നിന്‍റെ കണ്ണില്‍ വിരുന്നു വന്നൂ...! സ്ത്രീകളേ നിങ്ങള്‍ കരയൂ, ആശ്വസിപ്പിക്കാന്‍ യുവാക്കളെ തരാം...

കരയാന്‍ തോന്നുമ്പോ ഒന്ന് ഉറക്കെ കരയാനും, ആ കണ്ണീര് തുടച്ചുതരാനും ഒരാള്‍ കൂടെയുണ്ടെങ്കില്‍ നല്ലതല്ലേ? അതും കണ്ണുനീർ തുടച്ചുകൊടുക്കാൻ സുന്ദരന്മാരായ യുവാക്കൾ. ജപ്പാനിലെ ‘ഇകെമെസോ ദാൻഷി’ സർവീസിനെ കുറിച്ച് കേട്ടിട്ടുണ്ടോ? 

വിഷമങ്ങളിങ്ങനെ അലതല്ലി നില്‍ക്കുമ്പോള്‍, ഒന്ന് അലമുറയിട്ട് കരയാന്‍ തോന്നുമ്പോള്‍ ആരെങ്കിലുമൊന്ന് ആശ്വസിപ്പിക്കാന്‍, ഒന്ന് കൂട്ടിരിക്കാന്‍ ഉണ്ടായിരുന്നെങ്കില്‍ എന്ന് ആഗ്രഹിക്കാത്തവരില്ല. സ്വന്തം കാര്യം  നോക്കാന്‍ പെടാപ്പാട് പെടുന്ന സമയത്ത് മറ്റുള്ളവരെ ആശ്വസിപ്പിക്കാനോ, അവരെ കേട്ടിരിക്കാനോ ഒന്നും സമയം കിട്ടണമെന്നില്ല. 

ഓഫീസ് ജോലികളുടെ സമ്മർദം അനുഭവിക്കുന്ന സ്ത്രീകൾക്കായി സുന്ദരന്മാരായ യുവാക്കളെ തന്നെ വാടകയ്‌ക്കെടുക്കാവുന്ന ഒരു സർവീസ് ജപ്പാനിൽ ആരംഭിച്ചിരുന്നുവെന്ന് പറഞ്ഞാൽ വിശ്വസിക്കാനാകുമോ? ‘ഇകെമെസോ ദാൻഷി’ (Ikemeso Danshi) അഥവാ ‘Handsome Weeping Boys’ എന്ന പേരിൽ അറിയപ്പെട്ട ഈ വ്യത്യസ്തമായ സംരംഭം ഒരുകാലത്ത് ലോകമെമ്പാടും വാർത്താപ്രാധാന്യം നേടിയിരുന്നു.

ജാപ്പനീസ് സംരംഭകനായ ഹിരോക്കി തെരായ് അവതരിപ്പിച്ച ഈ സർവീസ് 2015-ലാണ് ടോക്കിയോയിൽ ശ്രദ്ധ നേടിയത്. ജോലിസ്ഥലത്തെ സമ്മർദവും വ്യക്തിപരമായ വിഷമങ്ങളും കാരണം മാനസികമായി തളരുന്ന സ്ത്രീകൾക്ക് മനസ്സുതുറന്ന് സംസാരിക്കാനും കരയാനും വൈകാരിക പിന്തുണ നൽകുക എന്നതായിരുന്നു ഇതിന്‍റെ പ്രധാന ലക്ഷ്യം.

ജാപ്പനീസ് ഭാഷയിലെ ‘ഇകെമെൻ’ എന്ന വാക്കിന് സുന്ദരനായ യുവാവ് എന്നും ‘മെസോമെസോ’ എന്ന വാക്കിന് വിതുമ്പിക്കരയുക എന്നുമാണ് അർഥം. ഈ വാക്കുകൾ ചേർന്നാണ് ‘ഇകെമെസോ’ എന്ന പേര് രൂപപ്പെട്ടത്. പേരുപോലെതന്നെ, സങ്കടപ്പെടുന്നവർക്കൊപ്പം ഇരിക്കാനും അവരുടെ കണ്ണുനീർ സ്നേഹത്തോടെ തുടച്ചുകൊടുക്കാനും തയ്യാറായ സുന്ദരന്മാരായ യുവാക്കളായിരുന്നു ഈ സർവീസിന്‍റെ പ്രത്യേകത.

കമ്പനികൾക്കോ വ്യക്തികൾക്കോ ഈ സേവനം പ്രയോജനപ്പെടുത്താമായിരുന്നു. വ്യത്യസ്ത രൂപഭാവങ്ങളും വ്യക്തിത്വങ്ങളുമുള്ള യുവാക്കളിൽ നിന്ന് ഇഷ്ടമുള്ളയാളെ തിരഞ്ഞെടുക്കാനും അവസരമുണ്ടായിരുന്നു. തുടർന്ന് ഇവർ ഓഫീസുകളിലോ നിശ്ചയിച്ച സ്ഥലങ്ങളിലോ എത്തി ഉപഭോക്താക്കളോടൊപ്പം സമയം ചെലവഴിക്കുകയും അവരുടെ മാനസികവിഷമങ്ങൾ കേൾക്കുകയും ചെയ്യും.

വികാരങ്ങൾ ഉണർത്തുന്ന ദുഃഖകരമായ സിനിമകളും വിഡിയോകളും ഹൃദയസ്പർശിയായ ദൃശ്യങ്ങളും അവതരിപ്പിച്ച് മനസ്സുതുറന്ന് കരയാനുള്ള സാഹചര്യം ഒരുക്കുന്നതും ഈ സേവനത്തിന്റെ ഭാഗമായിരുന്നു. ഉപഭോക്താവ് കരയുമ്പോൾ മൃദുവായ തൂവാലകൊണ്ട് കണ്ണുനീർ തുടച്ചുകൊടുക്കുകയും ആശ്വാസവാക്കുകൾ പറയുകയും ചെയ്യും. മനസ്സിലുള്ള വിഷമങ്ങൾ തുറന്നുപറയാനും മറ്റൊരാൾ ശ്രദ്ധയോടെ കേൾക്കുമ്പോൾ ആശ്വാസം അനുഭവിക്കാനും ഇതിലൂടെ അവസരമൊരുങ്ങിയിരുന്നു.

കണ്ണുനീർ തുടച്ചുകൊടുക്കുക എന്ന ചെറിയ പ്രവൃത്തിക്കപ്പുറം, വൈകാരികമായി തളർന്നിരിക്കുന്ന ഒരാൾക്ക് പരിഗണനയും പിന്തുണയും നൽകുക എന്നതായിരുന്നു ഈ സംരംഭത്തിന്റെ അടിസ്ഥാന ആശയം.

ജപ്പാനിൽ ‘റുയി-കാത്സു’ എന്ന പേരിൽ അറിയപ്പെടുന്ന ഒരു ആശയമുണ്ട്. മനഃപൂർവം കരയാനുള്ള അവസരങ്ങൾ തേടുക എന്നതാണ് ഈ പദത്തിന്‍റെ അർഥം. ദുഃഖകരമായ സിനിമകൾ കാണുക, ഹൃദയസ്പർശിയായ കഥകൾ കേൾക്കുക, വൈകാരിക അനുഭവങ്ങൾ പങ്കുവെയ്ക്കുക തുടങ്ങിയ മാർഗങ്ങളിലൂടെ ഉള്ളിലെ വികാരങ്ങൾ പുറത്തുകൊണ്ടുവരാൻ ശ്രമിക്കുന്ന രീതിയാണിത്.

ജോലിസ്ഥലത്ത് എപ്പോഴും ആത്മവിശ്വാസത്തോടെയും കാര്യക്ഷമതയോടെയും പെരുമാറേണ്ടിവരുന്നവർക്ക് സ്വന്തം സങ്കടങ്ങൾ തുറന്നുപറയാൻ കഴിയാതെ വരാം. ചിലർക്ക് കുടുംബപ്രശ്നങ്ങളും വ്യക്തിപരമായ ആശങ്കകളും ജോലിസമ്മർദവും ഒരേസമയം കൈകാര്യം ചെയ്യേണ്ടിവരാറുണ്ടല്ലോ. അത്തരം സാഹചര്യങ്ങളിൽ കരയാൻ സുരക്ഷിതമായ ഒരിടവും ജഡ്ജ് ചെയ്യാതെ കേൾക്കാൻ ഒരാളും ഉണ്ടായിരിക്കുന്നത് ആശ്വാസകരമായേക്കാം.

ഈ ആവശ്യത്തെ അടിസ്ഥാനമാക്കിയാണ് ഇകെമെസോ ദാൻഷി പോലുള്ള സേവനങ്ങൾ ശ്രദ്ധ നേടിയത്. കരച്ചിലിനെ ദൗർബല്യമായി കാണുന്നതിനുപകരം, വികാരങ്ങൾ പ്രകടിപ്പിക്കാനുള്ള സ്വാഭാവികമായ ഒരു മാർഗമായി കാണാൻ ഈ ആശയം പ്രേരിപ്പിച്ചിരുന്നു.

2015-ലെ മാധ്യമ റിപ്പോർട്ടുകൾ പ്രകാരം ഒരു സെഷന് ഏകദേശം 7,900 ജാപ്പനീസ് യെൻ ആയിരുന്നു ഇതിന്‍റെ കൂലി. ഇത് അക്കാലത്തെ നിരക്കാണ്. നിലവിൽ ഈ സേവനം ലഭ്യമാണോ, നിരക്കിൽ മാറ്റമുണ്ടായിട്ടുണ്ടോ തുടങ്ങിയ കാര്യങ്ങൾ  വ്യക്തതയില്ല