കാനഡയുടെ 'ലേക്ക് ഒന്‍റേറിയോ'യെ 'ലേക്ക് അമേരിക്ക'യെന്ന് പേരുമാറ്റി ട്രംപ്! ഉത്തരവില്‍ ഒപ്പിട്ടു; പോര് മുറുകുന്നു

വ്യാപര യുദ്ധം രൂക്ഷമായതിന് പിന്നാലെ കാനഡയെ പ്രകോപിപ്പിക്കാന്‍ 'ലേക്ക് ഒന്‍റേറിയോ'യുടെ പേര് മാറ്റി യുഎസ് പ്രസിഡന്‍റ് ഡോണള്‍ഡ് ട്രംപ്. 'ലേക്ക് അമേരിക്ക'യെന്ന് നാമകരണം ചെയ്തുള്ള ഉത്തരവില്‍ ട്രംപ് ഒപ്പുവച്ചു.  യുഎസിനും കാനഡയ്ക്കും ഇടയിലൂടെ ഒഴുകുന്ന 'ലേക്ക് ഒന്‍റേറിയോ'യുടെ 52 ശതമാനവും കാനഡയിലാണുള്ളത്. ഓവല്‍ ഓഫിസില്‍ മാധ്യമങ്ങളെ കണ്ടപ്പോഴാണ് 'ലേക്ക് ഒന്‍റേറിയോ''യുടെ പേര് മാറ്റുന്നുവെന്ന് ട്രംപ് പ്രഖ്യാപിച്ചത്. 'കുറേക്കാലമായി ഞാന്‍ മാറ്റാനിരുന്ന പേരാണിത്. 'ലേക്ക് ഓഫ് അമേരിക്ക' എന്നാകും ഇനി അറിയപ്പെടുക'- ട്രംപ് വിശദീകരിച്ചു.

അതേസമയം, ട്രംപിന്‍റെ പേരുമാറ്റത്തെ കാനഡ തള്ളി. 400 വര്‍ഷം പഴക്കമുള്ള പേരാണ് 'ലേക്ക് ഒന്‍റേറിയോ' എന്നതെന്നും കാനഡയും യുഎസും പോലും നിലവിലില്ലാതിരുന്ന കാലത്തേതാണെന്ന് ചരിത്രം പറയുന്നുവെന്നും കാനഡ പ്രധാനമന്ത്രി മാര്‍ക് കാര്‍ണി സമൂഹമാധ്യമമായ എക്സില്‍ കുറിച്ചു. 'വെന്‍ഡറ്റ് പദമായ ഒന്‍റേറിയോ എന്ന വാക്കിന്‍റെ അര്‍ഥം മനോഹരമെന്നാണ്. അതില്‍ നിന്നാണ് ലേക്കിന് ആ പേര് ലഭിച്ചത്. കനേഡിയന്‍ കോണ്‍ഫെഡറേഷനും യുണൈറ്റഡ് സ്റ്റേറ്റ്സ് ഓഫ് അമേരിക്കയും നിലവില്‍ വരുന്നതിന് മുന്‍പേ പിറന്ന പേരാണിത്'- കാര്‍ണി വ്യക്തമാക്കി. ' യുഎസ്  മാറിക്കൊണ്ടിരിക്കുകയാണെന്ന് നമുക്കറിയാം. അവരുടെ വ്യാപാര ബന്ധങ്ങള്‍, വിദേശനയം, ദേശീയ സ്മാരകങ്ങള്‍, ഇതെല്ലാം മാറുകയാണ്. കാനഡയിലെ ജനങ്ങള്‍ക്ക് എല്ലാത്തിനെയും അതതിന്‍റെ പേരില്‍ വിളിക്കാനറിയാം. ഈ തടാകം എന്നും ഒന്‍റേറിയോ തടാകം തന്നെയായിരുന്നു. ഇന്നും, എന്നും എപ്പോഴും'- കാര്‍ണി കാനഡയുടെ നിലപാട് വ്യക്തമാക്കി.

നേരത്തെ 'ഗള്‍ഫ് ഓഫ് മെക്സിക്കോ'യുടെ പേര് 'ഗള്‍ഫ് ഓഫ് അമേരിക്ക'യെന്ന് മാറ്റിയ ട്രംപിന്‍റെ നടപടിയും ഏറെ വിമര്‍ശനം നേരിട്ടിരുന്നു. അതേസമയം വ്യാപാര യുദ്ധത്തിന്‍റെ തുടര്‍ച്ചയാണിതെന്നാണ് രാജ്യാന്തര മാധ്യമങ്ങള്‍ റിപ്പോര്‍ട്ട് ചെയ്യുന്നത്. 20 ബില്യണ്‍ വരുന്ന കാനഡയുടെ ഉല്‍പന്നങ്ങള്‍ക്ക് 50 ശതമാനം ഇറക്കുമതി തീരുവയാണ് വാഷിങ്ടണ്‍ ഏര്‍പ്പെടുത്തിയത്. ഇതിന് പകരമായി 700 യുഎസ് ഉല്‍പ്പന്നങ്ങള്‍ക്ക് 15 മുതല്‍ 50 ശതമാനം വരെ തീരുവ കാന‍ഡയും ഏര്‍പ്പെടുത്തി. സെപ്റ്റംബര്‍ എട്ടിനാണ് കാനഡ ഏര്‍പ്പെടുത്തിയ തീരുവ പ്രാബല്യത്തില്‍ വരിക.