ഷാർജയിൽ പട്ടാപ്പകൽ കാർ കവർന്നു; മിനിറ്റുകൾക്കുള്ളിൽ പ്രതിയെ പിടികൂടി പൊലീസ്

ഷാർജയുടെ തിരക്കേറിയ റോഡിൽ പട്ടാപ്പകൽ നടന്ന കാർ മോഷണം മിനിറ്റുകൾക്കുള്ളിൽ പൊളിച്ചടുക്കി ഷാർജ പോലീസ്. ഒരു നിമിഷത്തെ അശ്രദ്ധയിൽ നഷ്ടപ്പെട്ട വാഹനം അത്യാധുനിക നിരീക്ഷണ സംവിധാനങ്ങളുടെ സഹായത്തോടെയാണ് മണിക്കൂറുകൾക്കുള്ളിൽ പോലീസ് വീണ്ടെടുത്തത്. കുറ്റവാളികൾക്ക് രക്ഷപെടാൻ പഴുതുകളില്ലാത്ത വിധം ഷാർജ പോലീസ് നടത്തിയ ഹൈടെക് അന്വേഷണത്തിന്റെ വിശദാംശങ്ങളിലേക്ക്.

യുഎഇ സ്വദേശിയായ യുവാവിന്റെ കാറാണ് അശ്രദ്ധയെത്തുടർന്ന് കവർച്ച ചെയ്യപ്പെട്ടത്. റോഡരികിൽ പാർക്ക് ചെയ്ത ശേഷം യുവാവ് സമീപത്തെ കടയിലേക്ക് പോയ തക്കം നോക്കിയായിരുന്നു മോഷ്ടാവിന്റെ നീക്കം. വാഹനം ലോക്ക് ചെയ്യാതിരുന്നതും വിൻഡോ ഗ്ലാസ് ഭാഗികമായി താഴ്ത്തി വെച്ചതും മോഷ്ടാവിന് കാര്യങ്ങൾ എളുപ്പമാക്കി.

നിമിഷങ്ങൾക്കുള്ളിൽ തിരികെ എത്തിയ ഉടമ, മറ്റൊരാൾ കാർ ഓടിച്ചു പോകുന്നത് കണ്ട് പകച്ചുപോയി. പരിഭ്രാന്തനായ യുവാവ് വാഹനത്തിന് പിന്നാലെ ഓടിയെങ്കിലും മോഷ്ടാവ് അതിവേഗം കാറുമായി കടന്നുകളയുകയായിരുന്നു. ഉടൻതന്നെ വിവരം ഷാർജ പോലീസിൽ അറിയിച്ചതോടെ ഉന്നത ഉദ്യോഗസ്ഥരുടെ നേതൃത്വത്തിൽ മിന്നൽ വേഗത്തിലുള്ള തിരച്ചിൽ ആരംഭിച്ചു. സമീപത്തെ വ്യാപാര സ്ഥാപനങ്ങളിലെ സിസിടിവി ക്യാമറകൾ പരിശോധിച്ചപ്പോൾ പ്രതിയുടെ മുഖം വ്യക്തമായി ദൃശ്യങ്ങളിൽ പതിഞ്ഞത് പോലീസിന് തുണയായി. കാർ പോയ ദിശയും കൃത്യമായി മനസ്സിലാക്കിയ പോലീസ്, വാഹനത്തിന്റെ നമ്പറും ദൃശ്യങ്ങളും എല്ലാ യൂണിറ്റുകൾക്കും അടിയന്തരമായി കൈമാറി. നഗരത്തിലുടനീളം വ്യാപകമായ തിരച്ചിൽ തുടരുന്നതിനിടെ, ആളൊഴിഞ്ഞ പ്രദേശത്ത് ഉപേക്ഷിക്കപ്പെട്ട നിലയിൽ കാർ കണ്ടെത്തുകയായിരുന്നു. പ്രദേശം വളഞ്ഞ പോലീസ് പ്രതിയെ കസ്റ്റഡിയിലെടുക്കുകയും മോഷ്ടിച്ച വാഹനം ഉടമയ്ക്ക് തിരികെ കൈമാറുകയും ചെയ്തു. വാഹനങ്ങൾ പാർക്ക് ചെയ്യുമ്പോൾ ഡ്രൈവർമാർ ജാഗ്രത പാലിക്കണമെന്നും സുരക്ഷാ മുൻകരുതലുകൾ കർശനമായി പാലിക്കണമെന്നും പോലീസ്  മുന്നറിയിപ്പ് നൽകി.