ലൈംഗികാരോപണത്തില്‍ നടപടി; ആന്‍ഡ്രൂ ഇനി 'രാജകുമാരനല്ല'! വസതിയില്‍ നിന്നും പുറത്ത്

ലൈംഗികക്കുറ്റവാളിയെന്ന് പേരുകേട്ട ജെഫ്രി എപ്സ്റ്റൈനുമായുള്ള 'ചങ്ങാത്ത'ത്തില്‍ ആന്‍ഡ്രൂ രാജകുമാരന് രാജകീയ പദവികളെല്ലാം നഷ്ടം. ബ്രിട്ടനിലെ ചാൾസ് മൂന്നാമൻ രാജാവിന്റെ ഇളയ സഹോദരനായ ആന്‍ഡ്രു വിൻഡ്സർ കൊട്ടാരവളപ്പിലെ റോയൽ ലോഡ്ജിൽ നിന്നും പുറത്താകുകയും ചെയ്തു. ആന്‍ഡ്രുവിന്‍റെ എല്ലാ രാജകീയ പദവികളും റദ്ദാക്കിയതായി കൊട്ടാരം പ്രസ്താവനയില്‍ അറിയിച്ചു.

'ആന്‍ഡ്രൂ രാജകുമാരന്‍ ഇനിമേല്‍ ആന്‍ഡ്രൂ മൗണ്ട് ബാറ്റണ്‍ വിന്‍ഡ്സര്‍ എന്നാകും അറിയപ്പെടുകയെന്നും വിന്‍ഡ്സറിലെ കൊട്ടാരത്തില്‍ നിന്നും സ്വകാര്യവസതിയിലേക്ക് അദ്ദേഹം താമസം മാറുന്നതായും പ്രസ്താവനയില്‍ പറയുന്നു. ആരോപണങ്ങളെല്ലാം ആന്‍ഡ്രൂ നിഷേധിക്കുന്നുണ്ടെങ്കിലും അതിജീവിതര്‍ക്ക് ഒപ്പമാണ് എക്കാലവും കൊട്ടാരം നിലകൊള്ളുന്നതെന്നും പ്രസ്താവനയില്‍ പറയുന്നു.

കുപ്രസിദ്ധ സെക്സ് ടേപ്പുകളില്‍ ഇടംപിടിച്ചതിന് പിന്നാലെ യോർക്ക് ഡ്യൂക്ക് എന്ന സ്ഥാനപ്പേരും മറ്റ് രാജകീയ ബഹുമതികളും ആൻഡ്രൂ സ്വമേധയാ ഉപേക്ഷിച്ചിരുന്നു. മുന്‍ ഭാര്യ സാറ ഫെര്‍ഗൂസനൊപ്പം റോയല്‍ ലോഡ്ജില്‍ കഴിഞ്ഞിരുന്ന ആന്‍ഡ്രൂ നോര്‍ഫ്ലോക് കൗണ്ടിയിലെ സാന്‍ഡ്രിങാം എസ്റ്റേറ്റിലേക്ക് താമസം മാറി. ഈ വസതിയും ചാള്‍സ് മൂന്നാമന്‍ രാജാവിന്‍റേതാണ്. 2021ലാണ് ജെഫ്രി എപ്സ്റ്റൈന്‍ കേസിലെ അതിജീവിതമാരില്‍ ഒരാള്‍ ആന്‍ഡ്രുവിനെതിരെ ആരോപണവുമായി രംഗത്തെത്തിയത്. കൗമാരക്കാരിയായിരുന്ന തന്നെ ആന്‍ഡ്രൂ രാജകുമാരന്‍ ലൈംഗികമായി ദുരുപയോഗം ചെയ്തുവെന്നും എപ്സ്റ്റൈനാണ് തന്നെ ചതിയില്‍പ്പെടുത്തി ആന്‍ഡ്രുവിനടുത്തേക്ക് എത്തിച്ചതെന്നുമായിരുന്നു വെളിപ്പെടുത്തല്‍. ഇതിന് പിന്നാലെ യുവതി ജീവനൊടുക്കുകയും ചെയ്തിരുന്നു.