'വി ലവ് യൂ ബേബി ഗേള്‍'; ടൊവിനോ മുതല്‍ സാമന്ത വരെ; നസ്രിയക്ക് പിന്തുണയുമായി താരങ്ങള്‍

കഴിഞ്ഞ ദിവസമാണ് നടി നസ്രിയ നസീം താന്‍ പൊതുവിടങ്ങളില്‍ നിന്നും വിട്ടുനില്‍ക്കുന്നതിനുള്ള കാരണം വ്യക്തമാക്കി പോസ്റ്റ് പങ്കുവച്ചത്. കുറച്ചു മാസങ്ങളായി പൊതുവിടങ്ങളില്‍ നിന്ന് അപ്രത്യക്ഷയായതിനുള്ള കാരണം വൈകാരികവും വ്യക്തിപരവുമായ ചില പ്രശ്നങ്ങളായിരുന്നുവെന്നാണ് താരം പറഞ്ഞത്. മികച്ച നടിക്കുള്ള കേരള ഫിലിം ക്രിട്ട്ക്‌സ് അവാര്‍ഡ് ലഭിച്ചതിനു പിന്നാലെയാണ് താരത്തിന്‍റെ തുറന്നുപറച്ചില്‍. കൂട്ടുകാരടക്കം എല്ലാവരോടും ക്ഷമ ചോദിച്ചുകൊണ്ടാണ് നസ്രിയ കുറിപ്പ് പങ്കുവച്ചിരിക്കുന്നത്.

പിന്നാലെ താരത്തിന്‍റെ ഇന്‍സ്റ്റപോസ്റ്റില്‍ കമന്‍റുമായി പ്രമുഖ താരങ്ങളെത്തി. ടൊവിനോ തോമസ്, ബേസില്‍ ജോസഫ്, ഐശ്വര്യ ലക്ഷ്മി, പാര്‍വതി തിരുവോത്ത്, അന്ന ബെന്‍, നൈല ഉഷ, വിനയ് ഫോര്‍ട്ട്, സാമന്ത, രജിഷ വിജയന്‍, സൗബിന്‍ ഷാഹിര്‍, കീര്‍ത്തി പാണ്ഡ്യന്‍ തുടങ്ങിയവര്‍ കമന്‍റിലൂടെ നസ്രിയക്ക് പിന്തുണ അറിയിച്ചു. 

'നിനക്ക് കൂടുതല്‍ കരുത്തുണ്ടാവട്ടെ, നീയൊരു സൂപ്പര്‍ ഹ്യൂമനാണ്' എന്നാണ് ജൂഡ് ആന്തണി കുറിച്ചത്. 'വി ലവ് യു ബേബി ഗേള്‍, നിനക്ക് വേണ്ടി എല്ലായ്പ്പോഴും കൂടെയുണ്ട്, അതറിയാമല്ലോ' എന്നാണ് മേഘ്ന രാജ് കമന്‍റ് ചെയ്​തത്.