ഫ്രാന്‍സില്‍ പരക്കെ കര്‍ഫ്യു; ‘പാരിസ് മുസ്‍ലിം സിറ്റി ആകും’; അനുഭവിച്ചോ എന്ന് ട്രംപ്

കലാപത്തില്‍ ആളിക്കത്തുകയാണ് ഫ്രാന്‍സിന്‍റെ തലസ്ഥാനമായ പാരിസ്. വർധിച്ചുവരുന്ന ജീവിതചിലവ്, ഇന്ധനവില, വിദ്യാഭ്യാസ മേഖലയിലെ പ്രതിസന്ധികൾ എന്നിവയ്‌ക്കെതിരെ തുടങ്ങിയ സമാധാനപരമായി തുടങ്ങിയ ജനകീയ പ്രക്ഷോഭം വളരെ പെട്ടെന്നാണ് രാജ്യത്തെ പിടിച്ചുകുലുക്കിയ കടുത്ത അക്രമങ്ങളിലേക്കും കലാപങ്ങളിലേക്കും വഴിമാറിയത്. ഇതിന് പിന്നാലെ ഫ്രാന്‍സിലെ കുടിയേറ്റ നയങ്ങളെയും പ്രസിഡന്‍റ് ഇമ്മാനുവല്‍ മക്രോയെയും വിമര്‍ശിച്ച് രംഗത്തെത്തിയിരിക്കുകയാണ് യുഎസ് പ്രസിഡന്‍റ് ഡോണള്‍ഡ് ട്രംപ്. 

പ്രസിഡന്‍റ് ഇമ്മാനുവല്‍ മക്രോ ഫ്രാൻസിന്‍റെ അതിർത്തികൾ കൃത്യമായി സംരക്ഷിക്കാതെ ലോകത്തിന്‍റെ എല്ലാ ഭാഗങ്ങളിൽ നിന്നുമുള്ള ആളുകളെ രാജ്യത്തേക്ക് വരാൻ അനുവദിച്ചത് വലിയ തെറ്റാണെന്ന് ആരോപിച്ചാണ് ട്രംപിന്‍റെ പരാമര്‍ശം. 

'ഫ്രാൻസിൽ വലിയൊരു തെറ്റാണ് ചെയ്യുന്നതെന്ന് ഞാൻ മക്രോയോട് പണ്ടേ പറഞ്ഞിട്ടുള്ളതാണ്. നിങ്ങൾ ലോകത്തെ എല്ലാവരെയും ഇങ്ങോട്ട് വരാൻ അനുവദിക്കുകയാണ്. നിങ്ങൾക്കറിയാവുന്നത് പോലെ, പാരിസ് വളരെ പെട്ടെന്ന് തന്നെ ഒരു മുസ്‍ലിം  നഗരമായി മാറാൻ പോവുകയാണ്" എന്നായിരുന്നു ട്രംപിന്‍റെ വിവാദ പ്രസ്താവന. ഇപ്പോൾ നടക്കുന്ന സ്കൂൾ പ്രക്ഷോഭങ്ങൾക്കോ സാമ്പത്തിക പ്രതിസന്ധികൾക്കോ കാരണം അടിസ്ഥാന പ്രശ്നങ്ങളല്ലെന്നും, മറിച്ച് അനിയന്ത്രിതമായ കുടിയേറ്റമാണ് നിലവിലെ അക്രമങ്ങൾക്ക് പ്രധാന കാരണമെന്നും അദ്ദേഹം കൂട്ടിച്ചേർത്തു. തങ്ങൾ അമേരിക്കയുടെ അതിർത്തികൾ ശക്തമായി അടച്ചപ്പോൾ ഫ്രാൻസ് അതിന് തയ്യാറാകാത്തതാണ് അവർ ഇപ്പോൾ അനുഭവിക്കുന്ന പ്രതിസന്ധിക്ക് കാരണമെന്നും ട്രംപ് അവകാശപ്പെട്ടു. 
ബോംബ് ഭീഷണി; ഇസ്രയേല്‍–വിയന്ന വിമാനത്തിന് അടിയന്തര ലാന്‍ഡിങ്...

ഇതിനിടെ കലാപവും കൊള്ളയും രൂക്ഷമായതോടെ ഫ്രാൻസിലെ പ്രധാന നഗരങ്ങളിൽ ആവശ്യമെങ്കിൽ കർഫ്യൂ ഏർപ്പെടുത്താൻ പ്രാദേശിക ഭരണകൂടങ്ങൾക്ക് നിർദേശം നൽകിയിരിക്കുകയാണ് പ്രധാനമന്ത്രി സെബാസ്റ്റ്യൻ ലെകോർനു. രാജ്യവ്യാപകമായി കർഫ്യൂവോ അടിയന്തരാവസ്ഥയോ പ്രഖ്യാപിക്കില്ലെന്ന് പ്രധാനമന്ത്രി വ്യക്തമാക്കിയെങ്കിലും സ്ഥിതിഗതികൾ കൂടുതൽ വഷളാകുമെന്ന ആശങ്ക ശക്തമാണ്. പ്രതിഷേധങ്ങൾ നിയന്ത്രിക്കാനുള്ള സർക്കാർ നീക്കങ്ങൾക്കിടെ നവംബർ 5ന് രാജ്യവ്യാപക പണിമുടക്ക് നടത്തുമെന്ന് തൊഴിലാളി യൂണിയനുകൾ പ്രഖ്യാപിച്ചു.

പ്രക്ഷോഭത്തിനിടെയുണ്ടായ അക്രമങ്ങളിൽ ഫ്രാൻസിലുടനീളം ആയിരത്തോളം  പൊലീസ് ഉദ്യോഗസ്ഥർക്കും നൂറുകണക്കിന് ഫയർഫോഴ്സ് ജീവനക്കാർക്കും പരുക്കേറ്റിട്ടുണ്ട്. ഇതിൽ ഏഴു പേരുടെ നില അതീവ ഗുരുതരമാണ്. പ്രക്ഷോഭത്തിന്‍റെ ആദ്യ ഘട്ടങ്ങളിൽ മാത്രം (ഒക്ടോബർ 13 വരെയുള്ള കണക്ക് പ്രകാരം) 200-ലധികം വിദ്യാർഥികൾക്കും 147 അധ്യാപകർക്കും പരുക്കേറ്റിരുന്നു. ഒക്ടോബർ 17-ലെ പ്രധാന കലാപത്തിന് ശേഷം നൂറുകണക്കിന് ആളുകൾക്ക് പരുക്കേറ്റതായാണ് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നത്.  കഴിഞ്ഞദിവസത്തെ  കൊള്ളയ്ക്കും അക്രമങ്ങൾക്കും പിന്നിൽ സുരക്ഷാ സേനയുടെ തയാറെടുപ്പിലെ വീഴ്ചയെന്ന് ആരോപിച്ച് പ്രധാന നഗരങ്ങളിലെ മേയർമാർ സർക്കാരിൽ നിന്ന് വിശദീകരണം തേടി.