‘ഭ്രാന്തായാൽ എന്തു സുഖം’; ജേക്സ് ബിജോയ് മാജിക്കുകള്‍ പുറത്ത്

പൃഥ്വിരാജിനെ നായകനാക്കി വൈശാഖ് സംവിധാനം ചെയ്യുന്ന ബിഗ് ബജറ്റ് ചിത്രം ‘ഖലീഫ’യുടെ ജ്യൂക്ക്‌ബോക്സ് പുറത്തിറങ്ങി. ജേക്സ് ബിജോയ് സംഗീതം ഒരുക്കുന്ന ചിത്രത്തിലെ മുഴുവൻ ഗാനങ്ങളും പ്രമുഖ മ്യൂസിക് പ്ലാറ്റ്‌ഫോമുകളിൽ ലഭ്യമായതോടെ ചിത്രത്തിന്‍റെ സംഗീതവും സോഷ്യൽ മീഡിയയിൽ ശ്രദ്ധ നേടുകയാണ്.

അനില രാജീവ് ആലപിച്ച ‘കിസ്സയറിയാതെ’, ശ്രേയ ഘോഷാൽ ആലപിച്ച ‘മതര’, ‘സലാമത്തലി’ എന്നീ ഗാനങ്ങളാണ് പുതുതായി പുറത്തിറങ്ങിയത്. ഇതോടൊപ്പം ജാബിർ സുലൈം വരികൾ എഴുതി ഈണമിട്ട ‘ഭ്രാന്തായാൽ എന്തു സുഖം’ എന്ന സൂഫി ഗാനവും ആൽബത്തിലെ ശ്രദ്ധേയമായ ഗാനമായി മാറിയിട്ടുണ്ട്. ഗാനം പുറത്തിറങ്ങിയതിന് പിന്നാലെ സോഷ്യൽ മീഡിയയിൽ വലിയ ചർച്ചകളാണ് നടക്കുന്നത്. 

ചിത്രത്തിലെ ‘അസലായവളേ’ എന്ന ഗാനം നേരത്തെ പുറത്തിറങ്ങിയിരുന്നു. സിദ് ശ്രീറാം ആലപിച്ച ഗാനത്തിനും മികച്ച പ്രതികരണമാണ് ലഭിച്ചത്. പുതിയ ഗാനങ്ങൾ കൂടി എത്തിയതോടെ ‘ഖലീഫ’യുടെ സംഗീത ആൽബം പ്രേക്ഷകർക്കിടയിൽ തരംഗമാവുകയാണ്.

വ്യത്യസ്ത സംഗീതശൈലികൾ കോർത്തിണക്കിയാണ് ജേക്സ് ബിജോയ് ചിത്രത്തിലെ ഗാനങ്ങൾ ഒരുക്കിയിരിക്കുന്നത്. ഗാനങ്ങൾ പുറത്തിറങ്ങിയതിന് പിന്നാലെ പൃഥ്വിരാജ്–ജേക്സ് ബിജോയ് കൂട്ടുകെട്ടിനെക്കുറിച്ചും സോഷ്യൽ മീഡിയയിൽ ചർച്ച സജീവമാണ്. 

Spotify, YouTube, Prime Music, Apple Music തുടങ്ങിയ പ്രധാന മ്യൂസിക് പ്ലാറ്റ്‌ഫോമുകളിൽ ‘ഖലീഫ’യിലെ ഗാനങ്ങൾ ലഭ്യമാണ്. സ്വർണക്കള്ളക്കടത്തിന്‍റെ പശ്ചാത്തലത്തിൽ ഒരുങ്ങുന്ന ബിഗ് ബജറ്റ് എന്‍റര്‍ടെയ്‌നറാണ് ‘ഖലീഫ’. ചിത്രത്തിൽ മാമ്പറയ്ക്കൽ ആമിർ അലി എന്ന കഥാപാത്രമായാണ് പൃഥ്വിരാജ് എത്തുന്നത്. തെന്നിന്ത്യൻ താരം മാളവിക ശർമയാണ് നായിക.

മോഹൻലാലും ചിത്രത്തിൽ അതിഥി വേഷത്തിൽ എത്തുന്നുണ്ട്. മാമ്പറയ്ക്കൽ അഹമ്മദ് അലി എന്ന കഥാപാത്രത്തെയാണ് മോഹൻലാൽ അവതരിപ്പിക്കുന്നത്. ഈ കഥാപാത്രത്തെ കേന്ദ്രീകരിച്ച് ഒരുങ്ങുന്ന ‘ഖലീഫ’യുടെ രണ്ടാം ഭാഗത്തിൽ മോഹൻലാൽ നായകനാകുമെന്ന സൂചനയും അണിയറപ്രവർത്തകർ നൽകിയിട്ടുണ്ട്.

രഞ്ജി പണിക്കർ, ശിവജിത്, ഇന്ദ്രൻസ്, ഷമ്മി തിലകൻ, ഷൈൻ വർഗീസ്, മോഹിനി, കൈറ, മാസ്റ്റർ നഫാഷ് തുടങ്ങിയവരും ചിത്രത്തിൽ പ്രധാന വേഷങ്ങളിലെത്തുന്നു.

ജിനു എബ്രഹാമാണ് ചിത്രത്തിന് തിരക്കഥ ഒരുക്കുന്നത്. ‘മാസ്റ്റേഴ്‌സ്’, ‘ലണ്ടൻ ബ്രിഡ്ജ്’, ‘ആദം ജോൺ’, ‘കടുവ’ എന്നീ ചിത്രങ്ങൾക്ക് ശേഷം ജിനു എബ്രഹാമും പൃഥ്വിരാജും ഒന്നിക്കുന്ന സിനിമയെന്ന പ്രത്യേകതയും ‘ഖലീഫ’യ്ക്കുണ്ട്.

‘പോക്കിരി രാജ’യ്ക്ക് ശേഷം വൈശാഖും പൃഥ്വിരാജും വീണ്ടും ഒന്നിക്കുന്ന ചിത്രം എന്നതാണ് ‘ഖലീഫ’യുടെ പ്രധാന ആകർഷണങ്ങളിലൊന്ന്. പൃഥ്വിരാജ്–ജേക്സ് ബിജോയ് കൂട്ടുകെട്ടും ചിത്രത്തിന്റെ പ്രതീക്ഷ വർധിപ്പിക്കുന്ന മറ്റൊരു ഘടകമാണ്. ഗാനങ്ങൾ ഇതിനോടകം തന്നെ ശ്രദ്ധ നേടിക്കഴിഞ്ഞ സാഹചര്യത്തിൽ, വൈശാഖിന്റെ സംവിധാനത്തിൽ പൃഥ്വിരാജ് എത്തുന്ന ‘ഖലീഫ’യ്ക്കായി കാത്തിരിക്കുകയാണ് ആരാധകർ. ഓഗസ്റ്റ് 20ന് ‘ഖലീഫ’ തിയേറ്ററുകളിലെത്തും.