ഫാറ്റി ലിവർ കരളിന്‍റെ മാത്രം പ്രശ്നമായി കാണരുത്; സൂക്ഷിച്ചില്ലെങ്കില്‍ പണി കിട്ടും

ഫാറ്റി ലിവർ  സ്ഥിരീകരിക്കുന്നവര്‍ക്ക്  കാലങ്ങളായി ലഭിച്ചിരുന്നത് ലളിതമായൊരുപദേശമായിരുന്നു. ഭക്ഷണക്രമം ശ്രദ്ധിക്കുക,  ശരീരഭാരം കുറയ്ക്കുക. എന്നാൽ ഈ അവസ്ഥയെക്കുറിച്ചുള്ള കാഴ്ചപ്പാടിൽ വൈദ്യശാസ്ത്രം അടുത്തിടെ വലിയൊരു മാറ്റം വരുത്തിയിട്ടുണ്ട്. ഇത് ഉദരത്തിൽ മാത്രം ഒതുങ്ങിനിൽക്കുന്ന ഒരു അവയവ പ്രശ്നമായിട്ടല്ല ഇപ്പോൾ കണക്കാക്കപ്പെടുന്നത്. യൂറോപ്യൻ മെഡിക്കൽ ജേണലിൽ (EMJ) പ്രസിദ്ധീകരിച്ച വശദമായ ക്ലിനിക്കല്‍ അവലോകനപ്രകാരം രാജ്യാന്തര വിദഗ്ധർ ഇപ്പോൾ ഫാറ്റി ലിവറിനെ  സങ്കീർണ്ണമായ 'മൾട്ടി-സിസ്റ്റം മെറ്റബോളിക് ഡിസോർഡർ' (ശരീരത്തിന്റെ ഉപാപചയ പ്രവർത്തനങ്ങളെ ബാധിക്കുന്ന രോഗം) ആയാണ് പരിഗണിക്കുന്നത്. 

കരളിൽ കൊഴുപ്പ് അടിയുന്നത്  ശരീരത്തിന്‍റെ മൊത്തത്തിലുള്ള ഉപാപചയ പ്രവർത്തനങ്ങൾ സമ്മർദത്തിലാണെന്നതിന്‍റെ സൂചനയാണ്.  ഈ തിരിച്ചറിവ് തുടര്‍ന്നുള്ള പരിശോധനകളിലും  ചികില്‍സയിലും നിര്‍ണായകമാണ്. പതിവ് പരിശോധനകളിൽ കരളിലെ എൻസൈമുകളിൽ മാത്രം ശ്രദ്ധ കേന്ദ്രീകരിക്കുന്നതിന് പകരം ഹൃദയം, വൃക്കകൾ, എൻഡോക്രൈൻ സിസ്റ്റം എന്നിവയെ ഒരേസമയം സംരക്ഷിക്കുന്ന തരത്തിലുള്ള സമീപനത്തിലൂടെയാണ് ഇപ്പോൾ ഡോക്ടര്‍മാര്‍ രോഗികളെ കൈകാര്യം ചെയ്യുന്നത്.

എന്താണ് MASLD?

കരൾ രോഗങ്ങളെക്കുറിച്ച് അറിയാന്‍ ശ്രമിക്കുകയാണെങ്കില്‍ പഴയ പദങ്ങൾക്ക് പകരം MASLD എന്ന പുതിയ ചുരുക്കപ്പേര് ശ്രദ്ധയില്‍പ്പെട്ടിട്ടുണ്ടോ? 'മെറ്റബോളിക് ഡിസ്ഫങ്ഷൻ-അസോസിയേറ്റഡ് സ്റ്റീറ്റോട്ടിക് ലിവർ ഡിസീസ്' (Metabolic Dysfunction-Associated Steatotic Liver Disease) എന്നതിന്റെ ചുരുക്കരൂപമാണിത്. ശരീരം എങ്ങനെയാണ് ഊർജത്തെ സംസ്കരിക്കുന്നതെന്നും ഇൻസുലിൻ നിയന്ത്രിക്കുന്നതെന്നും, വീക്കം കൈകാര്യം ചെയ്യുന്നതെന്നും ഈ പേര് സൂചിപ്പിക്കുന്നു. ഇന്ന് ലോകമെമ്പാടുമുള്ള ഏറ്റവും സാധാരണമായ വിട്ടുമാറാത്ത കരൾ രോഗമാണ് എംഎഎസ്എല്‍ഡി.

കരളിന്‍റെ പ്രശ്നം മാത്രമല്ല ഫാറ്റി ലിവർ

എംഎഎസ്എല്‍ഡി അടിസ്ഥാനപരമായി ഒരു മെറ്റബോളിക് അവസ്ഥയായതിനാൽ അതിന്‍റെ സാന്നിധ്യം  ശരീരത്തിന്‍റെ മൊത്തത്തിലുള്ള പ്രവർത്തനത്തെക്കുറിച്ചുള്ള ഒരു മുന്നറിയിപ്പാണ്. ഇത് ചില ഗുരുതരമായ ആരോഗ്യപ്രശ്നങ്ങളുമായി അടുത്ത ബന്ധം പുലർത്തുന്നു: ഹൃദ്രോഗം, ടൈപ്പ് 2 പ്രമേഹം, വിട്ടുമാറാത്ത വൃക്കരോഗം, കരൾ ക്യാൻസർ,  ഹൃദ്രോഗ സാധ്യത എന്നിവയിലേക്ക് വഴിയൊരുക്കിയേക്കും. എംഎഎസ്എല്‍ഡി ഉള്ളവരിൽ മരണകാരണം കരൾ തകരാറല്ല, മറിച്ച് ഹൃദ്രോഗമാണ്. ഇതിന് പ്രധാന കാരണം ഇൻസുലിൻ പ്രതിരോധമാണ്. ഇത് കരൾ കോശങ്ങളിൽ കൊഴുപ്പ് അടിയാനും ധമനികളിൽ പ്ലാക്ക് അടിഞ്ഞു കൂടാനും ഒരേസമയം കാരണമാകുന്നു.

ടൈപ്പ് 2 പ്രമേഹവും ഫാറ്റി ലിവറും

ടൈപ്പ് 2 പ്രമേഹവും ഫാറ്റി ലിവറും ഒരേ മെറ്റബോളിക് പാതകളാണ് പങ്കിടുന്നത്. ശരീരഭാരം കൂടുമ്പോൾ, കൊഴുപ്പ് സുരക്ഷിതമായി സംഭരിക്കാനുള്ള ശരീരത്തിന്‍റെ കഴിവ് കുറയുകയും, അത് കരൾ പോലുള്ള അവയവങ്ങളിലേക്ക് വ്യാപിക്കുകയും ചെയ്യുന്നു. മോശം രക്തസഞ്ചാര നിയന്ത്രണം കരളിലെ കൊഴുപ്പ് വർദ്ധിപ്പിക്കുകയും, കൊഴുപ്പുള്ള കരൾ രക്തത്തിലെ പഞ്ചസാരയുടെ അളവ് നിയന്ത്രിക്കുന്നത് കൂടുതൽ പ്രയാസകരമാക്കുകയും ചെയ്യുന്നു.

നിശബ്ദമായ കരൾ തകരാറുകൾ

കരളിന് വേദന അനുഭവപ്പെടാത്തതിനാൽ രോഗലക്ഷണങ്ങൾ പ്രകടമാകുന്നതിന് മുമ്പ് തന്നെ അവസ്ഥ വഷളാകാൻ സാധ്യതയുണ്ട്. അതിനാൽ പതിവ് അൾട്രാസൗണ്ട്, രക്ത പരിശോധനകൾ വഴി നേരത്തെയുള്ള കണ്ടെത്തൽ വളരെ പ്രധാനമാണ്.

ഫാറ്റി ലിവർ നിയന്ത്രിക്കാന്‍ എന്തുചെയ്യണം

ജീവിതശൈലിയിലെ മാറ്റങ്ങളിലൂടെയുള്ള ക്രമേണയുള്ള ശരീരഭാരം കുറയ്ക്കൽ കരൾ കൊഴുപ്പ് കുറയ്ക്കാനും വീക്കം മാറ്റാനും സഹായിക്കും. അൾട്രാ-പ്രോസസ്ഡ് ഭക്ഷണങ്ങൾ, ബേക്കറി പലഹാരങ്ങൾ, ഫാസ്റ്റ് ഫുഡ് എന്നിവ ഒഴിവാക്കുക. വീട്ടിലുണ്ടാക്കുന്ന ഭക്ഷണം കഴിക്കാൻ ശ്രദ്ധിക്കുക. പഞ്ചസാര ചേർത്ത പാനീയങ്ങൾ (സോഡ, ജ്യൂസ്) പൂർണ്ണമായും ഒഴിവാക്കുക. വെള്ളം അല്ലെങ്കിൽ ഹെർബൽ ചായകൾ കുടിക്കുക. പച്ചക്കറികൾ, പഴങ്ങൾ, ധാന്യങ്ങൾ, പ്രോട്ടീൻ അടങ്ങിയ ഭക്ഷണങ്ങൾ എന്നിവ ഉൾപ്പെടുത്തുക. രക്തത്തിലെ പഞ്ചസാരയുടെ അളവ് സ്ഥിരമായി നിലനിർത്തുക. ഭാരം കാര്യമായി കുറഞ്ഞില്ലെങ്കിൽ പോലും, കൃത്യമായ വ്യായാമം ഇൻസുലിൻ പ്രതിരോധം കുറയ്ക്കാനും കരളിലെ കൊഴുപ്പ് കുറയ്ക്കാനും സഹായിക്കുന്നു. നടത്തം, സൈക്ലിങ്, നീന്തൽ എന്നിവ മികച്ചതാണ്. ഡോക്ടറുടെ നിർദ്ദേശപ്രകാരം മാത്രം മരുന്നുകൾ ഉപയോഗിക്കുക. ആഴ്ചയിൽ 0.5 മുതൽ 1 കിലോ വരെ ക്രമേണ ഭാരം കുറയ്ക്കാൻ ശ്രമിക്കുന്നത് ഒരു മികച്ച മാര്‍ഗമായി വിദഗ്ധര്‍ നിര്‍ദേശിക്കുന്നു.  ദിവസവും 7-9 മണിക്കൂർ ഉറങ്ങുകയും മാനസിക സമ്മർദ്ദം കുറയ്ക്കുകയും ചെയ്യുക.

ചുരുക്കത്തിൽ, ഫാറ്റി ലിവർ എന്നത് ഒരു അവയവത്തിന്റെ പ്രശ്നമായി മാത്രം കാണാതെ മൊത്തത്തിലുള്ള ആരോഗ്യത്തിന്റെ കണ്ണാടിയായി കണ്ട് ജീവിതശൈലിയിൽ വരുത്തുന്ന മാറ്റങ്ങളിലൂടെ ഇത് ഫലപ്രദമായി നിയന്ത്രിക്കാവുന്നതാണ്.