ചികിത്സയിലുള്ളത് 2 ലക്ഷം പേർ; എച്ച്.ഐ.വി. ബാധിതരുടെ എണ്ണത്തിൽ മുന്നിലുള്ള സംസ്ഥാനങ്ങളില്‍ കർണാടകയും

എച്ച്.ഐ.വി. വ്യാപനം തടയുന്നതിൽ കർണാടക വലിയ വെല്ലുവിളിയാണ് നേരിടുന്നത്. രാജ്യത്ത് ഏറ്റവും കൂടുതൽ എച്ച്.ഐ.വി. ബാധിതരുള്ള മൂന്നാമത്തെ സംസ്ഥാനമാണ് കർണാടക. ഇവിടെ ഏകദേശം 2.60 ലക്ഷം പേർ ഈ രോഗബാധയോടെ ജീവിക്കുന്നുണ്ട്. എന്നാൽ ഇതിൽ 2.05 ലക്ഷം പേർ മാത്രമാണ് ആന്റിറെട്രോവൈറൽ തെറാപ്പി (ART) ചികിത്സ സ്വീകരിക്കുന്നത്. ഈ കണക്കുകൾ വ്യക്തമാക്കുന്നത് ലക്ഷക്കണക്കിന് ആളുകൾ കൃത്യമായ ചികിത്സയ്ക്ക് പുറത്താണെന്നാണ്. യുവാക്കളിലും വിദ്യാർത്ഥികളിലും രോഗവ്യാപനം കൂടുന്ന സാഹചര്യത്തിൽ ആരോഗ്യവകുപ്പ് കർശന ജാഗ്രത പ്രഖ്യാപിച്ചിട്ടുണ്ട്.

എന്തുകൊണ്ട് വിദ്യാർഥികളും യുവാക്കളും?

സംസ്ഥാനത്തിന്‍റെ 'മൊബിലൈസേഷൻ ഫോർ എയ്ഡ്സ് സുരക്ഷ' കാംപെയിന്റെ ഭാഗമായി യുവാക്കൾക്കിടയിൽ ബോധവൽക്കരണം ശക്തമാക്കിയിട്ടുണ്ട്. വിദ്യാർത്ഥികൾക്ക് സ്വന്തം പെരുമാറ്റരീതികളും സമ്പർക്കങ്ങളും വിലയിരുത്താൻ പ്രത്യേക ക്യു.ആർ. കോഡ് സംവിധാനം ഒരുക്കിയിട്ടുണ്ട്. എച്ച്.ഐ.വി. ബാധിച്ചാൽ വർഷങ്ങളോളം പ്രകടമായ ലക്ഷണങ്ങൾ കാണിക്കണമെന്നില്ല. ലക്ഷണങ്ങൾ ഒന്നുമില്ലെങ്കിലും ഇവർ അറിയാതെ രോഗം മറ്റുള്ളവരിലേക്ക് പകർത്താൻ സാധ്യതയുണ്ട്.

രോഗം പകരുന്ന വഴികൾ:

സുരക്ഷിതമല്ലാത്ത ലൈംഗിക ബന്ധം.

രോഗാണുക്കൾ അടങ്ങിയ സൂചികളും സിറിഞ്ചുകളും പങ്കുവെക്കുന്നത്.

രോഗബാധിതമായ രക്തം സ്വീകരിക്കുന്നത്.

ഗർഭകാലത്തും മുലയൂട്ടുന്ന വേളയിലും അമ്മയിൽ നിന്ന് കുട്ടിയിലേക്ക് പകരുന്നത്.

(ശ്രദ്ധിക്കുക: ആലിംഗനം ചെയ്യുക, കൈ കൊടുക്കുക, ഭക്ഷണം പങ്കിടുക തുടങ്ങിയ സാധാരണ ഇടപെടലുകളിലൂടെ എച്ച്.ഐ.വി. ഒരിക്കലും പകരില്ല).

നേരത്തെയുള്ള പരിശോധനയുടെ പ്രാധാന്യം

രോഗബാധ നേരത്തെ കണ്ടെത്തിയാൽ മാത്രമേ കൃത്യസമയത്ത് ചികിത്സ ആരംഭിക്കാൻ കഴിയൂ. ആധുനിക ചികിത്സയിലൂടെ വൈറസിന്‍റെ അളവ് കുറച്ച് രോഗികൾക്ക് സാധാരണ ജീവിതം നയിക്കാൻ സാധിക്കും. എന്നാൽ രോഗമുണ്ടെന്ന് തിരിച്ചറിയാത്തതാണ് പ്രധാന പ്രശ്നം. രഹസ്യ സ്വഭാവത്തിലുള്ള പരിശോധനകൾ വ്യാപിപ്പിക്കേണ്ടത് അതുകൊണ്ടാണ്.

എന്താണ് 95-95-95 പദ്ധതി? എന്താണതിന്‍റെ ലക്ഷ്യം?

ആഗോളതലത്തിലുള്ള എച്ച്.ഐ.വി. പ്രതിരോധ ലക്ഷ്യമാണിത്. 95% രോഗികളും തങ്ങളുടെ രോഗാവസ്ഥ തിരിച്ചറിയുക, തിരിച്ചറിഞ്ഞവരിൽ 95% പേർക്കും മുടങ്ങാതെ ചികിത്സ ലഭിക്കുക, ചികിത്സയിലുള്ള 95% പേരിലും വൈറസിന്‍റെ അളവ് പൂർണ്ണമായി നിയന്ത്രണത്തിലാക്കുക എന്നതാണ് ഈ പദ്ധതിയുടെ ലക്ഷ്യം.

ഐക്യരാഷ്ട്ര സംഘടനയുടെ  കണക്കുപ്രകാരം ലോകമെമ്പാടുമുള്ള 40.9 ദശലക്ഷം എച്ച്.ഐ.വി. ബാധിതരിൽ 78ശതമനമാളുകള്‍ക്കും  ഇപ്പോൾ ചികിത്സല്യഭ്യമാക്കുന്നുണ്ട്. മുൻകാലങ്ങളെ അപേക്ഷിച്ച് ഇത് വലിയ പുരോഗതിയാണ്.

കർണാടകയിലെ യാഥാർഥ്യം

രോഗികളെ കണ്ടെത്തുന്നത് മാത്രല്ല, അവര്‍ക്ക് കൃത്യസമയത്ത് ചികിത്സ ലഭ്യമാക്കുന്നതും പ്രധാനമണ്.  നേരത്തെയുള്ള രോഗനിർണ്ണയവും കൃത്യമായ ചികിത്സയും എച്ച്.ഐ.വി. ഫലപ്രദമായി പ്രതിരോധിക്കാൻ സഹായിക്കും. സമൂഹത്തിലെ മാറ്റിനിർത്തലുകൾ ഒഴിവാക്കി, രഹസ്യ പരിശോധനകൾ പ്രോത്സാഹിപ്പിച്ചാൽ മാത്രമേ 95-95-95 ലക്ഷ്യങ്ങൾ പൂർണ്ണമായി കൈവരിക്കാൻ സാധിക്കൂ.

കർണാടകയിൽ എച്ച്.ഐ.വി. ബാധിതരുടെ എണ്ണവും ചികിത്സ സ്വീകരിക്കുന്നവരുടെ കണക്കുകളും വ്യക്തമാക്കുന്നത് സംസ്ഥാനത്തിന്‍റെ പ്രതിരോധ പ്രവര്‍ത്തനങ്ങളിലെ വലിയ പുരോഗതിയും അതേസമയം പരിഹരിക്കപ്പെടേണ്ട നിരവധി പോരായ്മകളുമാണ്. നേരത്തെ രോഗം കണ്ടെത്തി കൃത്യമായി ചികിത്സിച്ചാൽ എച്ച്.ഐ.വി. ഒരു പരിധി വരെ നിയന്ത്രിച്ചു നിർത്താൻ കഴിയും. രഹസ്യ സ്വഭാവത്തിലുള്ള പരിശോധനകൾ വ്യാപിപ്പിക്കേണ്ടത് അത്യാവശ്യമാണ്. രോഗവുമായി ബന്ധപ്പെട്ട സാമൂഹിക കളങ്കം കുറയ്ക്കാൻ സമൂഹം തയ്യാറാകണം. രോഗബാധ സ്ഥിരീകരിക്കുന്നവരെ ഉടൻ തന്നെ ചികിത്സയുമായി ബന്ധിപ്പിക്കേണ്ടതുണ്ട്. ഈ നടപടികളിലൂടെ മാത്രമേ വിടവുകൾ നികത്താനും 95-95-95 ലക്ഷ്യങ്ങളിലേക്ക് എത്താനും സാധിക്കൂ.