ആഗോള കാലാവസ്ഥയെ മാറ്റിമറിക്കും; ചരിത്രത്തിലെ ഏറ്റവും ശക്തമായ എൽ നിനോ വരുന്നു

ചരിത്രത്തിലെ ഏറ്റവും ശക്തമായ എൽ നിനോ വരുന്നു. 2027 വരെ തുടരുമെന്ന് ലോക കാലാവസ്ഥാ സംഘടനയുടെ മുന്നറിയിപ്പ്. ആഗോള കാലാവസ്ഥയെ മാറ്റിമറിക്കാൻ ശേഷിയുള്ള എൽ നിനോ പ്രതിഭാസം കൂടുതൽ തീവ്രമായി മാറുന്നുവെന്നും ഇത് 2027 വരെ നീണ്ടുനിൽക്കാൻ സാധ്യതയുണ്ടെന്നും ലോക കാലാവസ്ഥാ സംഘടന (WMO) മുന്നറിയിപ്പ് നൽകി. ചരിത്രത്തിൽ രേഖപ്പെടുത്തിയിട്ടുള്ളതിൽ വച്ച് ഏറ്റവും ശക്തമായ എൽ നിനോയായി ഇത് മാറിയേക്കാമെന്നാണ് കാലാവസ്ഥാ നിരീക്ഷകരുടെ വിലയിരുത്തൽ.  

100% സാധ്യത; പസഫിക് സമുദ്രം തിളച്ചുമറിയുന്നു

2027 ഫെബ്രുവരി വരെ എൽ നിനോ തുടരാൻ ഏതാണ്ട് 100 ശതമാനം സാധ്യതയുണ്ടെന്നാണ് ഐക്യരാഷ്ട്രസഭയുടെ കാലാവസ്ഥാ ഏജൻസി വ്യക്തമാക്കുന്നത്. മധ്യ കിഴക്കൻ ഉഷ്ണമേഖലാ പസഫിക് സമുദ്രോപരിതലത്തിലെ താപനില സാധാരണയേക്കാൾ രണ്ട് ഡിഗ്രി സെൽഷ്യസിലധികം ഉയർന്ന നിലയിലാണ്. ചില മേഖലകളിൽ അടിത്തട്ടിലെ താപനില സാധാരണയേക്കാൾ 8 ഡിഗ്രി സെൽഷ്യസ് വരെ ഉയർന്നതായി കണ്ടെത്തിയിട്ടുണ്ട്. ഈ അസാധാരണ ചൂട് എൽ നിനോ പ്രതിഭാസത്തിന്റെ തീവ്രത വർധിപ്പിക്കാൻ കാരണമാകുന്നു.  

തീവ്ര കാലാവസ്ഥയും ചൂടും വർധിക്കും എൽ നിനോ ശക്തിപ്പെടുന്നതോടെ ലോകമെമ്പാടും അപ്രതീക്ഷിത കാലാവസ്ഥാ വ്യതിയാനങ്ങൾക്ക് കളമൊരുങ്ങും. ചില ഭൂഖണ്ഡങ്ങളിൽ മഴ തീർത്തും കുറഞ്ഞ് വരൾച്ചയ്ക്ക് കാരണമാകുമ്പോൾ, മറ്റു ചിലയിടങ്ങളിൽ അതിതീവ്ര മഴയ്ക്കും വെള്ളപ്പൊക്കത്തിനും വഴിവെക്കും. സമുദ്ര താപനില ഉയരുന്നത് സമുദ്രക്ഷോഭത്തിനും ശക്തമായ ചുഴലിക്കാറ്റുകൾക്കും  ആക്കം കൂട്ടും.   

‘2027 ഏറ്റവും ചൂടേറിയ വർഷമായേക്കാം‘

ഏറ്റവും കൂടുതൽ ചൂട് രേഖപ്പെടുത്തിയ മുൻ റെക്കോർഡുകളെല്ലാം മറികടന്ന് 2027 ചരിത്രത്തിലെ ഏറ്റവും ചൂടേറിയ വർഷമായി മാറാൻ സാധ്യതയുണ്ടെന്ന് വിദഗ്ധർ ചൂണ്ടിക്കാട്ടുന്നു. കാർഷിക മേഖല, ജലലഭ്യത, പൊതുജനാരോഗ്യം, ഊർജ്ജ മേഖല എന്നിവയെ എൽ നിനോ ദോഷകരമായി ബാധിക്കാൻ ഇടയുള്ളതിനാൽ ലോകരാജ്യങ്ങൾ അടിയന്തരമായി മുന്നൊരുക്കങ്ങൾ ആരംഭിക്കണമെന്ന് WMO ആവശ്യപ്പെട്ടു. കുടിവെള്ള ക്ഷാമം, ഭക്ഷ്യസുരക്ഷാ പ്രതിസന്ധി, താപതരംഗം മൂലമുള്ള ആരോഗ്യ പ്രശ്നങ്ങൾ എന്നിവ തടയാൻ ദുരന്തനിവാരണ സംവിധാനങ്ങളും കാലാവസ്ഥാ കേന്ദ്രങ്ങളും ഏകോപിച്ച് പ്രവർത്തിക്കേണ്ടതുണ്ടെന്നും സംഘടന ഓർമ്മിപ്പിക്കുന്നു.