പ്രളയവും അതിജീവനവും പറഞ്ഞ് ‘2018’; വമ്പൻ താരനിര; പ്രതീക്ഷ വാനോളം
കേരളത്തെ പിടിച്ചുലച്ച 2018ലെ വെള്ളപ്പൊക്കവും നാടിന്റെ ഐതിഹാസികരമായ അതിജീവനവും പറയുന്ന സിനിമ വെള്ളിത്തിരയിലേക്ക്. പ്രേക്ഷകരെ പ്രതീക്ഷയുടെ കൊടുമുടിയിലെത്തിച്ച് ടൈറ്റിൽ പോസ്റ്റർ പുറത്ത്. 2018 എന്നാണ് സിനിമയുടെ പേര്. ‘എവരിവൺ ഈസ് എ ഹീറോ' എന്ന് ടാഗ്ലൈന്. ജൂഡ് ആന്റണി ജോസഫിന്റെ സംവിധനത്തിലൊരുങ്ങുന്ന ചിത്രത്തിൽ വമ്പൻ താരനിരയാണ് അണിനിരക്കുന്നത്. 2018ൽ സംസ്ഥാനത്തെ മുക്കിയ പ്രളയത്തിൽ ഒറ്റക്കെട്ടായി പൊരുതിയ ധീരരായ മലയാളികളുടെ കഥയാണ് വര്ഷങ്ങളുടെ പ്രയത്നത്തിനൊടുവില് സിനിമയാകുന്നത്. കോടികള് മുടക്കമുള്ള സെറ്റുകളിലുള്പ്പെടെ ചിത്രീകരിച്ച സിനിമ മലയാളം കണ്ട വലിയ സിനിമകളുടെ നിരയിലേക്കാണ് കയറുന്നത്.
ടൊവീനോ തോമസ്, ആസിഫ് അലി, കുഞ്ചാക്കോ ബോബൻ, വിനീത് ശ്രീനിവാസൻ, അപർണ ബാലമുരളി, കലൈയരശൻ, നരേൻ, ലാൽ, ഇന്ദ്രൻസ്, അജു വർഗീസ്, തൻവി റാം, ശിവദ, ഗൗതമി നായർ എന്നിങ്ങനെ നീളുന്നു താരനിര. വേണു കുന്നപ്പിള്ളി, സി.കെ പദ്മകുമാർ, ആന്റോ ജോസഫ് എന്നിവർ ചേർന്ന് വലിയ ക്യാൻവാസിലാണ് ചിത്രം നിർമിക്കുന്നത്. പൃഥ്വിരാജും ഫഹദ് ഫാസിലും അടക്കം നിരവധിപേർ ചിത്രത്തിന്റെ ടൈറ്റിൽ പോസ്റ്റര് പങ്കുവച്ച് വിജയാശംസകൾ നേർന്നിട്ടുണ്ട്.
പ്രളയം കൊണ്ടുപോയ ആത്മാക്കള്ക്ക്, അവരെയോര്ത്ത് ഇന്നും കരയുന്നവര്ക്ക്, ഒരായുസ്സിന്റെ പ്രയത്നമെല്ലാം ഒലിച്ചുപോകുന്നതുകണ്ട് നിസ്സഹായരായി നില്ക്കേണ്ടിവന്നവര്ക്ക്, രക്ഷകരായി അവതരിച്ച സൈന്യത്തിന്, മത്സ്യത്തൊഴിലാളി സഹോദരങ്ങള്ക്ക്, മലയാളിയുടെ കൂട്ടായ്മയ്ക്ക്, മനുഷ്യന് എന്ന മഹത്തായ പദത്തിന് വേണ്ടിയാണ് ചിത്രം സമർപ്പിക്കുന്നതെന്നാണ് നിർമാതാക്കളില് ഒരാളായ ആന്റോ ജോസഫ് കുറിക്കുന്നത്.
ഈ സിനിമയിലേക്ക് എത്തിച്ചേരാൻ നേരിട്ട സങ്കീർണതകളെക്കുറിച്ച് സംവിധായകൻ ജൂഡ് ആന്റണി ജോസഫും കുറിപ്പ് പങ്കിട്ടിട്ടുണ്ട്.
