പാക്കിസ്ഥാനിലെ പെഷാവറില്‍ സ്കൂളിന്റെ മേല്‍ക്കൂര തകര്‍ന്ന് 27 കുട്ടികളും അധ്യാപികയും മരിച്ചു. 13 വയസില്‍ താഴെയുള്ളവരാണ് മരിച്ച കുട്ടികളെല്ലാം. നാല്‍പ്പതിലേറെപ്പേര്‍ക്ക് അപകടത്തില്‍ സാരമായി പരുക്കേറ്റു. അവശിഷ്ടങ്ങള്‍ക്കിടയില്‍ നിന്ന് പുറത്തെടുത്ത കുട്ടികളെയും അധ്യാപകരെയും പെഷാവര്‍ നഗരത്തില്‍ ലേഡി റീഡിങ് ആശുപത്രിയില്‍ എത്തിച്ചെങ്കിലും അധികം പേരെ രക്ഷിക്കാനായില്ല. 28 മരണം സ്ഥിരീകരിച്ചെന്ന് ആശുപത്രി വക്താവ് മുഹമ്മദ് അസിം അറിയിച്ചു.
രാവിലെ കുട്ടികള്‍ ക്ലാസ് മുറികളില്‍ ഇരുന്ന് പഠിക്കുമ്പോഴാണ് അപകടമുണ്ടായത്. അവശിഷ്ടങ്ങള്‍ക്കിടയില്‍പ്പെട്ടവരെ രക്ഷിക്കാനുള്ള ശ്രമം തുടരുകയാണ്. ഏറ്റവും മുകളിലെ നിലയുടെ മേല്‍ക്കൂര തകര്‍ന്ന് തൊട്ടുതാഴെയുള്ള നിലയില്‍ പതിക്കുകയും രണ്ട് നിലകളും തകരുകയുമാണ് ചെയ്തതെന്ന് രക്ഷപെട്ടവര്‍ പറഞ്ഞു. നിര്‍മാണത്തിലെ വീഴ്ചയാണ് അപകടത്തിന് വഴിവച്ചതെന്നാണ് നിഗമനം.
പാക്കിസ്ഥാനില്‍ സ്കൂളുകള്‍ അടക്കമുള്ള പൊതു കെട്ടിടങ്ങളുടെ മേല്‍ക്കൂര തകര്‍ന്നുള്ള അപകടങ്ങള്‍ തുടര്‍ക്കഥയാണെന്ന് പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു. ജൂലൈയില്‍ ഉമര്‍കോട്ടില്‍ ഗവണ്‍മെന്‍റ് പ്രൈമറി സ്കൂളിന്റെ മതില്‍ തകര്‍ന്നുവീണ് മൂന്ന് കുട്ടികള്‍ മരിച്ചിരുന്നു. അതേമാസം ലഹോറിലെ ഭഗ്‍വാന്‍പുരയില്‍ നിര്‍മാണത്തിലിരുന്ന സ്വകാര്യ സ്കൂള്‍ കെട്ടിടം തകര്‍ന്ന് ഒരു കുട്ടി മരിക്കുകയും അഞ്ച് കുട്ടികള്‍ക്ക് പരുക്കേല്‍ക്കുകയും ചെയ്തിരുന്നു.
ജൂണില്‍ ലഹോറിലെ തന്നെ കാനാ മേഖലയില്‍ സ്വകാര്യ ട്യൂഷന്‍ സെന്‍റര്‍ കെട്ടിടം തകര്‍ന്ന് 14 കുട്ടികളും ദേരാ ഖാസി ഖാനിലെ സ്വകാര്യ സ്കൂളിന്റെ മേല്‍ക്കൂര തകര്‍ന്ന് 20 കുട്ടികളും കൊല്ലപ്പെട്ടിരുന്നു. കഴിഞ്ഞയാഴ്ച പക്പട്ടാനില്‍ വീടിന്‍റെ മേല്‍ക്കൂര തകര്‍ന്ന് രണ്ടുപേരും കൊല്ലപ്പെട്ടു.