുഭവപ്പെടുകയാണെങ്കിൽ ഉടൻ തന്നെ വ്യായാമം നിർത്തി വിശ്രമിക്കണം. ഭാരം എടുക്കുന്നത്, കഠിനമായ ജിം വർക്കൗട്ടുകൾ, അമിത വേഗതയിലുള്ള ഓട്ടം എന്നിവ ആദ്യ ഘട്ടങ്ങളിൽ പൂർണ്ണമായി ഒഴിവാക്കണം.

ഹൃദയാഘാതത്തിന് ശേഷമുള്ള വീണ്ടെടുപ്പ് എന്നത് ഘട്ടം ഘട്ടമായി നടക്കേണ്ട ഒന്നാണ്. കൃത്യമായ വിശ്രമം, ഡോക്ടറുടെ നിർദ്ദേശപ്രകാരമുള്ള ലഘു വ്യായാമങ്ങൾ, ആരോഗ്യകരമായ ഭക്ഷണക്രമം എന്നിവയിലൂടെ ഭാവിയിൽ ഉണ്ടാകാനിടയുള്ള ഹൃദയപ്രശ്നങ്ങളെ ഒരു പരിധി വരെ പ്രതിരോധിക്കാൻ സാധിക്കുമെന്ന് വിദഗ്ധർ വ്യക്തമാക്കുന്നു.