അമേരിക്കയിൽ നവംബർ 3-ന് നടക്കുന്ന മിഡ്ടേം തിരഞ്ഞെടുപ്പ് മുന്നിൽ കണ്ട് ആഗോളതലത്തിൽ എണ്ണവില വർധിപ്പിക്കാനാണ് യമനിലെ ഹൂതി വിമതർ സൗദി അറേബ്യയ്ക്ക് നേരെ ആക്രമണം നടത്തുന്നതെന്ന് യു.എസ് പ്രസിഡന്റ് ഡൊണാൾഡ് ട്രംപ്. ഇറാനുമായുള്ള യുഎസ് യുദ്ധം മേഖലയിൽ ശക്തമായിരിക്കെ, സൗദിക്ക് നേരെ ഹൂതികൾ നടത്തുന്ന ഈ നീക്കങ്ങൾ വിനാശകരമാണെന്നും അവരുടെ പ്രവർത്തികൾ താൻ ഒരിക്കലും മറക്കില്ലെന്നും ട്രംപ് മുന്നറിയിപ്പ് നൽകി. തന്റെ സോഷ്യൽ മീഡിയ പ്ലാറ്റ്‌ഫോമായ 'ട്രൂത്ത് സോഷ്യലിൽ' (Truth Social) പങ്കുവെച്ച കുറിപ്പിലാണ് ട്രംപ് ഹൂതികൾക്കെതിരെ രൂക്ഷവിമർശനവുമായി രംഗത്തെത്തിയത്.
ഇറാന്റെ നിർദ്ദേശപ്രകാരമാണ് ഹൂതികൾ മേഖലയിൽ വീണ്ടും ആക്രമണം ശക്തമാക്കിയിരിക്കുന്നതെന്ന് ട്രംപ് ആരോപിച്ചു. യുഎസ് മിഡ്ടേം തിരഞ്ഞെടുപ്പ് കഴിഞ്ഞാലും താൻ ഇവിടെത്തന്നെയുണ്ടാകുമെന്നും ഹൂതികളുടെ ഇത്തരം അക്രമങ്ങൾ മറക്കില്ലെന്നും അദ്ദേഹം കുറിച്ചു. റിയാദിലെ കിംഗ് ഖാലിദ് അന്താരാഷ്ട്ര വിമാനത്താവളത്തിന് നേരെ നടന്ന ആക്രമണത്തിൽ 13 പേർ കൊല്ലപ്പെടുകയും 300-ലധികം പേർക്ക് പരുക്കേൽക്കുകയും ചെയ്തിരുന്നു.
ഈ ആക്രമണത്തെ തുടർന്ന് വിമാനത്താവളത്തിന്റെ പ്രവർത്തനം താത്കാലികമായി നിർത്തിവെക്കേണ്ടി വന്നു. പ്രശ്നപരിഹാരത്തിനായി സൗദി അറേബ്യയുടെ താൽപ്പര്യങ്ങൾ സംരക്ഷിക്കാൻ തുർക്കി പ്രസിഡന്റ് റജബ് തയ്യിപ് എർദോഗന്റെ സഹായം തേടിയേക്കുമെന്നും, താൻ ആവശ്യപ്പെട്ടാൽ എർദോഗൻ അത് ചെയ്യുമെന്നാണ് കരുതുന്നതെന്നും ട്രംപ് വ്യക്തമാക്കി.
2014 മുതൽ യമനിൽ ആഭ്യന്തരയുദ്ധം നടത്തുന്ന ഹൂതി വിമതർ, നിലവിൽ ചെങ്കടലിലും തന്ത്രപ്രധാനമായ ബാബ് അൽ-മന്ദബ് കടലിടുക്കിലും വാണിജ്യ കപ്പലുകൾക്ക് നേരെയും ആക്രമണം കടുപ്പിച്ചിരിക്കുകയാണ്. ഇത് ആഗോള എണ്ണ വിതരണത്തെയും കപ്പൽ ഗതാഗതത്തെയും പ്രതികൂലമായി ബാധിക്കുമെന്ന ആശങ്ക ശക്തമാക്കിയിട്ടുണ്ട്.