അഭിനയം നിർത്തില്ല, ആ തീരുമാനം വിവാഹമോചനത്തിന്റെ വൈകാരിക നിമിഷത്തിൽ'; ജയം രവി

ആരതി രവിയുമായുള്ള വിവാഹമോചന കേസിന്റെ പശ്ചാത്തലത്തിൽ സിനിമയിൽ നിന്ന് വിട്ടുനിൽക്കുമെന്ന തന്റെ തീരുമാനം മാറ്റി തമിഴ് താരം ജയം രവി. ജെ.എഫ്.ഡബ്ല്യു അച്ചീവേഴ്‌സ് അവാർഡ് ചടങ്ങിൽ വെച്ചാണ്, ആരാധകരെയും സിനിമാ ലോകത്തെയും ഒരുപോലെ വിഷമിപ്പിച്ച ആ തീരുമാനം താൻ മാറ്റുകയാണെന്ന് താരം ഔദ്യോഗികമായി പ്രഖ്യാപിച്ചത്. 

കഴിഞ്ഞ മേയ് മാസത്തിൽ നടത്തിയ വൈകാരികമായ ഒരു വാർത്താസമ്മേളനത്തിനിടയിലായിരുന്നു, വിവാഹമോചന നടപടികൾ പൂർത്തിയാകുന്നതുവരെ അഭിനയിക്കില്ലെന്ന് പ്രിയതാരം കണ്ണീരോടെ പറഞ്ഞത്. എന്നാൽ ആ തീരുമാനം വ്യക്തിപരമായ മാനസിക സമ്മർദ്ദങ്ങളും വികാരങ്ങളും കാരണം എടുത്തുപോയതാണെന്നും അതിൽ സിനിമാ പ്രവർത്തകരോടും ആരാധകരോടും ക്ഷമ ചോദിക്കുന്നുവെന്നും ജയം രവി വ്യക്തമാക്കി. 

"സിനിമാ മേഖലയിലുള്ളവരും പ്രിയപ്പെട്ട ആരാധകരും നൽകിയ വലിയ പിന്തുണയും ധൈര്യവുമാണ് വീണ്ടും ക്യാമറയ്ക്ക് മുന്നിലെത്താൻ പ്രേരിപ്പിച്ചത്. ഈ വർഷം എനിക്ക് 46 വയസ്സ് തികയുകയാണ്. എന്റെ ജീവിതത്തിന്റെ പകുതിയും സിനിമയിലാണ് ചെലവഴിച്ചത്. എന്റെ ഒരു ചെറിയ തെറ്റ് നിങ്ങളെയെല്ലാം ഇത്രയധികം വേദനിപ്പിച്ചതിൽ ദുഃഖമുണ്ട്. വ്യക്തിജീവിതവും പ്രൊഫഷണൽ ജീവിതവും എനിക്ക് 50-50 ആണ്, പക്ഷേ വ്യക്തിജീവിതത്തിലെ വികാരങ്ങൾ കുറച്ചധികമായിപ്പോയി" അദ്ദേഹം പറഞ്ഞു. അതേസമയം, പ്രേക്ഷകർക്ക് മുന്നിലേക്ക് 'പൊന്നിയിൻ സെൽവൻ' ആയോ 'കരാട്ടെ ബാബു' ആയോ താൻ ഉടൻ തന്നെ സ്ക്രീനിൽ തിരിച്ചുവരുമെന്നും ജയം രവി വ്യക്തമാക്കിയിട്ടുണ്ട്.